VOV4.K’ho- Jơnau yal bơh Mpồl đơng lam rcang sơndră kòp Covid-19 càr Dak Lak dê, mho ngai 19/7, càr do sền gŏ tai 6 nă cau bơtờp mờ virus Sars CoV-2 tàm ƀòn dờng Buôn Ma Thuột mờ ală kơnhoàl  Ea H’leo, Cư Kuiñ, Krông Pách. Kơnhoàl Ea H’leo sền gŏ tai 3 nă cau kòp, ndrờm là cau F1 bơh bi Q.C.T., mờ L.T.H., ơm bal tàm thôn 2B, xã Ea H’leo, kơnhoàl Ea H’leo neh geh gah lơh sơnơm càr Dak Lak sền gŏ bơtờp mờ virus Sars CoV-2 tàm bồ jiơ mho ngai 19/7, là cau tàm dùl hìu bơnhă bal mờ ùr bơklau bi T, bi H dê.

Test mhar ală cau F1 tàm kơnhoàl Ea H’leo

Tiah kòp pa sền gŏ mho ngai 19/7 geh bơta lòt rê geh gơrềng tus càr Bình Dương, là bi H.K.A, deh nam 1996 ơm tàm thôn Thạch Lũ, xã Ea Yông, kơnhoàl Krông Pách. Bi A, ơm ing tàm tiah ơm kis bal An Bình, sơnah ƀòn An Bình, ƀòn dờng Dĩ An, càr Bình Dương. Tơnơ̆ tŭ sền gŏ cau kòp, gah lơh sơnơm càr Dak Lak neh pơgồp bal mờ ală tiah nàng jòi gĭt tiah lòt rê mờ ală cau ơm rềp mờ bi A tàm tŭ bi do rê bơh Bình Dương tus Dak Lak; ƀồm sơnơm lơh kloh khuẩn tiah ơm kis tàm hìu sơnơm xã Ea Yông.

Cau mblàng K’Hạnh