Mho ngai 20/02, tă pơgồp jơnau đơs tàm Rơndap lơh Adat ù tiah (tam gơl), ală kwang bàng tàm Mpồl duh broă pơlam làng bol lơh tờm mờ adat boh lam, ală cau jak chài, cau kơlôi sơnơng bơh Ủy ƀan Mặt trận dà lơgar Việt Nam dê sồr lơh loh broă ai wơl ù nàng bơtàu tơnguh lơh sa- mpồl bơtiàn tài bơta kuơ dà lơgar, mpồl bơtiàn, mờ kung pal gàr niam bơta ring bal gơ wèt mờ cau geh ù gơtìp ai wơl.

Jat ală kwang bàng đơs, bơta geh ngan tàm broă ai wơl ù geh kal ke, bơta ờ niam lơh gơlik geh ală broă yal yă kal ke, gal cau, tài ờ hềt geh tơl sră nggal pơlam lơh jat jơnau cih adat boh lam, halà gam ờ niam bè jơnau git wă adat boh lam, bơta tàm pơgồp bal ờ hềt ring bal tàm anih lơh broă cíñ trị tàm tơl kấp. Bè hơ̆ den tàng, broă rơndap lơh, sră nggal tơm wơl, dong kờl, rơndap ƀòn ơm kis, ai wơl ù pal geh jơnau cih gàr niam ală kơrnuat pal jat, là: làng bol lơh tờm, loh làng, song dơpă, di mờ geh kơnòl mblàng lơh loh, gàr niam bơta kuơ dà lơgar, mpồl lơh sa kă bro mờ làng bol; geh uă jơnau đơs sồr lơh li la ală broă lơh tơm wơl; giă ù tơm wơl jat giă tàm drà kă bro, git loh làng ală bơnah priă tơm wơl, ală bơnah priă dong kờl; broă lơh tơm wơl, dong kờl, rơndap ƀòn ơm kis pa pal lòt lài dùl cơnđuà lài mờ tŭ geh kơrnuat ai wơl ù.