Sền hìu gam tàm tơngai mờr lơh gơs, mò H’ Vin Byă (mờng hòi Mè Bó), kis tàm xã Dray Sáp, kơnhoàl Krông Ana, càr Dăk Lăk pà git, hìu lơh jơh rơlao 700 tơlăk đong. Priă geh nàng lơh hìu là bơh broă tềm pềr, prăp bơh uă nam ùr bơklao mò dê, den tàng mò mờ ồng nền nòn ngan tàm broă rơwah bơta hìu nàng lơh, phan nàng lơh. Broă lơh hìu geh cau tàm hìu nhă pin dờn jào Mpồl cau lơh hìu ƀòn Tuôr B in lơh, do ndrờm là ală cau kis tàm ƀòn bal. Mè Bó đơs: “Lài ngan, añ ưn ngài ală kwang bàng tàm kơnhoàl neh bơto broă lơh ai kòn sao añ in. Kòn sao añ neh rê tàm do lơh hìu añ in. Añ chờ hờp ngan tài kòn sao tàm ƀòn neh lơh bol añ in dùl nơm hìu niam”.

Bi Y Kun Kbuôr, atbồ mpồl cau lơh hìu ƀòn Tuôr B, xã Dray Sáp pà git, mpồl cau lơh hìu geh lơh bơh nam 2020, tŭ do mpồl geh 12 nă cau, ndrờm là ală cau neh geh bơsram broă lơh. Tơngai do, ală oh mi neh lơh geh 7 nơm hìu pa mờ uă broă lơh ndai ai làng bol kis tàm ƀòn in. Tŭ do, priă geh tơl nă cau lơh tờm bơh 9 tus 10 tơlăk đong tàm 1 nhai mờ cau jăt jơng geh di pơgăp bơh 06 tus 07 tơlăk đong tàm 1 nhai. Bal mờ broă ai geh priă ală cau tàm mpồl in, pah nam Mpồl do geh tă dùl bơnah priă nàng blơi tai măi drơng tàm broă lơh. Bi Y Kun Kbuôr đơs: “Oh mi lòt lơh broă uă bloh, tŭ do lòt bơsram broă lơh hìu oh mi lơh ngan lòt bơsram gah lơh hìu ala mờ broă lòt ngài he geh lơh mpồl bal nàng lơh ƀòn lơgar in, nàng lơh sa să tờm he dê geh tơnguh bơtàu. Geh lơh broă hìu nhă tờm mờ geh jòi priă ai hìu nhă in tai”.

Bi Y Riêng Niê, cau tàm Mpồl cau lơh hìu ƀòn Tuôr B pà git, bi geh priă di pơgăp 300 rơbô đong tàm 1 ngai lơh broă: “Lơh broă do ƀuơn lơh mờ geh priă tai, gŏ hìu geh mpồl lơh gơs mờ geh oh mi ƀòn lơgar pin dờn den gơlơh chờ hờp mờ pơnyờ sa ngan”.

Mpồl cau lơh hìu ƀòn Tuôr B là broă lơh pa ngan gơwèt mờ làng bol kòn cau Rơđê dê, geh lơh tơnơ̆ mờ ală ơdŭ bơsram broă lơh cau lơh broă tàm ƀòn in. Jăt ồng Y Phen Niê, Củ tịc Mpồl làng bol lơh broă sa xã Dray Sáp yal, gơnoar atbồ xã neh dong kờl ờ uă bơta phan, phan lơh broă, yal broă lơh... dong kờl làng bol tơnguh bơtàu broă lơh, pờ gùng dà tơmù rơƀah kơl jăp. “Ai tơngŏ broă lơh do neh tơn jơh jơgloh tơmù rơƀah kơl jăp ngan tàm xã bol añ dê. Lài do, pal hòi jà ală cau chài bơh tàm tiah ndai tus lơh, den tŭ do bol añ neh geh Mpồl lơh broă bal do. Bol añ neh pơgồp bal kung bè tơrbŏ bal jơh ală hìu làng bol tàm xã ờ pal hòi jà ală cau chài bơh tàm tiah ndai tus tai, mờ neh geh cau tàm xã tờm he dê drơng lơh mờ lơh ală broă ƀòn lơgar in”.

Bơdìh mờ Mpồl cau lơh hìu ƀòn Tuôr B, xã Dray Sáp, tàm ờ uă xã ndai tàm kơnhoàl Krông Ana, làng bol kòn cau kung geh bơsram broă lơh hìu sơl mờ lơh geh cồng nha. Bè ồng Y Sao Mlô, kis tàm ƀòn Tơ Lơ, xã Ea Na bơh dùl nă cau jăt jơng lơh broă, bi jăt bơsram broă lơh mờ gơs cau lơh hìu tờm. Ồng Y Sao yal: lài mờ hơ̆, ồng mìng lòt jăt ală mpồl cau chài lơh hìu, lơh ală broă lơh ƀuơn ngan den tàng priă geh ờ uă. Tŭ git jơnau yal geh ơdŭ bơto broă lơh geh pờ tơn tàm xã, ồng neh dan cih măt tus bal bơsram. Lơh ngan bơsram bal mờ lòt bơsram tơl, tơnơ̆ mờ tŭ neh jơh tơngai bơsram, ồng geh cau atbồ mpồl cau chài lơh hìu tam gơl lơh gơs cau chài tờm, mờ priă geh bơh 300 rơbô tus 350 rơbô đong tàm 1 ngai.

Gam ồng Y Xiếp Byă, kis tàm ƀòn Kruế, xã Ea Bông bŭ lah neh gơs cau lơh hìu tờm ngan, mơya tài kờñ geh tơnguh tai bơta chài lơh broă den tàng ồng neh dan cih măt tus bal bơsram ơdŭ bơsram lơh ală broă làng bol ngui. Bơh ơdŭ bơsram do, ồng ờ mìng git kơlôi sơnơng di pal bè broă lơh bal mờ phan nàng lơh broă, mờ ồng gam git tai ală jơnau bè lơngăp lơngai, kloh niam lơh broă.

Jăt Anih Giáo dụk thường xuyên – Bơto broă lơh kơnhoàl Krông Ana, càr Dăk Lăk yal, pah nam broă kờñ bơsram broă lơh bơh cau lơh broă tàm kơnhoàl geh di pơgăp 400 nă. Tàm hơ̆, tơrgùm tàm ală mpồl broă lơh bè: broă lơh làng bol ngui; tam mờ lơh bơsềt; mai phan mờ măi mŏk. Bơh broă bơto broă lơh neh dong kờl cau bơsram in git bè kơrnoăt tờm ngan bơh tơl gah broă mờ ală cau dan cih măt bơsram, den tàng cồng nha broă lơh geh gơguh uă, geh broă lơh kơl jăp mờ priă geh kung gơguh uă ngan sơl.

Bơh cồng nha lơh geh bơh Mpồl cau chài lơh hìu ƀòn Tuôr B dê geh ai gŏ gùng dà pa, broă lơh pa tàm broă bơto broă lơh, ai broă lơh tàm ală ƀòn, tiah làng bol kòn cau tàm càr Dăk Lăk dê tàm tơngai tus: hơ̆ là pơgồp bal mờ ală broă lơh mùl màl, ală gah broă tờm tàm rài kis làng bol dê.