Lŏ Y Hương, kòn cau Sơdàng kis tàm càr Kon Tum pà git, ală nam pa do, geh mpồl cau ùr càr Kon Tum bơyai lơh uă broă pơrlòng bè: Cau mblàng yal broă jăk bè bơ̆t bơtàu cau ùr tàm rài pa tiah kòn cau, jăt yàng; Niam lơngăp lơngai ai cau ùr mờ kơnòm dềt in… den tàng să tờm bal mờ uă cau ùr neh git wă jơnau bè ală broă kòn cau, jăt yàng, Adăt ring bal cau ùr mờ cau klao , Adăt gùng tam bao mờ hìu nhă. “Bơh uă dơ̆ pơrlòng añ neh git uă ngan jơnau bè cau ùr, ală tơngu me bè broă lơh jăt jơnau kờñ dà lơgar dê tàm tiah làng bol kòn cau, tiah kơh bơnơm tơngai bơh nam 2021 tus 2030. Ală jơnau git wă bè pin dờn, jăt yàng. Broă lơh jŏ jòng bơh broă kòn cau Đảng mờ Dà lơgar dê. Ngui geh gơnoar bơh cau ùr, pin dờn rơlao uă ngan tàm broă boh bơr, bơsong broă, tàm ală broă lơh mpồl bơtiàn, tus bal broă lơh mpồl lơh broă cíñ trị”.

Kwơ màng tàm càr Kon Tum nam do, ală kơnòm dềt kòn cau kung geh tus bal Broă lơh cri bơyai đah Mpồl duh broă kơnòm dềt mờ Thường trựk HĐÑZ càr Kon Tum. Do là broă lơh kwơ màng nàng kơnòm dềt tàm càr Kon Tum dê geh tơlik nùs nhơm sền gròi, drơng gàr, iăt jơnau đơs bơh ală kơnòm dềt dê. Oh Phan Phúc Phú, bơsram ơdŭ 8C2, hìu bơsram kấp 2 mờ kấp 3 Liên Việt Kon Tum pà git: “Kòn neh lùp 3 jơnau gơrềng tus mờ broă tàm internet, broă sơgràm bic bài mờ tam lơh pù pờng tàm hìu bơsram mờ hìu jă brê tàm hìu bơsram neh ờ kơl jăp tai. Bơh ală jơnau hơ bơh ală mlŏ, wa den kòn neh wă là ngui internet den pal geh kơrnoăt, pal git. Broă sơgràm bic bài ha là broă tam lơh pù pờng den kòn kung git là ală gah mpồl lơh broă kung neh sền gròi. Bơh dơ̆ cri bơyai do, kòn gŏ gơlơh kwơ màng ngan”.

Ală nam do, bal mờ ală broă dong kờl rài kis lơh broă sa nàng dong kờl oh mi cau ùr tơnguh bơtàu lơh sa, ală kấp mpồl cau ùr tàm càr Dăk Lăk gam tus bal lơh ală broă tă priă nàng blơi sră ƀảo hiểm y tế pà ală cau tàm mpồl gơtìp kal ke in. Broă lơh do neh dong kờl tai uă oh mi cau ùr geh bơta niam nàng geh tus mờ broă sơm kòp, sền gàr bơta pràn kơl dang să jan, tơmù ờ uă kal ke tàm broă lơh sa tŭ ờ bơtoah gơtìp kòp tê jê să. Bè lŏ Đặng Thị Bình, kis tàm ƀòn 1, xã Ea Kpam, kơnhoàl Cư̆ Mgar tŭ dờp geh sră ƀảo hiểm y tế bơh mpồl cau ùr xã jào pà, gơlơh iang nùs ngan. “Rài kis hìu nhă añ den kung gam kal ke, geh đah Mpồl cau ùr xã pà 1 pang sră ƀảo hiểm den añ kung ưn ngài uă ngan, geh sră ƀảo hiểm nàng añ tus lòt kham kòp kung bè tơmù khà priă den añ kung iang nùs rơlao tŭ lòt kham sơm kòp, tơmù bơta kal ke bè priă tŭ lòt kham să tờm dê”.

Tàm càr Lai Châu, bơta krơi is tàm tiah làng bol kòn cau là geh uă bơhiàn mờ gơnoar bơh cau ùr tàm rài kis mìng là cau lơh, cau deh kòn. Kơnờm mờ geh broă mblàng yal di pal, den tàng tus tŭ do gonoar bơh cau ùr tàm càr kung neh tam gơl is mờ geh săp đơs tàm hìu nhă. Lŏ Ma Thị Chư, kis tàm ƀòn Phìn Chải, xã Giang Ma, kơnhoàl Tam Đường pà git: Tài geh bơklao lơh kông cứk tàm xã mờ geh kwang bàng sùm tus tàm ƀòn mblàng yal den tàng neh tam gơl bồ tơngoh kơlôi sơnơng, broă lơh, dong kờl mờ tam pà bal mờ kòn bao uă rơlao: “Pah ngai broă bơh añ dê là lơh broă tàm suơn, tàm sre, ròng sur, rơda, ròng iar, ròng rơpu mờ bĕ tơrnờm. Àng drim lòt lơh broă rê, pơ-ùr ờ hềt thàn trŭ piang den bơklao dong kờl pơ-ùr trŭ piang, kơ̆p pe nă mè mờ kòn rê hơ̆ sồng sào. Ngai dơ̆ poh, ngai rơlôi geh ơm ờ lòt lơh broă den bơklao kung lòt dong kờl mè bèp, dong kờl pơ-ùr lơh broă suơn sre, broă tàm hìu. Tŭ do hìu nhă geh rài kis, priă geh kơ̆ kơl jăp, bơklao kung ờ khin ơlih pơ-ùr tai tài hìu nhă kung neh ring niam”.

Bal mờ broă tus bal bơh ală gah, mpồl lơh broă dà lơgar bal mờ kấp ủy, gơnoar atbồ ală tiah, cau ùr bal mờ kơnòm dềt kòn cau gam ngai sơlơ geh sền gàr mờ ală bơta kwơ di pal. Cau ùr, kơnòm dềt kòn cau geh tus bal bơsram sră, tơnguh bơta ngăc ngar, git wă, tus bal broă lơh mpồl bơtiàn; geh sền gàr bơta pràn kơl dang să jan, sền gàr gơnoar, bơta kwơ di mờ adăt boh lam.