Tàm pơrjum bơh Ủy ƀan Thường vụ Quốk hội dơ̆ 18 pa do, Củ tịc Quốk hội ồng Vương Đình Huệ sồr tơnkah, broă ai jơnau pơgồp bơh làng bol tàm jơnau rơcang cih Adăt Ù tiah (tam gơl) pal geh lơh mùl màl, geh cồng nha, pleh mờ lơh gời.

Broă ai jơnau pơgồp bal di gơlan geh lơh mờ sră nggal, bơyai lơh Pơrjum, cri bơyai; pal geh mùl màl, ngan ngồn mờ geh cồng nha, di pal mờ jơnau kờñ bơh làng bol dê. Bơh ală anih yal tơngit, uă kwang bàng, đảng viên bal mờ làng bol đơs là, tơngu me ai jơnau pơgồp bal bơh làng bol pal geh tơrgùm, tơrgùm tơl, di pal, niam mờ geh kơlôi sơnơng, iăt, yal mblàng loh làng, nền nòn nàng lơh gơs jơnau rơcang cih Adăt Ù tiah (tam gơl). Nghị quyết bơh Ủy ƀan Thường vụ Quốk hội dê sồr, tơnguh broă yal mblàng, lam sồr Làng bol tus bal pơgồp jơnau đơs.