VOV4.K’ho- Jat jơnau yal bơh Mpồl đơng lam rơcang sơndră kòp Covid-19 càr Dak Lak dê, cau bơtờp kòp pa git gŏ tàm càr là bi T.V.X (deh nam 1976, ơm kis tàm thôn 5, xã Cư Mốt, kơnhoàl Ea H’leo, càr Dak Lak).

Bi T.V.X kup rơndeh nac rê hờ Dak Lak, mơya tŭ đì rơndeh bi T.V.X geh pơn chèu glòm muh mat mờ ờ boh bơr mờ cau lơi tàm rơndeh. Drim ngai 05/7, tơnơ̆ tŭ mù bơh rơndeh tàm kơi sồ 92, gùng dờng 14, bi T.V.X đì is rơndeh măi rê hờ Hìu sơnơm xã Cư Mốt yal bè tiah lòt rê, mờ rê hờ hìu tàm mìr tàm thôn 5, xã Cư Mốt tam cah is tàm hìu mờ ờ ơm rềp, boh bơr mờ cau lơi. Tus ngai 06/7, bi T.V.X duh să dùl êt, ntas muh, hòr dà muh neh hòi điện thoại hìu sơnơm xã in mờ geh pơlam sồr lòt tus Hìu sơnơm kơnhoàl Ea H’leo nàng kham. Bơh xét nghiệm test mhar ai cồng nha bơtờp mờ virus Sars CoV-2. Tơnơ̆ hơ̆, ai mẫu lơh xét nghiệm mờ broă lơh RT-PCR ai cồng nha bơtờp mờ virus Sars CoV-2.

Cau mblàng K’Duẩn