Jat tơrgùm kờp bơh Tổng Liên đoàn Lao động Việt Nam, bơh nhai 9 nam 2022 tus jơh ngai 10/12 neh geh 1 rơbô 242 mpồl lơh sa kă bro gơtìp kal ke, gơtìp tơrmù sră blơi phan den pal tơrmù jiơ lơh broă bơh 482 rơbô 120 nă cau lơh broă dê. Tàm hơ̆. tơrmù jiơ lơh broă halà gam ơm lơh broă geh dờp priă nhai là 433 rơbô 908 nă cau, geh tus 90% kờp jơh ală cau gơtìp gơrềng. Geh pơgap 6 rơbô 600 nă cau ơm ing sră pơr gon lơh broă, ơm rlô lơh broă ờ geh priă nhai.

Bơta mpồl lơh sa kă bro gơtìp tơrmù sră blơi phan, cau lơh broă gơtìp roh broă lơh halà tơrmù broă lơh, neh gơ lời wơl bơta gơrềng dờng ngan, ngan là tàm tơngai sa tềp dà lơgar mờr tus rềp ngan. Gah tàñ mai phan là dùl tàm ală gah lơh broă gơtìp gơrềng uă ngan rlau jơh tŭ sră blơi phan lồi nam bơh uă mpồl lơh sa kă bro dê gơtìp tơrmù bơh 15% tus 50%, ndrờm bal mờ broă gơrềng tus broă lơh bơh gĭt nđờ tơlak nă cau lơh broă dê.

Ồng Trương Văn Cẩm, Phó Củ tịc Ală mpồl Tàñ mai phan Việt Nam đơs: Geh bàr pe bơta mờ tus tŭ do bol añ đơs là mpồl lơh sa kă bro geh bè là bơnah dong kờl bè sền gàr mpồl bơtiàn mờ broă lơh 48 rơbô 500 tơmàn ai cau lơh broă in; 110 rơbô tơmàn dong kờl ai mpồl lơh sa kă bro in, tàm hơ̆ geh dong kờl bơtơl priă cồng 2%, bol añ kung ờ hềt gơtùi lơh. Bơnah dong kờl VAT tơrmù priă dia 2% den bol añ dan pơn jat tai lơh jat ai mpồl lơh sa kă bro in. Ală broă lơh bè Bảo hiểm xã hội, Bảo hiểm ờ geh broă lơh gam uă bơta ờ niam mờ bol añ neh geh jơnau dan den kung sồr kơlôi sơnơng nàng gơtùi bơsong.

Jat mò Trần Thị Lan Anh, Kwang gơnoar cih Liên đoàn Thương mại mờ Kông nghiệp Việt Nam yal, bơta lơh sa kă bro bơh mpồl lơh sa kă bro ờ niam tàm nhai lồi nam mờ kờp dŭ lài geh jŏ jòng tus ết ngan rlau jơh tus jơh qúy 1 nam tơnơ̆. Mò Trần Thị Lan Anh, đơs: Tềng đap ală bơta kal ke do, VCCI sồr pal gàr niam lơh sa dờng, geh ală broă lơh gơ hòi gơ jà bơcri priă tàm lơgar, dong kờl gơ hòi gơ jà kă bro, jòi ală drà kă bro pa, sră blơi phan pa. Mơkung pal pơn jat tai lơh sir mờ lam lơh jat ală broă lơh dong kờl ai cau lơh broă mờ cau ngui cau lơh broă mờ ală bơnah dong kờl bè broă lơh nam priă jền; broă lơh dong kờl càn priă; sền gàr mpồl bơtiàn; tàm hơ̆, lài ngan là dong kờl ai ală mpồl lơh sa kă bro dềt mờ dimơ in. Pal lơh wơl ală broă lơh drà cau lơh broă gơ in di pal rlau mờ bơta geh ngan, bơto bơtê mờ bơto bơtê wơl.

Tàm tơngai do, ồng Ngọ Duy Hiểu, Phó Củ tịc Tổng Liên đoàn Lao động Việt Nam đơs là, pal geh uă broă lơh dùl ròt bal, dong kờl tàm tơngai lơyah ngai dong cau lơh broă in sơr lèt gan kal ke, ơm wơl tàm tiah lơh broă halà gờñ rê wơl tàm tiah lơh broă, mơkung dong kờl jŏ tơngai nàng sơlơ tơnguh bơta pràn gơ dờp, bơta pràn jai kong ai cau lơh broă in tềng đap bơta kal ke, bơta tam gơl bơh drà kă bro dê.

Ồng Ngọ Duy Hiểu, đơs: Lài ngan, pal sơlơ tơnguh yal tơngĭt jơnau bè drà lơh broă, lam lơh ală broă lơh, broă lơh dong cau lơh broă ƀuơn gĭt jơnau yal sac rơwah cau lơh broă, mờ ală jơnau sồr sac rơwah cau lơh broă geh bơngă pin dờn, ală mpồl lơh sa kă bro, mpồl cau gam kờñ sac rơwah cau lơh broă. Mơkung lơh jat niam gơnoar broă bơh ală mpồl cau ngui cau lơh broă tàm broă tàm tơrbŏ bal nàng yal tơngĭt broă lơh ai cau lơh broă in bơh ală mpồl lơh sa kă bro ờ gơtùi rơndap broă lơh tus lơh broă tàm ală mpồl lơh sa kă bro.

Nàng bơsong kung bè sền gĭt lài ală bơta kal ke mờr tus, ồng Vũ Trọng Bình, Kwang atbồ Kụk Lơh broă, Ƀộ Lao động-Thương ƀiñ mờ Xã hội đơs là, pal geh ală broă lơh bơsong mờ hơ ală broă gam ai tơlik tàm jơh bal gah cau lơh broă, broă lơh mờ sền gàr mpồl bơtiàn. Tŭ do, Ƀộ Lao động- Thương ƀiñ mờ Xã hội gam pơgồp bal mờ ală Ƀộ, anih lơh broă ndrờm mờ Ƀộ yal mờ Cíñ phủ ai lơh jat Nghị quyết bè broă bơtàu tơnguh drà cau lơh broă ngăc ngar nàng kờñ bơtàu tơnguh mhar lơh sa- mpồl bơtiàn.

Ồng Vũ Trọng Bình, đơs: Tŭ do, geh dùl broă là kờñ kơrnoat lơi hơ̆ nàng gơtùi tàm tơrbŏ jơh ală lơgar ală mpồl lơh sa kă bro drơng broă lơh cau lơh broă is tàm lơgar mờ lơgar ndai mờ drơng broă lơh lơh broă jat ngai, den Bình Dương mờ bàr pe tiah gam geh jơnau dan, digơlan bol he lơh dùl kâu lạc ƀộ cau kờñ geh broă lơh mờ cau kờñ jòi cau lơh broă halà Mpồl cau kờñ geh broă lơh mờ cau kờñ jòi cau lơh broă. Kơrnoat drà cau lơh broă do dong Dà lơgar rơndap mờ dong kờl niam rlau tai.

Tềng đap ală bơta kal ke gam geh tŭ Sa tềp dà lơgar gam mờr tus sồr Cíñ phủ, ală Ƀộ, ngàñ geh gơrềng pal lam lơh ală broă lơh jal mhar nàng kờñ tơrmù ƀà bơta kal ke ai mpồl lơh sa kă bro mờ cau lơh broă in, gàr geh cau lơh broă geh broă lơh jak chài, pơgồp bơnah gàr niam drà cau lơh broă, rcang ai tơngai bơtàu tơnguh wơl tai tàm nam 2023 in.