Pa do, Mpồl cau gơtìp sơnơm khih dioxin lơh aniai càr Kon Tum pơgồp bal mờ Kông ty kă bro Tơrgùm bal Kon Tum lơh dơ̆ jàu pà mờr 400 bơnah phan sa tềp mờ kờp priă rlau 146 tơlak đong ai cau kuĕt kơl tê là cau gơtìp sơnơm khih dioxin lơh aniai rài dơ̆ 3 tàm ală kơnhoàl: Đăk Hà, Kon Rẫy mờ ƀòn dờng Kon Tum. Bal mờ hơ̆ Mpồl cau gơtìp sơnơm khih dioxin lơh aniai càr Kon Tum kung tă bơh Kes priă cau gơtìp sơnơm khih dioxin lơh aniai rlau 137 tơlak đong pà 846 nă cau gơtìp sơnơm khih dioxin lơh aniai tàm ù tiah càr dê.

 Lài hơ̆, Kông đoàn Ală tiah lơh sa mờ măi mok- Tiah lơh sa càr Kon Tum dê pơgồp bal mờ Kông đoàn Viên cứk bơyai lơh broă lơh Sa tềp bơtòm tơrgùm bal- Nam pa tàm klăc bal nam 2023. Tàm broă lơh 360 nă đoàn viên Kông đoàn, cau lơh broă geh rài kis kal ke geh pà phan tơl bơnah phan kờp priă 500 rơbô đong tus 1 tơlak đong. Bơdìh mờ hơ̆ Kông đoàn Ală tiah lơh sa mờ măi mok- Tiah lơh sa càr Kon Tum kung jàu pà 200 bơnah phan ai đoàn viên kông đoàn mờ cau lơh broă in. Bi Trần Duy Hưng, lơh broă tàm Kông ty Bơcri priă bơtàu tơnguh phan bơna Tiah lơh sa càr Kon Tum geh 2 nă kòn gơtìp kòp, rài kis lơh sa hìu bơnhă kal ke, pà gĭt: Nam 2022 anih lơh broă kung neh dong kờl tơl làm ală broă lơh dong kờl ai cau lơh broă in. Añ ưn ngài uă ngan ală mpồl, mpồl cau, ngan là mpồl kông đoàn neh sền gròi tus cau lơh broă geh rài kis kal ke. Hìu bơnhă geh 2 nă sau dềt kòp jê kung bơyai lơh dùl dơ̆ sa tềp bè ờs sơl mờ kung ram mhŭ bơtòm tơrgùm bal.

Lơh jat ală broă lơh nùs nhơm niam dong kờl is di dơ̆ nam pa Qúy Mão 2023, rơnàng kơnòm să càr Dăk Lăk lam lơh uă broă lơh pa, wèt tus uă mpồl cau krơi is tàm ală tiah. At sră pà blơi phan kờp priă 500 rơbô đong, bi H’No Kbuôr, ơm tàm ƀòn Kmrơng Prong A, xã Ea Tu, ƀòn dờng Buôn Ma Thuột ơm mŏ iăt cau dong kờl is yal ală phan geh tăc tàm “Drà Siêu thị mini” nàng sac rơwah ală gah phan kờñ pal blơi. Bi pà gĭt: Geh bơta sền gròi bơh kwang đơng lam bồ Mpồl cau jơngo mat kung bè ală cau geh nùs nhơm niam, di dơ̆ sa tềp kung bè là mpồl geh nùs nhơm niam den bol oh kung ndrờm dờp geh ală phan pà kờñ gơboh bơh tơl nă cau dê lời ai he in. Oh sền gŏ broă lơh do geh kwơ ngan, ram mhŭ ngan, gơ dong oh in kung bè là cau tàm mpồl ndai, dùl bơnah lơi pơndờm pơndiang bal kung bè là dùl bơta chờ hờp dềt rơ hền is he dê.

Mờ tơl sră blơi phan kờp priă 500 rơbô đong, cau dờp pà phan geh sac rơwah is  ờ sa priă ală gah phan kờñ ngui sa tàm rài kis geh lài tàm drà siêu thị do, bè: sơdàng, dà toh, phe, tap, ƀung mi, phan tĕ, ƀañ kèo... Nam do, broă lơh lời pà 700 sră blơi phan ai cau rƀah tàm ƀòn dờng Buôn Ma Thuột mờ thị xã Buôn Hồ in.

Bi H Giang Niê, Ƀí thư Tỉñ đoàn Dăk Lăk pà gĭt, bal mờ “drà siêu thị mini sa tềp 0 đong” tŭ do, jơh 22 mpồl đoàn ƀòn lơgar tàm jơh gùt càr ndrờm geh ală broă lơh geh ngan wèt tus dong kờl cau rƀah, tờm ngan bè: kham kòp, pà sơnơm ờ sa priă, pà phan ngui sa kờñ pal geh, lơh hìu ơm nùs nhơm, pà rơndeh coh, pà priă bơsram,... Do là ală broă geh kwơ pơgồp bơnah bal mờ ală tiah dong kờl cau rƀah geh ală bơta wă rò nam pa, sa tềp tus. Bi H Giang Niê, đơs: Bol añ sền gròi lài ngan hơ̆ là kông ñân, cau rƀah mờ ngan là kơnòm dềt geh rài kis kal ke. Mờ nam do bol añ sền gĭt tai cau pa hơ̆ là ling geh griăt neh lik ling. Gơwèt mờ cau do den bol añ kơ̆p kờñ lơh niam broă lơh dong kờl mpồl ling gơwèt mờ ală cau ling geh griăt gam lơh kơnòl broă tàm mpồl ling. Mờ gơwèt mờ ling geh griăt neh rê wơl tàm ƀòn tờm kung pal geh ală bơta sền gròi, lơh mbè lơi gŏ geh là ală broă lơh cíñ trị mờ jơh ală kấp ƀộ, đoàn mờ ală kấp ủy Đảng ndrờm geh lời ai bơta sền gròi, nàng pơndờm pơđiang tai nùs nhơm tàm nam 2023 den pơn jat tai pơnđơl pràn lơh ngan tàm  broă bơtàu tơnguh lơh sa kung bè là tus bal tàm ală broă lơh bơh ală mpồl, mpồl cau tàm ù tiah do dê.

Liên đoàn Lao động càr Dăk Lăk kung neh bơyai lơh broă lơh “Sa tềp bơtòm tơrgùm bal” nam 2023 mờ tơngume “Sa tềp bơtòm tơrgùm bal- Nam pa tam klăc bal”. Bơh hơ̆, tơngŏ nùs nhơm, bơta sền gròi bơh mpồl Kông đoàn gơwèt mờ đoàn viên, cau lơh broă geh rài kis kal ke, gơtìp kòp kơn jơ̆, rềs àr lơh broă... nàng tam pà bal bơnah lơi bơta kal ke, dong kờl cau lơh broă wă rò sa tềp Dà lơgar Qúy Mão 2023 ram mhŭ, bơtòm tơrgùm bal. Tàm broă lơh, đoàn viên, cau lơh broă neh geh sền broă lơh đơs crih tam ya mờ ală dơ̆ bơyai lơh chờ hờp Đảng chờ hờp Nam pa, tìp mat lơh kwèng, ai ală phan geh khà jờng. Di dơ̆ do, Liên đoàn Lao động càr Dăk Lăk pà 5 nơm hìu ơm Ram mhŭ kông đoàn (50 tơlak đong dùl nơm hìu) ai ală hìu bơnhă kal ke bè hìu ơm in mờ pà 500 bơnah phan pà ai đoàn viên mờ cau lơh broă in.