Bol añ tus tàm tiah geh gal làng bol kòn cau Khmer ơm kis tàm xã Phương Thạnh, Huyền Hội, kơnhoàl Càng Long, càr Trà Vinh-do là tiah lài do gơtìp uă ngan ƀồm, mềm lơh aniai, tŭ do neh tam gơl niam. Gùng dă mờ cài, mờ bê tông niam, ală hìu geh lơh dờng niam ala mờ ală hìu tìm mờ nha lơ-u lài do. Ồng Thạch Ngọc Phương Thi, cau neh kis đềt mềr mờ ù tiah do bơh tŭ gam dềt pà git: “Lài mờ ngai tơnklàs dà lơgar, tiah do gơtìp kal ke ngan, bŭ lah ờ hềt tus 20 kơi sồ gùng, mơya kờñ lòt tus tàm drà kung pal roh dùl ƀùi. Mơya tŭ do mìng lòt 20 phút là tus mơ mờ kờñ lòt tŭ lơi kung di lơm tài gùng ờ mìng dờng ơnàng mờ tàm trồ mang kung geh đèng sòl àng tai”.

Tàm xã Đa Lộc, kơnhoàl Châu Thành, càr Trà Vinh, do là dùl tàm ală xã kal ke gơwèt Broă lơh 135 bơh Cíñ phủ lài do, tŭ do neh lơh gơs broă bơ̆t bơtàu ƀòn lơgar pa. Tŭ do, priă geh kờp bal dùl nă nă cau tàm xã là rơlao 53 tơlăk đong tàm dùl nam. Geh cồng nha bè tŭ do, dùl bơnah tài kơnờm mờ bơta ngăc ngar lơh sa bơh làng bol kis tàm do dê geh gơguh, tàm tŭ oh kòn ală hìu ờ hoan geh uă ù geh dờp mŭt lơh broă tàm kông ty, anih lơh broă den tàng geh sùm priă nhai. Bơdìh mờ ală broă dong kờl, ai tơl bơta niam tơnguh bơtàu lơh sa, ală mpồl lơh broă cíñ trị, mpồl bơtiàn lam lài là Mặt trận Dà lơgar sùm tus bal mblàng yal, tơrgùm mpồl tam klăc dờng gùt jơi bơtiàn kòn cau. Bơh tŭ hơ̆, mpồl bơtiàn ală kòn cau kis bal sùm tam pà, dong kờl bal bơh broă tơnguh bơtàu lơh sa hìu nhă tus mờ broă lơh jăt ală broă lơh ƀòn lơgar dê. Bơta kwơ màng rơlao là ờ di pal kơ̆p tus tàm tŭ neh pas gơs hơ̆ sồng dong kờl bal mờ làng bol neh rơcang dong kờl bal bơh ală tŭ gam gơtìp kal ke. Bơh tơnơ̆ mờ ngai Dà lơgar geh tơnklàs nam 1975, càr Trà Vinh neh mŭt bơsong mơ bơta hoàc huơr rài tam lơh lời wơl mờ kơ̆ kơl jăp lơh sa. Tus tŭ do, lơh sa càr dê pơn jăt tai tơnguh bơtàu kơl jăp, rài kis làng bol geh gơguh sùm. Bơh dùl càr geh mờr nggùl khà kờp làng bol gơwèt tàm mpồl rơƀah tàm nam sơnrờp crơng gơs wơl càr nam 1992, tyŭ do khà hìu rơƀah gơmù gam 0,56%; priă geh tơl nă cau rơlao 63 tơlăk đong tàm 1 nam. Broă bơ̆t bơtàu broă lơh geh lơh gơs sùm. Tus tŭ do gùt càr geh 80 tàm 85 xã geh khà ƀòn lơgar pa mờ geh 06 kơnhoàl geh tơl khà mờ lơh gơs kơnòl bơ̆t bơtàu ƀòn lơgar pa. Geh cồng nha do là kơnờm mờ broă đơng lam bơh Đảng, mpồl bơtiàn ală kòn cau kis tàm càr Trà Vinh sùm ngui bơhiàn tam klăc bal, sơlơ ngui bơhiàn khin cha jăk chài tàm rài tam lơh, ngai mang lơh ngan ai jơh bơta pràn lơh broă, bơ̆t bơtàu rài kis pa. Ồng Phạm Tiết Cường, Phó Củ tịc UɃMT Dà lơgar Việt Nam càr Trà Vinh đơs tờm: “Sơrlèt gan mờ ală tơngai kăc màng, làng bol ală kòn cau, ală gah, mpồl lơh broă neh lơh geh bơta pràn tơrgùm bal. Den jơnau bơsram tam klăc dờng gùt jơi bơtiàn kòn cau neh gơs jơnau bơsram sùm bơh Đảng ƀộ bal mờ làng bol càr Trà Vinh dê. Tàm tơngai bơ̆t bơtàu dà lơgar, đah Mặt trận mờ ală mpồl lơh broă cíñ trị, mpồl bơtiàn ală kấp, tus bal pơgồp bal lơh jăt, sền gròi ală broă lơh, rơndăp broă lơh; lơh jăt broă dong kờl gơwèt mờ cau geh màng mờ dà lơgar, cau rơƀah, cau ndrờm mờ rơƀah... pơgồp bal tàm broă bơ̆t bơtàu mpồl tam klăc dờng tàm càr”.

Mờ bơta pràn tam klăc ling klàng bal mờ làng bol, tam klăc jơi bơtiàn kòn cau geh lơh sùm, Jơnau kờñ bơh broă rơndăp lơh là tus nam 2030, gơguh lơh sa tơl tiah làng bol kòn cau tàm càr Trà Vinh geh ờ uă ngan bơh 6% tàm 1 nam rơlao hờ đang. Priă geh tơl nă làng bol kòn cau mờr ndrờm mờ bè ờs bal càr dê; tơmù khà hìu rơƀah gam hờ đơm 3%. Geh 70% khà xã tàm tiah geh gal làng bol kòn cau geh khà ƀòn lơgar pa gơguh uă. Tus nam 2030 geh 40% cau lơh broă kòn cau git lơh ală broă.

Nàng lơh geh ală jơnau kờñ do, bơdìh mờ broă ai jơh bơta pràn, càr geh lơh pràn tơl niam mpồl kwang bàng lơh broă, tam gơl lơh broă mờ tơnguh cồng nha atbồ dà lơgar bè broă kòn cau; bơ̆t bơtàu mờ lơh jăt ală rơndăp broă, broă lơh, broă dong kờl lơh jăt jŏ jòng broă kòn cau. Ồng Hà Thanh Sơn, Phó Ƀan Zân tộk càr Trà Vinh pà git: “Tàm tơngai tus, bol añ tơrgùm mblàng yal nàng dong kờl làng bol in git gơnoar tờm tàm broă tơnguh bơtàu lơh sa mpồl bơtiàn, nàng rài kis geh gơguh. Dơ̆ bàr bol añpơn jăt tai mờ ală sở, gah lơh broă lơh jăt niam tàm ală broă lơh, bơh broă rơwah, tơnpồ tus mờ broă sền gròi, jăt sền nàng lơh geh cồng nha”.