Ai tàm ƀòn dờng Hồ Chí Minh geh sền gròi ai rlau 30 rơbô nă Đoàn viên kông ñân in bơh ală broă lơh bè:“Ngai chờ kông ñân”, “Drà nùs nhơm kờñ gơboh”, “Sa tềp bơtòm tơrgùm mat”.

Tàm Dăk Lăk, bơh ngai 6 tus ngai 8/01, Tổng Liên đoàn Lao động Việt Nam pơgồp bal mờ Liên đoàn Lao động càr Dăk Lăk bơyai lơh broă lơh “Drà Sa tềp Kông đoàn nam 2023”. Do là broă lơh geh ngan pơgồp bơnah sền gròi rài kis ai kông ñân, cau lơh broă geh rài kis kal ke, hìu bơnhă rƀah, nàng ờ gŏ lời cau lơi gơtìp lời wơl bơh ngkời tơnơ̆ tŭ nam pa tus wă rò sa tềp dà lơgar dê. At tàm rê uă ngan ală phan pa blơi geh tàm drà “Sa tềp Kông đoàn nam 2023” bi Nguyễn Hữu Lâm Sơn, kông nhân Kông ty Lòs Asean, tiah lơh sa mờ măi mok Hòa Phú pà gĭt: Añ geh pà 1 nơm sră 150 rơbô đong den lòt blơi hộp rơmĭt, bơnah phan pà 0 đồng den geh 1 nơm phích gơm dà, khàr tơngi mờ dùl nơm ào.

Dơ̆ sơnrờp tus bal tàm drà “Sa tềp Kông đoàn”, bi Nguyễn Thị Phượng, kông ñân Kông ty tiah ơm kis tiah drà càr Dăk Lăk đơs là, broă lơh do neh dong ai ală đoàn viên Kông đoàn mờ cau lơh broă geh priă jền nàng blơi geh uă phan bơna Sa tềp mờ khà giă priă dong kờl. Bi Nguyễn Thị Phượng đơs: Nam do là nam sơnrờp añ tus tàm do dờp phan pà do, añ gơlơh chờ hờp mờ chờ hờp uă ngan. Ală phan pà do dong ai hìu bơnhă añ geh tai dùl dơ̆ Sa tềp chờ hờp.

Drà Sa tềp Kông đoàn nam 2023 càr Dăk Lăk geh bơyai lơh bơh ngai 6 tus ngai 8/01/2023, geh 40 cơldŭ ràng tăc phan, tăc ală phan bơna, drơng broă sa tềp kờñ pal geh jơnau kờñ cau ngui sa in mờ giă priă dong kờl halà giă “0 đồng” lời ai rlau 3 rơbô nă kông ñân lơh broă. Bal mờ hơ̆, Liên đoàn Lao động càr Dăk Lăk kung pà 400 bơnah phan ai cau lơh broă in. Mơkung bơyai lơh ală broă lơh niam chài, đơs crih tam ya, nhơl chờ lơh rài bồ tơngoh, ală broă bơto pơlam adat boh lam; kham, bơto pơlam pràn kơl dang să jan mờ pà sơnơm ờ sa priă ai đoàn viên, cau lơh broă. Ồng Nguyễn Công Bảo, Củ tịc Liên đoàn Lao động càr Dăk Lăk pà gĭt: Drà Kông đoàn ngan ngồn là broă lơh sền gròi ai cau lơh broă in. Do là dơ̆ sơn rờp Kông đoàn càr geh bơyai lơh drà Sa tềp Kông đoàn, bơh sơn rờp bol añ kung kơlôi sơnơng, mơya mờ bơta dong kờl bơh Tổng Liên đoàn, bơta sền gròi đơng lam bơh Tỉñ ủy, pơgồp bơh Ủy ƀan mờ ală ƀan, ngàñ geh gơrềng mờ kwơ màng là bơta pơnđơl pràn lơh ngan bơh oh mi tàm Kông đoàn ală kấp bol añ neh lam lơh di tŭ, hòi jà mờr 40 mpồl lơh broă tus bal ală cơldŭ ràng tăc phan.

Dăk Lăk là dùl tàm 22 càr, ƀòn dờng geh Tổng Liên đoàn Lao động Việt Nam sac rơwah bơyai lơh broă lơh “Drà Sa tềp Kông đoàn nam 2023”. Jat mò Trần Thị Thanh Hà, Ủy viên mpồl Củ tịc, Kwang atbồ Mpồl gĭt gơ̆p lơh broă, Tổng Liên đoàn Lao động Việt Nam, do là broă lơh geh ngan bơh mpồl Kông đoàn dê pơgồp bơnah tam pà bal nàng hìu bơnhă ală đoàn viên, cau lơh broă geh rài kis kal ke geh chờ hờp nam pa, wă rò sa tềp dà lơgar ram mhŭ, chờ hờp. Mò Trần Thị Thanh Hà đơs: Ală drà Sa tềp Kông đoàn nam do geh bơyai lơh mờ broă lơh bơh 30 tus 120 cơldŭ ràng tăc phan ai ală tiah in, tàm hơ̆ geh ală cơldŭ tăc phan 0 đồng mờ ngan là Tổng Liên đoàn Lao động Việt Nam geh bơh 2 rơbô 500 tus 3 rơbô voucher ai dùl drà in mờ tơl voucher là 300 rơbô đong nàng cau lơh broă in gơtùi ngui nàng blơi ală phan tàm cơldŭ ràng tăc phan mờ ngan là bol añ kung hòi jà uă ngan ală cơl dŭ ràng tăc phan bơh Dà lơgar mờ càr, ƀòn dờng tus ală gah phan geh bơta niam ngan mờ tơrmù giă bơh 10 tus 50-70% nàng ai cau lơh broă in geh dùl dơ̆ sa tềp ram mhŭ rlau.

Tàm anih lơh gơlik phan Linh Trung 1, ƀòn dờng Hồ Chí Minh, Kông đoàn ală Tiah lơh gơlik phan kung neh bơyai lơh broă lơh “Ngai chờ nùs nhơm- Sa tềp bơtòm tơrgùm mat”  nam 2023, nàng kờñ sền gròi ai gĭt nđờ jơ̆t rơbô nă kông ñân kal ke in. Ngai chờ geh bơyai lơh uă broă lơh duh hồl mờ geh ngan. Kông ñân geh pà sră blơi phan nàng tam gơl uă phan ngui sa, phan ngui, phan ngui drơng jơnau kờñ tàm hìu bơnhă mờ tàm tơngai sa tềp. Bơdìh hơ̆, broă lơh kung neh jàu pà vĕ rơndeh par, vĕ rơndeh ồs, vĕ rơndeh, phan pà ai kông ñân geh rài kis kal ke in.

Kông ñân Nguyễn Thị Thiết lơh broă tàm Kông ty Freetrend, ƀòn tờm Quảng Trị geh pà vĕ rơndeh ồs rê tàm ƀòn tờm ai jơh hìu bơnhă in, chờ hờp pà gĭt: Do là dơ̆ sơn rờp oh geh dờp vĕ nùs nhơm rê tàm ƀòn tờm sa tềp tơnơ̆ 3 nam lơh broă. Mờ vĕ do oh blơi tàm bơdìh rlau 2 tơlak rao, tŭ do geh pà vĕ do ờ hoan roh priă tă uă ngan. Ờ mìng oh geh dờp vĕ lơm mờ vĕ do jơh hìu bơnhă oh dê 4 nă cau ndrờm rê bal wă rò sa tềp tàm ƀòn tờm.

Jat jơnau kờp dŭ lài Kông đoàn Tiah lơh gơlik phan- Tiah lơh sa mờ măi mok ƀòn dờng Hồ Chí Minh geh sền gròi ai rlau 30 rơbô nă đoàn viên kông ñân in bơh ală broă lơh: Ngai chờ kông ñân; Drà nùs nhơm; Sa tềp bơtòm tơrgùm; tìp mat kông ñân tiah ơm kis ing; jàu pà vĕ rơndeh par, vĕ rơndeh ồs, koh siăt soh, sơng nđias tê ờ sa priă, pà akhar thư pháp, dơ̆ pơrlòng karaoke..., mờ kờp jơh priă tă rlau 20 tơmàn đong.