Neh gơs bơta mờng, tŭ tus tàm rìng àng drim mờ rơhiơm mho, “Săp loa tiah nhàr dà lơgar” bơh Pôs ling sền gàr tiah nhàr dà lơgar Huổi Luông, gơwèt Mpồl ling sền gàr tiah nhàr dà lơgar càr Lai Châu mpong săp tàm gùt tiah nhàr dà lơgar. Broă lơh do neh geh tŭ ngui geh cồng nha tŭ kòp Kovid-19 gơtìp kal ke mờ geh lơh sùm tus tŭ do. Mìng mờ dùl nơm loa cèng tềng tê, dùl nơm USB neh geh lài ală tơngu me jơnau lam sồr bal mờ rơndeh Honda là kwang bàng sền gàr tiah nhàr dà lơgar gơtùi lòt tus ală tiah geh làng bol gam kis mờ lơh broă nàng lam sồr.

Đại uý Phan Thành Nam, Cíñ trị viên phó, pôs ling sền gàr tiah nhàr dà lơgar Huổi Luông pà git: Tàm tiah do mìng geh làng bol kòn cau Dao, Mông, Hà Nhì ơm kis. Ală tơngu me lam sồr neh geh ală kwang bàng sền gàr tiah nhàr dà lơgar sền sơwì mờ dà yoan pơgồp bal mờ dà kòn cau, di pal mờ bơta ngăc ngar, bơta git wă làng bol dê. Den tàng, cau lơi kung gơtùi wă mờ git ală tơngu me jơnau lam sồr mờ chờ hờp ngan pah tŭ “Săp loa tiah nhàr dà lơgar” geh pờ jơnau đơs. “Gơwèt mờ tơngu me jơnau đơs, gùng dà broă đơs lam sồr adăt sền gàr tiah nhàr dà lơgar, lơgar Việt Nam dê tàm do, bol añ neh cih lài tơngu me kờñ lam sồr, bơyai lơh bàr poh dùl dơ̆ tàm ală ƀòn tàm xã. Gùng dà broă lơh do geh cồng nha ngan, tài neh lam sồr geh ală tơngu me jơnau đơs tờm ngan tus mờ làng bol. Tàm tơngai tus, bol añ geh pơgồp bal mờ gơnoar atbồ xã, lơh jăt uă bơta rơlao ală broă lam sồr”.

Tài bơta lơh sa gơtìp kal ke, den tàng ờ di geh hìu nhă lơi kis tàm tiah nhàr dà lơgar kung geh blơi ti vi, ha là măi tíñ tơrbŏ bal mờ internet nàng kờñ sền jơnau tơngit. Rơlao mờ hơ̆ tai, loa pờ tơlik jơnau đơs gơtùi yal tơngit jơnau mpong ừng gùt pòt yờn, den tàng làng bol gơtùi nggui ơm tàm hìu, ha là lơh broă tàm suơn mìr kung gơtùi iăt sơl. Jŏ rơhời, broă yal jơnau tơngit bơh loa pờ tơlik jơnau đơs gơlơh bè neh gơs bơta mờng ờ gơtùi ờ geh gơwèt mờ làng bol kis tàm tiah nhàr dà lơgar dê.

Bi Trần Chỉnh Hoàng, kis tàm ƀòn A Sa Phìn, xã Huổi Luông, kơnhoàl Phong Thổ pà git: Bè hơ̆ sùm pah tŭ tus tàm ngai dơ̆ 7 mờ ngai rơlô pah poh, loa pờ tơlik jơnau đơs tàm ƀòn geh pờ nàng yal ală jơnau tơngit bè gùng dà broă lơh bơh Đảng, adăt boh lam bơh Dà lơgar dê. Tàm pơdar bal bàr poh dùl dơ̆ là tơngu me jơnau mblàng yal gơrềng tus mờ Adăt tiah nhàr dà lơgar, lơgar Việt Nam dê; ală broă lơh gơrềng bal tus mờ tiah nhàr dà lơgar, sền gàr gùng nhàr dà lơgar, ñjrong nhàr dà lơgar... tơngu me di pal, ờ jòng, ƀuơn wă den tàng cau lơi iăt kung git loh jơnau tơngit. “Làng bol kis tàm ƀòn bol añ neh git wă bè bơta kwơ bơh broă sền gàr gùng nhàr dà lơgar mờ bơta kwơ bơh gùng nhàr dà lơgar, dà lơgar dê. Làng bol kis tàm ƀòn lòt gam tềng ñjrong nhàr dà lơgar, gùng nhàr dà lơgar den kung pal yal mờ cau ling sền gàr tiah nhàr dà lơgar, nàng ală cau ling sền gròi mờ bơh tŭ hơ̆ làng bol kung wă loh làng rơlao bè gùng nhàr dà lơgar, ñjrong nhàr dà lơgar”.

Bal mờ ală dơ̆ mblàng yal tus tàm ală tiah, mblàng yal tàm loa pờ tơlik jơnau đơs xã dê, pôs ling sền gàr tiah nhàr dà lơgar Huổi Luông kung ai kwang bàng, cau ling tàm mpồl tus ală hìu nàng lam sồr tơn. Bơh tŭ hơ̆, dong kờl làng bol tơnguh uă jơnau rơcang lài mờ ală nùs nhơm ờ niam, sơgràm bơh ală cau pơrlơ̆ dră dê mờ ală bơta tìs. Lŏ Lò Thị Trưởng, làng bol kis tàm ƀòn Hồ Thầu, xã Huổi Luông, kơnhoàl Phong Thổ yal: “Tơngai do añ kung geh cau ling sền gàr tiah nhàr dà lơgar yal bè gùng nhàr dà lơgar, njrong nhàr dà lơgar. Añ neh git là, tiah nhàr dà lơgar là ờ gơtùi sơgràm phà. Là làng bol kis tàm tiah nhàr dà lơgar, añ sùm git là, pal bal mờ cau ling sền gàr tiah nhàr dà lơgar nàng sền gàr kơl jăp gơnoar tờm ù tiah, bơta lơngăp lơngai dà lơgar”.

Jăt Đại tá Lê Công Thành, Phó Cíñ ủy Mpồl ling sền gàr tiah nhàr dà lơgar càr Lai Châu yal, broă mblàng yal, yal tơngit, bơto bơtê adăt boh lam, tàm hơ̆ geh adăt tiah nhàr dà lơgar, lơgar Việt Nam bơdìh mờ broă geh lơh mờ broă lơh tơn tus 115 tiah pờ tàm càr, neh geh mờr 2 rơbô 500 nă kwang bàng là cau yal tơngit jơnau, cau mblàng yal adăt boh lam bơh kấp càr tus mờ kấp xã tus bal mblàng yal tơn. Broă mblàng yal geh pơgồp bal sùm mờ Mpồl duh broă yal tơngih, bơto bơtê adăt boh lam bơh ală kơnhoàl tàm 22 xã tiah nhàr dà lơgar. “Bơh broă bơyai lơh mblàng yal, yal nền nòn bè Adăt Sền gàr tiah nhàr dà lơgar, lơgar Việt Nam, jơnau git bơh làng bol tàm tiah nhàr dà lơgar kung neh gơguh loh làng. Mờ ală broă lơh mùl màl, geh cồng nha mờ uă bơta ală broă lam sồr den bol añ neh lam sồr nền nòn tus làng bol. Mờ bơta tờm ală cau kis tàm tiah nhàr dà lơgar kung neh git tơl bè Adăt sền gàr tiah nhàr dà lơgar, lơgar Việt Nam. Bơh tŭ hơ̆ gŏ là broă Quốk hội ai ngui Adăt sền gàr tiah nhàr dà lơgar, lơgar Việt Nam geh kwơ màng ngan tàm broă atbồ, sền gàr gơnoar tờm ù tiah, bơta lơngăp lơngai tiah nhàr dà lơgar tŭ do”.

Mờ ală broă lơh, broă mblàng yal bơceh pa, lơh geh cồng nha, làng bol ală kòn cau kis tàm do neh wă loh làng rơlao mờ bơta kwơ, bơta kwơ màng bơh broă prăp gàr, sền gàr gùng nhàr dà lơgar, njrong nhàr dà lơgar. Làng bol kis tàm tiah nhàr dà lơgar càr Lai Châu iang nùs lơh broă; pah nam tơmù khà hìu rơƀah rơlao 5%, bơta ờ niam tàm mpồl bơtiàn rơlao 10%. Bơh tŭ hơ̆, tơl nă cau neh, gam lơh ngan bal mờ kấp ủy, gơnoar atbồ xã lơh jăt niam kơnòl bơ̆t bơtàu, tơnguh bơtàu tiah nhàr dà lơgar, gàr niam bơta lơngăp lơngai cíñ trị, niam bơnĕ tiah nhàr dà lơgar.