Gùng mŭt tus ƀòn Bhôk, xã Yang Tao, kơnhoàl Lăk kloh niam, jăt bàr gah gùng geh lơh àr tam bơkào. Trồ mang, broă lơh ồs đèng àng tàm gùng ƀòn sơlơ lơh niam bơnĕ rơlao tàm ƀòn Bhôk. Rài kis làng bol tàm ƀòn kung neh rơhời gơguh, khà hìu rơƀah tàm nam 2022 gơmù 9 hìu pơn drờm mờ nam 2021. Jăt bi Y Al Trei, Phó Ƀí thư Ci ƀộ, kwang atbồ ƀòn Bhôk yal, lơh ală tam gơl do ndrờm geh mùl màl bơh Nghị quyết sồ 02 mờ Nghị quyết sồ 05 bơh Đảng ƀộ kơnhoàl Lăk ai, di pal mờ nùs nhơm kơ̆p kờñ bơh làng bol dê: “Añ là làng bol tus pơrjum nàng yal mblàng, lam sồr lơh jăt broă lơh, broă lơh bơh Nghị quyết sồ 02 là bơta lơi, hơ̆ sồng Nghị quyết sồ 05 là bơta lơi, tài Nghị quyết sồ 02 cih là bè do gùng dà geh ồs đèng àng mờ jăt bàr gah gùng làng bol tam bơkào, mờ Nghị quyết sồ 05 bơto sồr làng bol tam tờm chi sa plai, ròng rơpu, kơnrồ. Tơnơ̆ mờ pơrjum yal mblàng bàr, pe dơ̆ bè hơ̆, den he lòt yal mblàng, lam sồr tus tơl hìu mờ he yal mblàng mờ kông nghệ thông tin bơh faceook, bơh Zalo nàng làng bol in git loh làng rơlao”.

Nghị quyết sồ 02 mờ Nghị quyết sồ 05 bơh Ƀan cấp hàñ Đảng ƀộ kơnhoàl Lăk tơngai bơh nam 2020 tus 2025 gam geh lơh jăt ndrờm bal ală xã tàm gùt kơnhoàl. Tàm hơ̆, Nghị quyết sồ 02 bè tơrgùm hòi jà geh ală bơta pràn, nàng bơ̆t bơtàu mờ tơnguh bơtàu kơnhoàl Lăk gơs tiah lòt nhơl tờm càr Dăk Lăk dê tàm nam 2030. Nghị quyết sồ 05 bè lơh jăt broă tam gơl phan tam, phan ròng tơngai bơh nam 2021 tus 2025. Lơh jăt 2 Nghị quyết do, ƀòn Bhôk neh lơh rơlao 2 rơbô 500 thơ̆k gùng geh ồs đèng àng, tam 325 tòm bơkào jăt gah ală gơl gùng tờm mŭt tàm ƀòn. Kờp jơh priă bàr broă lơh do mờr 40 tơlăk đong geh làng bol tă is. Ƀòn Bhôk kung geh pà mờr 1 rơbô tờm chi sa plai ală bơta dong kờl hìu rơƀah in ờng nàng tam. Lŏ H’ Nguyệt Hatrơi, kis tàm ƀòn Bhôk pà git, ờ mìng pà tờm sơntìl, kwang bàng bơto pơlam broă lơh sa suơn sre gam tus tàm suơn nàng bơto sồr tàm broă tam mờ sơnka sền gàr nàng tờm geh hòn gơs niam: “Añ dan ưn ngài Đảng, Dà lơgar neh dong kờl hìu nhă añ geh sơntìl phan tam. Ồng atbồ ƀòn kung sền gròi ngan tus mờ hìu nhă añ. Añ lơh ngan sơnka sền gàr nàng tòm chi sa plai geh hòn gơs niam nàng tơnơ̆ do tăc geh priă ngui tàm rài kis”.

Jăt ồng Nguyễn Văn Huyên, Ƀí thư Đảng ủy xã Yang Tao, kơnhoàl Lăk yal, nàng ală gùng dà broă lơh bơh Đảng mŭt tàm rài kis, kwơ màng ngan kung gam là kwang bàng. Tàm hơ̆ uă ngan là tàm tiah làng bol kòn cau, di lah kwang bàng wă, đềt mềr mờ làng bol, bơceh pa tàm broă lơh den geh pơgồp bal mhar tàm broă ai Nghị quyết bơh Đảng tus mờ làng bol. “Tŭ do ală kwang bàng Đảng viên gam kơnòm să bè bi Y Al Trei ndrờm là kwang atbồ ƀòn. Tàm broă sền gròi broă lơh bi do dê sùm tơnguh gơnoar kơnòl mờ kung lơh jăt niam broă lơh bơh xã dê. Pa do lơh jăt Nghị quyết sồ 05 mờ Nghị quyết sồ 02, tơrgùm 2 Nghị quyết do tus ai ală kwang bàng atbồ ƀòn mờ Ci ƀộ đơng lam mờ hòi jà jơh ală bơta pràn, hơ̆ sồng jào ƀòn in lam sồr làng bol tă priă nàng tam bơkào, hơ̆ sồng lơh ồs đèng àng tàm gùng, pa do den ƀòn Bhôk neh lơh gơs ồs đèng àng tàm gùng, làng bol ring nùs bal ngan”.

Ală Đảng viên kòn cau ñhăp ñhar bè bi Y Al Trei gam pơgồp bal kwơ màng tàm broă yal mblàng, ai gùng dà broă lơh bơh Đảng, adăt boh lam bơh Dà lơgar tus mờ làng bol, rơhời dong kờl làng bol tam gơl nùs nhơm, bồ tơngoh kơlôi sơnơng tus mờ broă lơh nàng bơ̆t bơtàu rài kis ngai sơlơ niam bơnĕ rơlao.