VOV4.K’ho - Dờp git geh bơnga\ mờ kơnòl tàm lơh sa ka\ bro phan sa niam ngan ờ do ờ da\, cau tàm mpồl cau ùr càr Dak Lak neh geh ua\ broa\ lơh geh cồng nha tàm broa\ ‘’đơs ờ mờ phan sa bơ\’’. Bơh hơ\ geh pơ gồp lơh tam gơl git wa\ bơh làng bol tàm broa\  lơh sa mờ ka\ bro phan sa’’.

             Tơnơ\ rlau 1 nam geh ai sra\ dờp la VietGAP mờ gơs la anih ai biap, plai sa ris,  niam ngan ai ròt siêu thị Thành Phát tàm [òn dờng Buôn Ma Thuột, lo\ Nguyễn Thị Lý ơm tàm thôn 2, xã Ea Kao, [òn dờng Buôn Ma Thuột, càr Dak Lak neh geh drà ka\ bro niam sùm ai ba\ ù tam biap hìu nha\ dê.

            Lo\ Lý ai git, lài do biap geh tam ua\ ngan mơya kan ngan geh tac jơh. Tơnơ\ tu\ tơngai jòi wa\,  bơsram bơta mờng bơh ala\ broa\ lơh, lo\ Lý neh lam sồr ờ ua\ oh mi cau ùr crơng gơs Tổ hợp tác biap niam ngan Thuận An mờ 8 na\ cau tus bal, tam  2 lồ ù biap ala\ bơta.

            Tus bal tàm tổ hợp tác, ala\ cau tàm mpồl geh bơsram bè bơta lơh sa mờ broa\ sơng ka biap jat khoa học, tam biap tàm hìu jàl, ờ ngui ala\ bơta sơnơm tu,  sơnơm lơh dờng biap. Jat lo\ Lý,  tơl sào biap gơ ai tơnhàu pah nam  pơgap di 30 tơlak pria\, jơnhua rlau mờ ua\ bơta chi tam ndai,  broa\ ka\ bro  biap den bươn mờ niam:

             Ai lòt bơsram den a` kung pal lơh ngan bơsram ua\ tài bơh biap do  tu\ he tam den he geh tuh phơng vi sinh mờ ala\ bơta phơng kuơ màng ndai. Sơnơm tu den a` ờ ngui, mờ tu\ do  mìng ngui dà plang lơm nàng biap sa he dê gơ ờ khih. Bè tu\ do,  den dùl ngai a` tac geh 80 kg biap, den bơh kàl hơ\ biap tac la gam ờ tơl, a` ờ hềt geh tơl biap  nàng tac. Tus do kung kờ` geh tơmut cau ndai tai bal nàng tam biap gơ in tơl.

             Tàm kơnhoàl Cư\ Mgar, càr Dak Lak, lơh jat dơ\ lam sồr ‘’Cau ùr lòt bal mờ phan sa ngan ờ do ờ da\’’, tàm nam 2018, Mpồl tam klac cau ùr kơnhoàl neh lam sồr ala\ mpồl hờ đơm  mut lơh broa\ lơh yal tơnggit bè phan sa ờ do ờ da\ ngan mờ bơyai lơh ai oh mi cau ùr in tus bal lòt sền ờ ua\ broa\ lơh tam chi, ròng phan geh cồng nha. Bơh hơ\, neh dong kờl crơng gơs geh 53 broa\ lơh ‘’Lơh gơs phan sa ngan niam ờ do ờ da\’’ mờ 22 broa\ lơh neh geh lơh bal mờ lơh geh drà ka\ bro phan lơh geh.

             Mpồl kung neh lơh geh broa\ lơh lòng lài ‘’Tổ hợp tác tam biap niam ngan ờ do ờ da\ tàm thị trấn Ea Pốk’’ mờ 11 na\ cau tus bal. Mò Hà Thị Hương, Chủ tịch mpồl tam klac cau ùr kơnhoàl Cư\ Mgar ai git,  bơh  ala\ broa\ lơh mpồl dê,  ua\ cau  tàm mpồl neh geh bơto bơtê broa\ lơh, geh git wa\ ngui ala\ bơta jak chài pa tàm broa\ lơh sa,  pin dờ`  bơtàu tơngguh bơta pràn mut lơh geh jơnau sơnơng. Bơh hơ\,  git wa\ bơh ua\ cau tàm mpồl neh geh tam gơl, pơ gồp bal lơh tam gơl niam sơnơng lơh sa mờ ngui phan sa kloh, ờ do ờ da\ tus pràn sa\ ja`:

             Tu\ do, làng bol kung neh git wa\ jơnhua ngan  tài bơh khi kung kờ` ngui ala\ phan sa ngan niam ờ do ờ da\. Tiah lơi lơh geh phan ngan, ờ do ờ da\ den khi  ờ ngòt kas mờ khi kờ` sền tus phan bơkah bơnga den tàng hơ\ la dùl broa\ lơh chờ ngan tus broa\ lòt bal bơh cau ur mờ ala\ phan sa ngan ờ do ờ da\.

             Jat mpồl tam klac cau ùr càr Dak Lak, tàm nam pa do,  ala\ kấp mpồl cau ùr tàm càr neh crơng gơs 23 hợp tác xã, tổ hợp tác, tổ lơh broa\ bal lơh sa lơh geh phan sa niam ngan ờ do ờ da\, lik mat 234 broa\ lơh ‘’Cau ùr mut lơh niam ngan ờ do ờ da\ phan sa’’.  Lam sồr geh  rlau 98.700 anih lơh sa ka\ bro dan cih mat mut lơh  ờ do ờ da\ phan sa, lam sồr rlau 289 rbô cau tàm mpồl dan cih mat mut lơh 10 jơnau pơrgon biàng bè broa\ ngui phan sa ngan niam ờ do ờ da\, dong kờl 805  na\ cau tàm mpồl bơt bơtàu  ala\ broa\ lơh mut lơh broa\, mut lơh ka\ bro bè phan sa niam ngan ờ do ờ da\ mờ kờp jơh khà pria\ dan cih mat  rlau 12 tơmàn pria\. Mò Trần Thị Phong, Phó Chủ tịch mpồl tam klac  cau ùr càr Dak Lak đơs tờm,  geh cồng nha do neh ai go\ bơta tam gơl loh ngan tàm git wa\ mờ broa\ lơh bơh làng bol tus mờ bơta phan sa ngan niam ờ do ờ da\:

            Mờ ua\ ngan broa\ lơh bơceh bơh oh mi cau ùr bơh hờ đơm tus mờ khà càr den  kung neh gơ cèng cồng nha niam ngan. Geh ua\ ngan broa\ lơh lơh sa ka\ bro, bơceh lơh geh lơh  mờ  broa\ lơh la oh mi geh ngui  phan sa kloh niam neh geh gơ rề ua\ ngan. Bơh mùl màl oh mi cau ùr tàm [òn lơgar den go\ la dilah he tam phan sa niam ngan  ờ do ờ da\ den  phan hơ\  ngan la geh ka\  bro gơtùi mờ ờ ngòt ờ geh cau blơi.  Bơh broa\ lơh mùl màl la bè hơ\ neh lơh geh ua\ ngan  broa\ lơh, ai go\ bơta tam gơl broa\ lơh, kờp bal bơta tam  gơl broa\ ka\ bro, ngui phan sa kloh kung geh tam gơl sơl.

             Tơnơ\ rlau 1 nam mut lơh, broa\ lơh ‘’Cau ùr lòt bal mờ phan sa niam ngan ờ do ờ da\’’ tàm Dak Lak neh chồl guh geh  bơta niam. Ala\ broa\ lơh bè phan sa niam ngan ờ do ờ da\ bơh cau ùr neh gơ cèng wơl cồng nha niam, lơh geh ala\ phan sa niam ngan ờ do ờ da\ drơng bơta kờ` ngui ai làng bol in. Bơh hơ\ git wa\ mờ broa\ rwah phan sa niam ngan ờ do ờ da\ tus mờ pràn sa\ ja` bơh làng bol rhời neh geh tam gơl, pơ gồp bal tàm broa\ sền gàr pràn kơldang sa\ ja` mpồl bơtìan.

          Cau mblàng K’ Brọp