Gùng lòt mŭt tàm hìu ồng Hồ Phình, 47 sơnam, ơm tàm ƀòn Kè, xã Lâm Hóa, kơnhoàl Tuyên Hóa kuĕt rơ kue lòt gan bàr pe nơm dòr. Lài do, hìu bơnhă ồng Phình sùm siơ̆u siar ờ tơl phan sa. Hìu geh 6 nă cau mơya mìng kơnờm tàm 2 sào ù tam phan lơyah tơngai mờ 1 sào sre lơh kòi, nam lơi kung ờ geh tơnhào, jơh hìu bơnhă ồng dê kơ̆p kơnờm jơh lơm tàm bơta dong kờl bơh Dà lơgar dê.

Ờ bài kong mờ rài kis jơgloh rƀah, ồng Hồ Phình lòt jòi, lơh ală broă lơh bơtàu tơnguh lơh sa. Bơh bơnah priă 50 tơlak đong càn bơh Ngân hàng Cíñ sác Xã hội, ồng blơi kơnrồ me, sur me mờ chi sơntìl nàng tam brê. Bơh uă nam tềm pềr, ồng Hồ Phình geh 5 lồ brê bal mờ uă rơpu, kơn rồ, sur, iar. Ồng gam lơh tai kòi sre, tam tơngời..., tơnhào bơh kòi sre tơl sa gùt nam, tơngời ngui nàng ròng sur, iar, lơh sa hìu bơnhă bơtàu tơnguh loh làng.

Ồng Hồ Phình đơs: “Kung gam uă bơta kal ke sơl mơya pal pơnđơl pràn lơh ngan, lơh sa geh cồng nha rlau tai. Bulah kung gam rƀah mơya he kung gam geh phan sa phan prăp rlau mờ làng bol tàm ƀòn dùl ết. Cih sră dan lik bơh hìu bơnhă rƀah, hìu bơnhă ndrờm bè rƀah nàng Đảng, Dà lơgar in dong kờl cau kal ke rlau mờ he tai. Ală hìu bơnhă kal ke den he kung dong kờl làng bol sơl, ờ hềt gĭt lơh suơn den he bơto pơlam làng bol in lơh suơn”.

Ồng Hồ Phình là dùl tàm ală cau Mã Liềng sơn rờp geh tơmŭt tàm Đảng mờ kung là cau bơh chờm tàm xã Lâm Hóa dê cih sră dan lik bơh hìu bơnhă rƀah. Sră cih dan lik bơh hìu bơnhă rbah ồng dê ờ mìng lời bơnah phan dong kờl ai cau kal ke rlau mờ he in lơm mờ gam là bơta pơn jờng ai làng bol cau Mã Liềng in lơh jat krơh ồng dê nàng lik klàs rƀah.

Mò Cao Thị Vân, Kwang atbồ ƀòn Kè, xã Lâm Hóa, kơnhoàl Tuyên Hóa pà gĭt, kờñ hòi jà làng bol kòn cau Mã Liềng bơtàu tơnguh lơh sa den ală Đảng viên pal lơh lài ngan, pal lik klàs rƀah lài, đơs lòt bal mờ lơh den làng bol hơ̆ sồng dòn mờ lơh jat. Bal mờ bơtàu tơnguh lơh sa hìu bơnhă, ồng Hồ Phình gam tus tơl nơm hìu tàm ƀòn, bơto pơlam làng bol in ròng phan, tam brê, pà sơntìl phan tam, phan ròng.

Mò Cao Thị Vân đơs: “Ồng Hồ Phình lòt tơl nơm hìu nàng mblàng yal, pơndờm pơnđiang làng bol, dilah gơtìp ală bơta kal ke lơi den dong kờl. Nàng hòi jà làng bol tàm do den kwang bàng “bơr đơs den lòt bal mờ tê sơñio lơh broă” den làng bol hơ̆ sồng wă. Tơngai pa do, Đảng mờ Dà lagar sùm sền gròi, dong kờl làng bol uă ngan, làng bol ngai sơlơ bơtàu tơnguh, geh hìu ơm, gùng lòt, đèng sòl àng mờ geh hìu bơsram ai kơnòm bơsram in”.

Xã Lâm Hóa geh rlau 150 hìu bơnhă mờ pơgap 650 nă cau là kòn cau Mã Liềng (dùl jơi bơh kòn cau Chứt dê). Ồng Đinh Văn Bắc, Phó Ƀí thư Đảng ủy xã Lâm Hóa, kơnhoàl Tuyên Hóa, càr Quảng Bình pà gĭt, ƀòn Kè tŭ do geh 10 nă Đảng viên, tàm hơ̆ geh 7 nă Đảng viên là kòn cau Mã Liềng. Tàm gơnoar broă là Phó Ƀí thư Ci ƀộ, ồng Hồ Phình bal mờ ală Đảng viên tàm ƀòn Kè sùm lơh krơh niam, lòt lài tàm ală srơh, lơh jat gùng dà broă lơh bơh Đảng, Dà lơgar dê, hòi jà làng bol bơtàu tơnguh lơh sa, tơn jơh jơgloh tơrmù rƀah. Jat ồng Đinh Văn Bắc yal, ồng Hồ Phình geh dờp là Hìu bơnhă cau lơh broă sa kă bro kấp xã 5 nam sùm. Nam lài, ồng là Đảng viên lơh sir jak ngan kơnòl broă geh jàu.

Ồng Đinh Văn Bắc đơs: “Gơnoar broă lam lài, lơh krơh, lơh is bơh Đảng viên dê lơh geh cồng nha tàm broă mblàng yal, hòi jà làng bol bè bơtàu tơnguh lơh sa mpồl bơtiàn, gàr kơ̆ sền gàr dà lơgar, lơngap lơngai tàm ală ƀòn. Rài kis tam gơl uă ngan, ngan là làng bol lơh is tàm broă bơtàu tơnguh lơh sa, mpồl bơtiàn”.

Ồng Bùi Thanh Chuyên, Phó Ƀí thư Thường trực Huyện ủy Tuyên Hóa, càr Quảng Bình pà gĭt, jơh gùt kơnhoàl geh 44 nă Đảng viên là làng bol kòn cau dùl ết nă cau. Do là mpồl cau tờm ngan tàm broă mblàng yal gùng dà broă lơh bơh Đảng, Adat boh lam bơh Dà lơgar dê, bơtàu tơnguh lơh sa- mpồl bơtiàn, prap gàr bơta niam chài jơi bơtiàn kòn cau tàm ală ƀòn tiah nhàr lơgar dê. Jat ồng Bùi Thanh Chuyên, tơngai tus, kơnhoàl pơn jat tai tơmŭt Đảng viên tàm làng bol kòn cau dùl ết nă cau, bơt bơtàu mpồl Đảng viên lơh krơh niam, lơh geh bơta gơ rề uă làm bă tiah.

Ồng Bùi Thanh Chuyên, đơs: “Tàm tơngai tus, Ƀan Thường vụ Huyện ủy pơn jat tai sền gròi lơh pràn broă tơmŭt Đảng uă tàm tiah làng bol kòn cau dùl ết nă cau nàng ngai sơlơ geh uă làng bol kòn cau ơm tàm mpồl Đảng dê, gơ gơs ală cau tờm ngan mờ là tiah kơl dìng, cau lam lài, lòt lài tàm dơ̆ hòi jà làng bol lơh jat niam ală gùng dà broă lơh bơh Dà lơgar dê”.

Broă tơmŭt ală làng bol kòn cau dùl ết nă cau jak ngan tàm Đảng tàm kơnhoàl tiah kơh bơnơm Tuyên Hóa, càr Quảng Bình là kơnòl broă cíñ trị. Bơh hơ̆, neh lơh geh gơnoar broă cau tờm tàm tiah làng bol kòn cau dùl ết nă cau tàm tiah do in.