Di tàm dơ̆ sa tềp bơhiàn dà lơgar nam Qúy Mão 2023, Mpồl Cữ thập đỏ càr Dăk Nông pơgồp bal mờ ală cau dong kờl neh lòt jàu phan pà 1 rbô bơnah phan ai làng bol geh rài kis kal ke tàm ù tiah 2 kơnhoàl tiah sar lơgar ngài là Dăk Glong mờ Krông Nô in. Tơl bơnah phan kờp priă 500 rbô đong, ơn pơyua nùs nhơm, bơta sền gròi, tam pà bal bal mờ bơta kơ̆p kờñ jơh tơl nă cau, jơh tơl ală hìu bơnhă ndrờm geh sa tềp. Mờ tàm 5 kơnhoàl tàm càr dê kung bơyai lơh “Drà dong kờl kòn bơnus” pà ală bơta phan kờñ pal geh ai làng bol geh rài kis kal ke in. Mpồl bơyai lơh pà 1 rbô sră (kờp priă 600 rbô đong dùl sră) nàng làng bol in blơi is phan mờ he kờñ. Ală mpồl ala măt cau lơh broă càr Dăk Nông bơyai lơh Broă lơh “Sa tềp bơtòm tơrgùm- Bồ sơnam pa tam klăc bal” ai kông ñân, cau lơh broă geh rài kis kal ke in. Broă lơh neh jàu gĭt nđờ rhiang bơnah phan mờ kờp jơh priă 180 tơlak đong, dong ală cau tàm mpồl geh tai phan sa tềp.