VOV4.K’ho - Ồng Trịnh Quang Trí, Kuang atbồ anih tờm gròi sền kòp tê jê să càr Dak Lak pà gĭt, 56 nă cau F1 bơh cau kòp sồ 15921 tàm càr Dak Lak neh geh cồng nha xét nghiệm dơ̆ sơnrờp ờ gŏ mờ virus Sars CoV-2.

Cau kòp sồ 15921 geh dờp tàm càr Dak Lak tàm ngai 28 nhai 6, geh tŭ rê bơh ƀòn dờng Hồ Chí Minh tus càr Dak Lak. Gơrềng tus mờ cau kòp do, lài ngan, gah lơh sơnơm neh pơgồp bal mờ gơnoar atbồ ƀòn lơgar jòi cau neh tìp rềp, ai gĭt geh 56 nă cau neh tìp rềp (F1), tàm hơ̆ geh: 28 nă cau pròc mhàm, jơi nòi, ƀòn bal; 4 nă kuang bàng lơh sơnơm; 20 nă cau đì bal tàm rơndeh rê bơh ƀòn dờng Hồ Chí Minh tus càr Dak Lak; 4 nă cau ơm bal tàm hìu tàm xã Vĩnh Lộc A, kơnhoàl Bình Chánh, ƀòn dờng Hồ Chí Minh. Tus tŭ do, jơh 56 nă cau pa yal do ndrờm geh tam cah is tơrgùm bal mờ ai phan xét nghiệm virus Sars CoV-2 dơ̆ sơnrờp mờ ai cồng nha ờ gŏ mờ kòp.

Cau mblàng Ndong Brawl