Tàm nùs nhơm gùt lơgar wă rò nam pa 2023 mờ nam pa Quý Mão mờr tus, Thủ tướng ồng Phạm Minh Chính chờ hờp mờ ngoh rơngăc ngan tus bal Broă lơh “Satềp tơrgùm bal – Nam pa tam klăc bal nam 2023” mờ kông ñân, cau lơh broă tàm càr Phú Yên – Ù tiah niam bơnĕ, geh uă bơhiàn kăc màng. Thủ tướng đơs tờm, do là broă lơh mùl màl, geh kwơ gơwèt mờ cau lơh broă di tàm satềp, wă rò nam pa geh kông đoàn ală kấp bơyai lơh.

Thủ tướng pà git, kông ñân tŭ do geh di pơgăp 14% khà kờp làng bol, 27% mpồl cau lơh broă tàm mpồl bơtiàn, pah nam ai geh rơlao 65% bơta kwơ phan geh lơh mpồl bơtiàn rơlao 70% khà tă tàm kes priă dà lơgar, bơta ngăc ngar, lơh broă, bơta git, bơta niam lơh sa mờ măi mŏk, jơnau git wă lơh jăt adăt boh lam ngai sơlơ geh gơguh mờ tơrgùm bal mờ dunia. Khà kông ñân geh bơta ngăc ngar uă, git bơta gơguh jăk Khoa họk kỹ thuật gơguh uă ngan. Tàm hơ̆, Thủ tướng ngoh rơngăc ngan geh git, tŭ kòp Kovid-19 gơtờp, jơh ală oh mi kông ñân neh lơh ngan, tam pà bal mờ ală kal ke bơh mpồl lơh sa kă bro, tus bal mờ gùt lơgar rơcang sơndră mờ kòp gơtờp. Tam gơl tus bơta bè ờs pa, oh mi kông ñân neh tus bal mơ tàm broă lơh, lơh broă ñhăp ñhar ngai mang nàng ală phan geh lơh cèng măt kă bro “made in Viet Nam” gŏ măt tàm drà kă bro tàm lơgar mờ dunia. “Añ pin dờn là, nùs nhơm ram do geh jăt jơng oh mi kông ñân, cau lơh broă rê mờ hìu nhă, rê tus ală ƀòn nàng lơh geh bal dùl satềp geh uă bơta kờñ gơboh mờ gơboh gơbài. Gam ală cau ờ geh tơl nàng rê hờ ƀòn kung geh wă rò dùl satềp chờ hờp, tơl, nàng jơh ală cau ndrờm geh Satềp hờm ram mờ ờ geh cau lơi gơtìp sơbì is hờ tơnơ̆”.

Thủ tướng đơs tờm, satềp ờs mờng dà lơgar geh kwơ màng ngan tàm rài kis nùs nhơm, là dơ̆ nàng tơl nă cau kòn lơgar Việt Nam dê wèt tus mờ tơngu rơyas, mò pàng, nàng geh tơrgùm bal mờ cau tàm hìu nhă, ai geh nùs nhơm chờ hờp, geh tai bơta pràn niam nàng mŭt nam pa mờ uă nùs nhơm pin dờn, jơnau kơ̆p kờñ, wèt tus ală bơta niam bơnĕ rơlao. Broă drơng satềp geh cèng bơta dong kờl kòn bơnus niam bơnĕ ngan, tơlik nùs nhơm tam klăc bal, dong kờl bal bơh jơi bơtiàn dà lơgar he dê.

Thủ tướng git wă, tam pà bal uă ngan tus mờ ală bơta kal ke, glar bòl bơh kông ñân mờ cau lơh broă tàm tơngai do. Tàm tơngai tus, Cíñ phủ geh lơh ngan lam sồr ală ƀộ, gah lơh broă dà lơgar, ală càr, ƀòn dờng sền gròi, ai geh bơta pràn di pal nàng bơsong ală broă tờm nàng tơnguh rài kis oh mi kông ñân, cau lơh broă in. Tàm hơ̆, tơrgùm lơh jăt pràn Rơndăp broă lơh 1 tơlăk nơm hìu ơm mpồl bơtiàn; mờ mhar geh broă lơh mùl màl, ngan ngồn lơh geh uă hìu ơm kông ñân in. Jơnau kờñ là nàng kông ñân, cau lơh broă geh dờp mùl màl cồng nha tơnguh bơtàu dà lơgar; nàng tơl nam pa satềp tus là ală tŭ geh tơrgùm bal gơboh gơbài bơh oh mi kông ñân, cau lơh broă mờ hìu nhă tờm dê. “Do geh là bơta pràn nùs nhơm pràn kơl dang ngan tơnơ̆ mờ satềp, oh mi tus wơl lơh broă mờ bơta pràn pa, lơh ngan lơh gơs niam ală jơnau kờñ geh ai, kơnòl, pơgồp bơnah bal tàm broă tơnguh bơtàu mpồl lơh sa kă bro, tơnguh bơtàu dà lơgar tài jơnau kờñ làng bol pas gơs, dà lơgar pràn kơl dang, lơh tờm, ring bal, gơguh jăk, nàng ală làng bol geh rài kis ngai sơlơ niam bơnĕ rơlao. Añ dan pơnyoa jơnau chờ gờm nam pa bal mờ ală nùs nhơm niam bơnĕ ngan tus jơh ală oh mi kông ñân, cau lơh broă tàm gùt lơgar. Chờ gờm tơl hìu nhă kông ñân, cau lơh broă geh satềp hờm ram, tơrgùm bal, bềng lìu bơta gơboh gơbài”.

Ala măt Kwang đơng lam Đảng, Dà lơgar, Thủ tướng pơyoa jơnau còp să đềt mềr mờ jơnau chờ gờm nam pa lơngăp lơngai, pràn kơl dang, pas gơs mờ pơn jờng, dờp mờ chờ gờm ală cồng nha mờ mpồl Kông đoàn, kông ñân, cau lơh broă gùt lơgar đơs bal, oh mi kông ñân càr Phú Yên đơs is neh lơh geh tàm ală nam do, pơgồp bal bơnah kwơ màng tàm cồng nha bal dà lơgar. Tàm broă lơh, Thủ tướng Cíñ phủ ồng Phạm Minh Chính mờ kwang đơng lam Tổng Liên đoàn Lao động Việt Nam, càr Phú Yên mờ Ủy ƀan Mặt trận Dà lơgar Việt Nam neh jào pà 220 pò phan satềp ai đoàn viên, kông ñân, cau lơh broă jăk mờ cau geh rài kis gơtìp kal ke in, kờp jơh khà priă geh di pơgăp 288 tơlăk đong.