Nàng rcang ai broă lơh sền sơ wì Rơndap broă lơh Adat Ù tiah (tam gơl) yal mờ Ủy ƀan Thường vụ Quôk hội in tàm pơrjum nhai 04 tus mờ tă pơgồp jơnau đơs dơ̆ 2, pơrjum dơ̆ 5, Quôk hội khoă 15, mho ngai 09/03, Thường trực Ủy ƀan Kiñ tế bơyai lơh dơ̆ lơh broă mờ Ƀộ Tài nguyên mờ Môi trường nàng iăt, kơno jơnau đơs bè tŭ tơngai lam lơh bơh Adat Ù tiah (tam gơl), ală broă gơlik geh tàm tŭ tă pơgồp jơnau đơs làng bol dê. Củ tịc Quôk hội ồng Vương Đình Huệ đơng lam dơ̆ pơrjum.

Jat jơnau yal bơh Ƀộ Tài nguyên mờ Môi trường, kờp tus ngai 06/03, jat khà kờp tàm website tă pơgồp jơnau đơs làng bol bơh Anih lơh broă cih jơnau, ờ hềt geh khà kờp bơh ală tiah dê neh dờp 7 rơbô 873 dơ̆ jơnau đơs tă pơgồp bal bơh 768 mpồl cau, cau dùl nă să tàm ală tơngume bơh jơnau rcang cih Adat dê. Bơh tơrgùm jơnau đơs tă pơgồp bơh ală anih lơh broă, mpồl cau, cau dùl nă să, uă jơnau đơs ring bal mờ ală tơngume tờm bơh jơnau rcang cih Adat, đơs jơnau rcang cih neh geh uă tam gơl pa, lơh geh jơnau kờñ, bơta kơ̆p kờñ bơh làng bol dê, ngui niam bơta pràn ù tiah ai bơtàu tơnguh lơh sa- mpồl bơtiàn in, pơgồp bơnah atbồ ù tiah niam, ngui ù tiah tềm pềr mờ geh cồng nha. Đơs pơndŭt dơ̆ lơh broă, Củ tịc Quôk hội ồng Vương Đình Huệ đơs sùm, broă tă pơgồp jơnau đơs làng bol dê pal lơh jat nùs nhơm dòn song, kơ̆ dơn, song dơ pă, khat gơboh mờ sac rơwah bơta ờ niam mờ lơh niam wơl, sền dờng màng tơl jơnau đơs dê. Củ tịc Quôk hội ring bal mờ ală jơnau đơs tàm dơ̆ lơh broă là, pal sền sơ wì ală broă lơh, jơnau đơs mờ jơnau dan. Tơnơ̆ hơ̆ sac rơwah bàr pe broă kwơ màng, ngan là ală broă gam geh jơnau đơs krơi is halà ờ hềt loh làng tàm jơnau rcang cih Adat dê nàng pơn jat tai bơyai lơh kơlôi sơnơng, tă pơgồp jơnau đơs, bơyai lơh cribơyai bal jrô rlau tai, nền nòn rlau tai.