VOV4.K’ho- Tus tŭ do, 4 tàm 5 nă cau kòp Covid-19 tàm dơ̆ gơtìp kòp dơ̆ 4 tàm càr Dak Lak neh rê bơh hìu sơnơm. Pal kah ngan, tàm khà 4 nă cau kòp do, geh cau kòp Covid-19 dơ̆ 3836 gơtìp kal ke ngan pal tă nhơm mờ măi ờ gơmŭt mờ crăp ding tă nhơm. Broă pràn wơl bơh cau kòp do neh cèng bơta pơn dờm pơn diang dờng màng ngan ai ală cau lơh sơnơm in tàm broă sơndră mờ kòp Covid-19.

Cèng pang sră jơh piam kòp tềng tê tơnơ̆ mờ 41 ngai sơm kòp Covid-19, bi V.Đ.D, deh nam 1971, tàm sơnah ƀòn Đạt Hiếu, thị xã Buôn Hồ, càr Dak Lak chờ hờp ngan mờ sùm đơs jơnau ưn ngài tus mờ mpồl bác sĩ neh sơm kòp, sền gàr bi in tàm tơngai do.

 Cau gơtìp kòp Covid-19 sồ 3836 tàm ală ngai gơtìp kòp jroă ngan

Bi D pà gĭt: Tŭ gĭt să tờm gơtìp kòp Covid-19 bi ngòt rơngơ̆t ngan, ờ sŭk ngan rơlao tai tŭ kòp geh tơngŏ jroă. 1 poh geh sền gàr nền nòn mờ uă phan lơh sơnơm geh tơmŭt tàm să, geh tŭ jơh gùt să gơtìp jê, tă nhơm kal ke lơh bi gơtìp tàm bơta ờ gĭt bơta lơi. Mơya, geh broă lam sồr, sền gàr di tŭ bơh mpồl bác sĩ, bi neh sơrlèt “bơta chơ̆t” nàng rê wơl mờ hìu nhă bal mờ mpồl bơtiàn: “Tŭ tă nhơm mờ măi gơtìp jroă ngan là nùs nhơm ờ sŭk ngan, kung gơlơh ngòt rơngơ̆t sơl. Tŭ tă nhơm gơlơh ờ sŭk ngan, mơya tài geh sùm ală bác sĩ lam sồr, tam pà bal mờ lơh ngan sơrlèt mờ bơta kal ke hơ̆. bơdìh mờ broă lơh tờm den pah ngai rơcang piang, pòr, dà toh nền nòn ngan. Dan ưn ngài mpồl y bác sĩ neh sơm kòp añ in tàm tơngai pa do”.

Bi D gơs cau kòp Covid-19 dơ̆ 3836 tàm ngai 15 nhai 5 nam 2021. Bi là F1 bơh cau kòp 3052 tàm kơnhoàl Thuận Thành, càr Bắc Ninh dê. Tài gơtìp tam gơl să bơh kòp Covid-19 tàm lơgar Ấn Độ, den tàng bơta pràn kơl dang să jan bơh bi dê geh ală bơta tơngŏ ni sơna. Bác sĩ Châu Đương, Kuang atbồ hìu sơnơm kòp jòr bơsiă gơlĭk mhàm mờ kòp klờm soh càr Dak Lak pà gĭt: Nàng sơm kòp ai cau kòp 3836 in, hìu sơnơm neh pal kơnờm mờ broă dong kờl bơh mpồl bác sĩ tus bơh hìu sơnơm tiah Tây Nguyên mờ hìu sơnơm Chợ Rẫy ƀòn dờng Hồ Chí Minh bal mờ uă phan măi mŏk tàm broă sơm kòp tai. Bal mờ hơ̆, pah ngai, hìu sơnơm kung neh tơrgùm jơh khà kờp, khà tơngŏ bơh cau kòp ai mpồl sơm kòp Covid-19 dà lơgar in sền nàng gĭt kòp.

Cau kòp Covid-19 sồ 3836 pà bơkào ưn ngài mpồl bác sĩ neh sơm kòp, sền gàr tàm 41 ngai

Broă lơh ngan bơh mpồl y bác sĩ neh cèng geh cồng nha niam, tus ngai 17 nhai 6, cau kòp sồ 3836 neh geh cồng nha xét nghiệm ờ gŏ mờ virus Sars CoV-2 sơnrờp ngan. Tus ngai 25 nhai 6 tơnơ̆ mờ  3 dơ̆ xét nghiệm ờ gŏ mờ kòp pơn jăt sùm, cau kòp neh rê bơh hìu sơnơm. Tam pà bè broă sơm kòp ai cau kòp sồ 3836 in, bác sĩ Châu Đương pà gĭt: “Cau kòp do là dùl tàm ală cau kòp jroă ngan, cau kòp do mŭt piam kòp tàm ngai 14 nhai 5, 3 ngai tơnơ̆ tam gơl mhar ngan, cau kòp gơs jroă mờ kal ke ngan, den hiù sơnơm neh geh mpồl sơm kòp bơh hìu sơnơm tiah Tây Nguyên tus ai tă nhơm mờ măi mờ jồr mhàm sùm. Tus ngai 24, mpồl sơm kòp bơh hìu sơnơm Chợ Rẫy pơn jăt tai tus dong kờl. Tơnơ̆ mờ 7 ngai sơm kòp den cau kòp gŏ geh tơnguh, cau kòp geh ơm ờ jồr mhàm, ờ ngui măi tă nhơm mờ tơnơ̆ mờ hơ̆ là tă tơn măi tă nhơm. Cau kòp do gơtìp jroă mhar ngan, mơya pràn wơl kung mhar sơl”.

Ồng Nguyễn Văn Hùng, Phó kuang atbồ sở Y tế càr Dak Lak pà gĭt, bơh tŭ kòp Covid-19 gơtìp tus tŭ do, càr Dak Lak neh rơlao 2 dơ̆ sơm kòp ai cau kòp Covid-19 in mờ 8 nă cau kòp. Mơya, bơta gơtìp jroă mờ cau kòp sồ 3836 là cau sơnrờp ngan bơh gah lơh sơnơm càr Dak Lak dê gơtìp. Tàm bôta phan lơh broă, măi mŏk ngan ờ tơl, mpồl bác sĩ ờ hềt geh broă mờng chài, broă sơm kòp geh cồng nha ai cau kòp sồ 3836 in là bơta chờ bơh mpồl cau lơh sơnơm sơm kòp tàm hìu sơnơm kòp jòr bơsiă gơlĭk mhàm mờ kòp klờm soh dê, mờ kung là bơta niam nàng ală bác sĩ tàm càr geh tìp, tam gơl bal broă mờng chài tàm broă lơh: “Mờ broă sơm kòp geh cồng nha cau kòp do, den neh lơh ală oh mi tàm gah lơh sơnơm in geh uă ngan bơta mờng chài. Mùl màl mờ đơs den bè broă lơh tờm hồi sức tích cực den geh bơsram 3 nam, mơya tŭ rê ờ tìp mờ cau kòp bè do, ờ lơh broă den ờ gĭt. Bơh ală oh mi geh broă lơh jăk chài ngan bơh khoa hồi sức do dê den he kung geh bơsram bal. Bè tŭ geh dùl bơta tơngŏ tam gơl tàm măi sền gròi cau kòp den ală cau gĭt tơnguh sơnơm, tơmù sơnơm nàng di pal. Do là broă mờng chài kuơ màng ngan”.

Kờp tus ngai do neh sơm bời 7 tàm 8 nă cau kòp covid-19 bơh 2 dơ̆ gơtìp kòp. Ală dà kơl hề bơh mpồl y, bác sĩ gơlĭk tus tŭ do ndrờm geh bơsal wơl di pal mờ cồng nha neh cèng geh ai cau kòp in.

Cau cih Nam Trang- Cau mblàng Ndong Brawl