VOV4.K’ho - Tơnơ̆ mờ 28 ngai sơm kòp Covid-19 tàm hìu sơnơm kòp jòr bơsiă gơlĭk mhàm mờ kòp klờm soh càr Dak Lak, drim òr (08/06) bàr nă cau kòp Covid-19 sồ 3237 mờ 3334 neh geh rê bơh hìu sơnơm tơnơ̆ mờ 3 dơ̆ xét nghiệm ờ gŏ mờ virus Sars CoV-2.

Bàr nă cau kòp do ndrờm kis tàm gùng dềt 189/1, gùng Mai Hắc Đế, sơnah ƀòn Tân Thành, ƀòn dờng Buôn Ma Thuột. Tơnơ̆ mờ 28 ngai sơm, bơta pràn kơl dang să jan bàr nă cau kòp neh ring niam mờ 3 dơ̆ xét nghiệm pa do ndrờm pà gŏ cồng nha ờ gŏ mờ virus Sars CoV-2.

Tơnơ̆ mờ tŭ rê bơh hìu sơnơm, bàr nă cau kòp do geh pơn jăt tai sền gròi bơta pràn kơl dang să jan tàm ƀòn ơm kis tơnơ̆ mờ tơngai sơm kòp Covid-19 di jăt mờ kơrnoăt bơh Bộ Y tế ai. Bè hơ̆, kờp tus ngai òr (08/06), càr Dak Lak gam 2 nă cau gơtìp kòp Covid-19 gam geh tam cah is mờ sơm kòp tàm hìu sơnơm kòp jòr bơsiă gơlĭk mhàm mờ kòp klờm soh càr Dak Lak.

Cau mblàng Ndong Brawl