Đơs bè broă bơtàu tơnguh lơh sa- mpồl bơtiàn bơh thôn 8, xã tiah nhàr lơgar Ea Bung, kơnhoàl Ea Sup, ồng Bùi Công Oách, Ƀí thư Ci ƀộ pà gĭt, niam ngan rlau jơh là broă thôn neh lơh geh broă lơh ƀlàng sre kòi dờng, ngui ală sơntìl niam ngan bè ST25, Đài Thơm, mờ lam lơh broă lơh ròng kơnrồ sơntìl pa jat suơn dờng. Ală broă lơh do ndrờm ai geh cồng nha lơh sa uă ngan pơn ndrờm mờ lài. Ồng Bùi Công Oách đơs ngan, ală bơta tam gơl pa bè bồ tơngoh tam phan mờ ròng phan bơh làng bol dê geh tềl tơngŏ bơh kwang bàng, đảng viên mpồl ling sền gàr tiah nhàr lơgar mpồng tiah nhàr lơgar Dăk Ruê dê.

Ồng Bùi Công Oách, đơs: Bơh ngai mờ geh kwang bàng mpồl ling sền gàr tiah nhàr lơgar rê pơrjum bal mờ ci bộ, bè bơtàu tơnguh lơh sa bơh làng bol dê pràn ngan. Pal đơs tus bơta đơng lam uă ngan bơh Đảng ủy kung bè ală kwang bàng tàm mpồl ling sền gàr tiah nhàr lơgar dê neh tă pơgồp jơnau đơs ai Ci ƀộ in uă ngan tơngume geh ngan bè bơtàu tơnguh lơh sa. Ală nam do làng bol ai sơntìl kòi geh tơnhào uă mờ sơntìl kòi ST25 tơmŭt tàm broă lơh sa mờ broă lơh do bol añ gam rề ơnàng lơh uă.

Là cau sơnrờp lam lơh broă lơh ròng kơnrồ sơntìl pa jat suơn dờng tàm xã Ea Bung, ồng Đỗ Xuân Trường, Ƀí thư Ci ƀộ thôn 5, pà gĭt, lài do làng bol uă ngan ròng sơntìl kơnrồ dềt tàm tiah do, ròng lềng, cồng nha ờ uă. Kơnờm kwang bàng mpồl ling sền gàr tiah nhàr lơgar jơh nùs bơto pơlam mờ dong kờl uă gah, ồng neh tam gơl geh cồng nha tus broă ròng kơnrồ sơntìl pa jat suơn dờng bơh lồi nam 2020. Nam lài, ồng geh priă cồng mờr 100 tơlak đong mờ nam do kờp dŭ geh uă rlau nguùl dơ̆ khà priă do. Uă hìu bơnhă tàm thôn, tàm xã kung gam lơh jat mờ hời rơ hời pà gŏ cồng nha kơnờm lơh gơtùi ală bơta ƀuơn neh geh lài.

Ồng Đỗ Xuân Trường, đơs: Kwang bàng mpồl ling sền gàr tiah nhàr lơgar là cau at tê sơñio broă, geh tŭ pơgồp bal priă bơcri nàng dong kờl làng bol in ròng phan, dong làng bol bơtàu tơnguh lơh sa hìu bơnhă, tơn jơh jơgloh, tơrmù rƀah. Làng bol ròng phan bơh chờm neh geh geh cồng nha. Bơta ƀuơn ngan rlau jơh là tàm do geh ală phan sa ai phan ròng in uă ngan, mìng tàm do lơm lơh kòi uă, geh rơhe uă den he pồt wơl ơn prap lơh   phan sa ai phan ròng in sa jơh nam tơn. Mờ bă ù sre he kung tam nhơ̆t, tam tơngời măi lơh gơlik phan sa nàng ròng kơnrồ.

Geh sồr rê tàm xã Ea Bung lơh Phó Ƀí thư Đảng ủy, Trung tá Nguyễn Văn Thanh, Kwang atbồ Pôs đồng ling sền gàr tiah nhàr lơgar mpồng tiah nhàr Dăk Ruê, pà gĭt, broă lài ngan là pal gĭt loh ù tiah, wă loh broă lơh sa bơh làng bol dê. Bal mờ hơ̆, ală bi pal sùm bơsram, jòi gĭt bơta mờng chài tàm uă tiah, bơh hơ̆ hơ̆ sồng gơtùi bơto pơlam, dong kờl làng bol lam lơh sa geh cồng nha.

Trung tá Nguyễn Văn Thanh, đơs: Bơh broă tus bal tơn mờ làng bol tàm broă lơh broă ngui sa tàm rài kis pah ngai kung bè tàm broă lơh sa, tam phan den ală bơta tàm xã Ea Bung geh uă bơta kwơ bơta pràn, mơya sền gŏ là broă ròng uă phan ròng mờ lơh kòi geh uă bơta ƀuơn mơya ờ hềt geh ngui jơh, gam pơhì pơhà ngan. Den tàng añ neh khin cha tă pơgồp jơnau đơs mờ Đảng ủy sơlơ tơnguh broă lơh đơng lam, sồr lơh tàm tơngai lơh broă bơtàu tơnguh lơh sa, mpồl bơtiàn. Ngan là tàm do là tiah tơrgùm ai 2 phan tam tờm hơ̆ là lơh kòi sre mờ dơ̆ 2 là ròng kơnrồ.

Thượng tá Phạm Đức Khá, Cíñ trị viên Pôs đồng ling sền gàr tiah nhàr lơgar mpồng tiah nhàr lơgar Dăk Ruê, pà gĭt, tàm tiah sar lơgar ngài ù tiah ro kơnrañ Ea Bung, kal ke ngan rlau jơh là lơh mbè lơi nàng tơnguh uă rài kis làng bol in. Rài kis làng bol geh bè ờs, bơtàu tơnguh den tiah nhàr lơgar geh kơ̆ kơljap, pràn kơldang, gơnoar tờm geh gàr niam. Den tàng, tŭ ai kwang bàng mpồl ling sền gàr tiah nhàr lơgar tus bal lơh broă tàm xã mờ đảng viên tus bal pơrjum tàm ală Ci ƀộ, mpồl lơh broă sac rơwwah nền nòn ngan ală kwang bàng, đảng viên geh bơta jak chài, bồ tơngoh jak, gĭt loh ù tiah. Ală kwang bàng, đảng viên neh lơh jat niam gơnoar, pơgồp bơnah dong bơt bơtàu xã Ea Bung ngai sơlơ bơtàu tơnguh, gàr kơ̆ lơngap lơngai, rơndap tap sèng tiah nhàr lơgar.

Thượng tá Phạm Đức Khá, đơs: Tàm tŭ lơh jat kơnòl broă cíñ trị bơh mpồl ling dê tàm tơngai pa do den gơnoar bơh kwang bàng geh sồr rê dong kờl tàm xã, kung bè đảng viên tus bal pơrjum tàm ală Ci ƀộ thôn, ƀòn, xã tiah nhàr lơgar neh lơh jat niam mờ geh cồng nha. Neh pơgồp bơnah dong kấp ủy, Ci ƀộ ală thôn lơh ngan bơt bơtàu, tơnguh uă bơta pràn jak, bơta pràn rcang sơndră bơh kấp ủy, Ci ƀộ, bal mờ kấp ủy ală tiah bơt bơtàu ală Ci ƀộ sàng goh, kơ̆ kơljap, pràn kơldang. Neh lơh niam ngan gơnoar là rbàng tàm tơrbŏ đah Đảng ủy Pôs đồng ling sền gàr tiah nhàr lơgar mờ Đảng ủy xã dê.

Nam 2021, xã Ea Bung neh geh dờp tơl khà ƀòn lơgar pa mờ do là xã bơh chờm tiah nhàr lơgar càr Dăk Lăk dê lơh sir broă lơh do. Bơt bơtàu ƀòn lơgar pa gam pơgồp bal niam ngan mờ broă bơt bơtàu broă lơh gàr kơ̆ nùs nhơm rcang lài sền gàr tiah nhàr lơgar kơ̆ kơljap tàm tiah nhàr lơgar Ea Bung dê.