Pơrjum neh iat ala mat 12 càr, ƀòn dờng yal bè cồng nha ai jơnau đơs tă pơgồp tàm jơnau rơcang cih Adat Ù tiah (tam gơl) bơh ală rơnàng làng bol dê, ală kòl yan tàm tŭ lam lơh. Ală tiah tă pơgồp jơnau đơs mùl màl tàm tơl tap, tơl bơnah, tơl sèng, tơl bơta bơh jơnau rơcang cih Adat boh lam dê; ală jơnau đơs sồr tam gơl ală bơta adat boh lam; ală kal ke, kòl yan bơh ngan ngồn rài kis dê. Ală tiah đơs là, tơngai cribơyai, ai jơnau đơs làng bol dê lơyah ir, ờ gơtùi jòi git nền nòn, jòi geh bơta ring bal tàm làng bol.

Ală kwang bàng tơrgùm lơh loh 4 broă dờng. Dùl là pal lơh loh ală jơnau gơtha, pal git loh gơnăp gơnoar, kơnòl broă. Broă dơ̆ 2 là rơndap ù tiah; broă dơ̆ 3 là giă ù, gùng dà lơh nền giă ù mờ broă dơ̆ 4 là ai wơl ù, rơndap ƀòn ơm kis pa. Jơh ală kwang bàng sồr pal săng tĕ tŭ tơngai lơh nền giă ù, sang tĕ giă ù mùl màl.