Ală ngai rềp ngai sa tềp Dà lơgar, xã Trường Sơn, kơnhoàl Quảng Ninh, càr Quảng Bình gơ gơs chờ hờp, hô hơng ngan. Mpồl ling sền gàr tiah nhàr lơgar Làng Mô, tàm kơnhoàl Quảng Ninh neh bơyai lơh dơ̆ klơm mbar lơm pờng pà làng bol ƀòn Ploang, xã Trường Sơn, kơnhoàl Quảng Ninh in. Làng bol bal mờ ală cau ling sền gàr tiah nhàr lơgar tìp mat lơh kwèng đơs crih tam ya, nhơl ală phan nhơl bơh yau lơh nùs nhơm nam pa tus wă rò sa tềp Dà lơgar tàm ƀòn lơgar sơlơ ram mhŭ mờ chờ hờp.

Di dơ̆ do, Mpồl ling sền gàr tiah nhàr lơgar Làng Mô bal mờ ală mpồl ling pà phan sa tềp ai làng bol tàm ƀòn Ploang mờ ƀòn Rìn Rìn in, pà ală kơnòm bơsram in ào ram, pà 5 “broă lơh hìu jă brê tài mpồl bơtiàn”, koh siăt sŏ ờ sa priă mờ bơyai lơh kham kòp, pà sơnơm ờ sa priă, pà kơmung bĭc ai làng bol tiah nhàr lơgar in. Ồng Hồ Văn Thông, ơm tàm ƀòn Ploang, xã Trường Sơn, kơnhoàl Quảng Ninh chờ hờp đơs: Nam pa Mpồl ling sền gàr tiah nhàr lơgar- Ram mhŭ nùs nhơm làng bol ƀòn lơgar” niam ngan, chờ hờp ngan, làng bol brờn brài ngan. Tàm rài kis añ dê, nam do geh tus bal tàm broă lơh chờ hờp bè do đah mpồl ling mờ làng bol. Ală broă lơh bơh đơs crih tam ya, làng bol gam geh tam ya, đơs crih, geh tơm bơh bơr mờ dờp phan pà chờ hờp ngan, cau lơi kung geh phan pà lơm.

Dùl nam pa neh rê tai tàm tiah kơh bơnơm tiah nhàr lơgar Dân Hóa, kơnhoàl Minh Hóa, càr Quảng Bình. Kwang bàng, cau ling Pôs đồng ling sền gàr tiah nhàr lơgar Mpồng tiah nhàr lơgar Dunia Cha Lo bal mờ mpồl ling lơh pôs đồng tàm ù tiah do dê neh lam lơh broă lơh “Nam pa tiah nhàr lơgar- Ram mhŭ nùs nhơm làng bol ƀòn lơgar dê”, di tŭ sền gròi sa tềp ai làng bol rƀah kis tềng hơđơm jơng bơnơm Giăng Màn dê. Broă lơh geh uă broă lơh geh kwơ bè chu ñàng kah rơngal ală cau ling khin cha jak chài, cau ling chơ̆t màng, tìp mat lơh kwèng đơs crih tam ya, dơ̆ pơrlòng klơm ƀañ mbar lơm pòng tơlir, pà phan ai ală hìu bơnhă in. Mò Đinh Thị Mùi, ơm tàm ƀòn Bãi Dinh, xã Dân Hóa, kơnhoàl Minh Hóa chờ hờp ngan đơs: Broă lơh “Nam pa tiah nhàr lơgar- Ram mhŭ nùs nhơm làng bol tàm ƀòn” làng bol tàm ƀòn bol añ chờ hờp, chờ hờñ ngan. Tài bơh, bol añ là ală hìu bơnhă rƀah bơh xã tiah nhàr lơgar, tiah sar lơgar ngài dê tŭ do geh dong kờl. Mờr tus, bol añ geh pơnđơl pràn lơh ngan lơh broă sa nàng lơh sa hìu bơnhă bơtàu tơnguh, nàng ờ kơldìng wơl tàm Dà lơgar, tàm ală ƀan, ngàñ tai.  

Broă lơh “Nam pa tiah nhàr lơgar- Ram mhŭ nùs nhơm làng bol ƀòn lơgar” geh bơyai lơh sùm pah nam lài mờ dơ̆ sa tềp dà lơgar mờ dùl ròt bal tàm jơh ală xã tiah nhàr lơgar, lơh geh dùl nùs nhơm wă rò nam pa bềng lìu tàm ală ƀòn lơgar. Bơh broă lơh do, làng bol, kwang bàng, cau ling tàm gơl gùng tiah nhàr lơgar, kung tơngŏ bơta tam klăc bal, nùs nhơm sơr lèt gan kal ke mờ kơ̆p gơn lơh geh uă cồng nha tàm nam pa Qúy Mão nam 2023.

Đại tá Trịnh Thanh Bình, Kwang atbồ Gah đơng lam Mpồl ling sền gàr tiah nhàr lơgar Quảng Bình pà gĭt, lài mờ dơ̆ sa tềp Dà lơgar, Mpồl ling sền gàr tiah nhàr lơgar đơng lam mờ hòi jà ală mpồl cau, cau dùl nă să dong kờl bal nàng geh gĭt nđờ rơbô phan pà, bơnah lơi dong làng bol tàm tiah nhàr lơgar Quảng Bình in wă rò nam pa chờ hờp ngan, ram mhŭ ngan. Đại tá Trịnh Thanh Bình, đơs: Broă lơh geh uă broă lơh lila, geh ngan mờ jàu pà uă bơnah phan pà bơh ală cau geh nùs nhơm niam nàng làng bol in geh rài kis hờm ram rlau tai, gàr niam sa tềp hờm ram rlau. Lơh geh nùs nhơm ai làng bol in, ling klàng mờ làng bol tàm tiah nhàr lơgar wă rò dùl tơngai sa tềp ram mhŭ, bơtòm tơrgùm bal, bơta gơn kơnờm nàng bơtàu tơnguh lơh sa mpồl bơtiàn bal mờ sền gàr gơnoar tờm sền gàr lơngap lơngai tiah nhàr lơgar bơh Dà lơgar dê.

Lài hơ̆, tàm xã Hồng Vân, kơnhoàl A Lưới, càr Thừa Thiên- Huế, Ƀộ Tư lệñ Mpồl ling sền gàr tiah nhàr lơgar, Mpồl tam klăc cau ùr Dà lơgar Việt Nam pơgồp bal mờ Tỉñ ủy, Ủy ƀan Ñân zân càr Thừa Thiên Huế bơyai lơh broă lơh “Nam pa Mpồl ling sền gàr tiah nhàr lơgar lơgar- Ram mhŭ nùs nhơm làng bol ƀòn lơgar” wă rò sa tềp Dà lơgar Qúy Mão 2023. Tàm do neh geh bơyai lơh ală broă lơh bè: sơnđờm mŭt ngui, tàm jàu hìu ơm “Hìu ơm ram mhŭ ai cau rƀah tiah nhàr lơgar in”, còp, pà phan ai cau rƀah, hìu bơnhă lơh broă kăc màng jŏ nam in; còp, gờm chờ sa tềp gơnoar atbồ, làng bol, kơnòm bơsram, mpồl cau atbồ, sền gàr tiah nhàr lơgar in; tìp mat lơh kwèng đơs crih tam ya; jàu pà phan ai kơnòm bơsram mờ hìu bơnhă kal ke tàm kơnhoàl A Lưới in; kham kòp, pà sơnơm ờ sa priă ai làng bol in; ală broă lơh niam chài, tàp pràn să jan, nhơl ală bơta nhơl bơh yau. Broă lơh kung lời pà 10 nơm hìu ơm “Hìu ơm ram mhŭ ai cau rƀah tiah nhàr lơgar in”, 15 nơm kơn rồ me sơntìl, 500 bơnah phan pà sa tềp.