Mang ngai 11/3, jat jơ tiah do, pơrjum dờng Mpồl tam klac Nghị viện dunia (IPU) dơ̆ 146 neh mut lơh tàm càr lơgar Manama bơh lơgar Bahrain dê. Mờ tơngume “Sơlơ tơnguh bơta kis bal ring lơngai mờ ală mpồl bơtiàn mut gơ rờm bal ai jơh tơl nă cau in: dră wơl bơta ờ lời nùs”, IPU-146 gơ hòi gơ jà bơta tus bal bơh mờr 2 rbô nă kwang bàng tus bơh mờr 140 lơgar, tàm hơ̆ geh 44 nă Củ tịc Quôk hội mờ mờr 30 nă Phó Củ tịc Quôk hội.

Tàm dơ̆ pơrjum, ală mpồl kwang bàng Nghị viện rơp tàm pơgơl cribơyai nùs nhơm mờ cribơyai jơnau đơs bè 2, 3 broă jal mhar gơ rềng tus sò tơm tàm internet mờ cau tìs, tac bro kơnòm dềt kòn đời, tơrmù tuh tơlik nhơm carbon mờ tam gơl trồ tiah, dră wơl jơnau tơnggit ờ ngan, ală tơngume bơ chồt tàm dră bồ mờ ờ gơ rờm bal tàm ù tiah internet.