Uă ngan đảng viên ndrờm tơngŏ geh gơnoar broă lam lài lơh krơh tàm lơh broă lơh sa, bơtàu tơnguh lơh sa, jơh nùs dong kờl cau ndai tàm mpồl lơh sa, tă pơgồp bơ̆t bơtàu ƀòn lơgar pa, dong kờl sền gàr rài kis mpồl bơtiàn.

Bi Đặng Dậu Qúy là đảng viên deh nam 1983 tàm xã Cư Suê, kơnhoàl Cư Mgar, càr Dăk Lăk, lài do bi neh jơh bơsram đại họk mờ mŭt lơh broă tàm dùl ngân hàng tàm càr Dăk Lăk mờ priă nhai uă ngan. Bè hơ̆ mơya, tơnơ̆ mờr 10 nam, sền gŏ broă lơh gah ngân hàng ờ gơhờp, bi sang broă nàng lơh jăt jơnau kơ̆p kờñ lơh broă sa sươn sre bơh he dê. Neh geh lài 1 lồ 6 sào mìr geh mè bèp pà wơl, bal mờ priă lời prăp geh tŭ lơh broă ngân hàng, bi khin cha tam pa wơl jơh 800 tờm kơphê neh kra ràm jŏ sơna, càn tai priă bơh ngân hàng tam tàm bơrlŭ bal 300 tờm tiêu mờ mờr 100 tờm sầu riêng.

Bơh sơnrờp, tài bơh ờ geh uă mờng chài, dùl ròt tờm sầu riêng mờ tiêu gơtìp chơt jơh den tàng gơbàn hoàc hươr. Ờ gŏ dil nùs, bi pơn jăt tai jồm càn priă jền hìu bơnhă dê, gơ̆p bơyô srồ wơl ală tờm chi chơ̆t; lùp bơsram tai mờng chài bơh ală cau jak chài gah lơh broă sa sươn sre đòm jăt tam jăt gùng dà hữu kơ kơ̆ kơl jăp jŏ jòng. Ai jơnau bơsram mờng chài bơh ală dơ̆ lơh gơbàn hoàc hươr, rơhời bi neh lơh geh cồng nha mờ sươn chi tàm bơrlŭ bal gơ ai cồng nha uă. Lơh geh cồng nha mờ sươn chi, bi khin cha bơcri tai priă jền rề ơnàng tai bă ù lơh tai sươn ờng chi sơntìl. Mìng is tàm nam 2022 pa do, sươn chi tàm bơrlŭ bal bal mờ broă tăc chi sơntìl neh gơ ai priă jền rlau 600 tơlak đong. Bi Đặng Dậu Qúy, yal: Mờ gơnoar broă là đảng viên, he gĭt kơnòl broă bơh he dê là pal lơh krơh lài tàm bơtàu tơnguh lơh sa, mờ geh bơtàu tơnguh niam den hơ̆ sồng dong kờl geh hìu bơnhă mờ dong kờl cau ndai. Bè nam pa do, añ lơh geh 6 tấn sầu riêng tăc kung geh rlau 300 tơlak đong; 2 tấn tiêu tai gơ ai priă jền 120 tơlak đong tai mờ kờp tai sươn ờng, kơphê den tơrgùm jơh kung geh rlau 100 tơlak đong tai. Ờ kờp ală priă tă bơcri, hìu bơnhă lơh geh priă cồng rlau 300 tơlak đong.

Đảng viên ồng Võ Văn Hoàng 64 sơnam ơm tàm xã Ea Tu, ƀòn dờng Buôn Ma Thuột mờ nùs nhơm tơryăng tơryồng, gĭt kong bòl glar kal ke mờ bềng nùs nhơm kờñ gơboh kòn bơnus. Deh mờ dờng tàm càr Quảng Ngãi, tơnơ̆ hơ̆ lòt jăt mè bèp tus tàm càr Dăk Lăk jòi broă lơh sa bơh lài mờ ngai tơngklàs dà lơgar nam 1975. Ală tŭ lơh broă lơh sa, sơrlèt gan gĭt nđờ bơta bòl glar kal ke bal mờ uă dơ̆ lơh sa ờ geh cồng nha tơnơ̆ do hơ̆ sồng lơh gơtùi. Tŭ do, tơnơ̆ uă nam lơh, ồng geh 5 lồ ù tam sầu riêng tàm bơrlŭ bal mờ bàr pe tờm chi sa plai bè măng cụt, kroăc, bung, kwêt...Kờp jơh priă cồng lơh geh bơh sươn chi pah nam pơgăp 4 tơmàn đong, ờ kờp priă tă lơh, ồng lơh geh priă cồng rlau 2 tơmàn đong. Geh priă lơh sa, ồng jơh nùs ngan dong kờl ală hìu bơnhă kal ke ndai bè priă jền, chi sơntìl, phơng sih mờ sền gàr rài kis mpồl bơtiàn kung bè bơ̆t bơtàu ƀòn lơgar pa tàm ƀòn ơm kis. Ồng Võ Văn Hoàng yal: Là đảng viên tàm ƀòn ơm kis den he pal lơh krơh lài tàm lơh sa bơtàu tơnguh lơh sa, bơh hơ̆ làng bol khi lơh jăt. He gĭt bơta chài tam phan lơi den he bơto pơlam ƀà dong làng bol in bal, dong kờl bal mờ gơ̆p bơtàu tơnguh. Nđờ nam lơh sươn ờng, gŏ ală hìu bơnhă lơi kal ke den he dong kờl, hìu kal ke dùl êt den he pà khai in lèng càn, ai ală hìu kal ke ir den he pà gời khi in tơn; mìng is gơwèt mờ ală hìu kal ke bè hìu ơm mờ lơh hìu bơta nđàc, hìu nùs nhơm den añ rơ̆p dong kờl tơl hìu bơh 5 tus 10 tơlak đong, gơ jăt tàm rài kis. Añ kung tă pơgồp lơh gùng lòt, hòi jà làng bol thôn 3 lơh jơh ală gơl gùng tàm thôn.

Mò Lại Thị Loan, Củ tịc Mpồl Cau lơh broă sa càr Dăk Lăk đơs, uă ngan ală cau đảng viên ndrờm tơngŏ geh gơnoar broă lam lài lơh krơh lài tàm lơh broă lơh sa bơtàu tơnguh rài kis. Ală cau tàm mpồl bè Đặng Dậu Qúy, halà Võ Văn Hoàng ndrờm là ală “đảng viên lòt làng, làng bol ƀòn lơgar lòt jăt tơnơ̆”, là ală cau pơnrơ ngan lơh gơlik bơta pràn lơh gơrề pràn kơldang srơh bơtàu tơnguh lơh sa tơn jơh jơgloh tơrmù rƀah tàm ƀòn ơm kis. Mò Lại Thị Loan, đơs là: nàng srơh bơtàu tơnguh lơh sa tơn jơh jơgloh tơrmù rƀah bơh mpồl dê ngai sơlơ dờng pràn rlau, khà đảng viên tàm mpồl ngai sơlơ uă rlau, tơngai tus, mpồl sền gròi uă broă lơh tơmŭt uă đảng ai cau tàm mpồl jak ngan in, lơh gơlik bơnàng jă nàng ngai sơlơ geh uă rlau tai ală krơh đảng viên pơnrơ gơguh jak. Mò Lại Thị Loan, đơs: Bol añ sền gròi ngan broă yal tơngĭt cau jak ngan tàm mpồl nàng tơmŭt đảng. Tàm ală broă rơndăp lơh loh làng, den bal mờ ală mpồl cau ndai, bol añ geh ală broă rơndăp lơh loh làng bè jaù ală đảng viên, ală kwang ătbồ mpồl tề lam dong kờl ală cau lơh broă sa jak ngan tàm mpồl nàng tề lam, dong kờl, dilah gŏ tơl ală bơta den tơmŭt đảng nàng ală cau tàm mpồl do geh ơm tàm mpồl bơh đảng dê.

Ờ gŏ di mìng sơrbac mhar ngac ngar lơh sa jak lơm, ală đảng viên bè bi Đặng Dậu Qúy halà ồng Võ Văn Hoàng gam sùm jơh nùs bơto pơlam, tàm yal tơngĭt bal bơta mờng chài, dong kờl uă cau geh rài kis kal ke tàm mpồl bơtàu tơnguh bal lơh sa, tơnguh uă priă lơh geh, kơ̆ kơl jăp rài kis; jơh nùs tă pơgồp bơ̆t bơtàu ƀòn lơgar pa tàm ƀòn ơm kis.