VOV4.K’ho- Dờp bal jơnau hòi jà gùt làng bol lơh ngan sơndră mờ kòp Covid-19 gơtờp, bal mờ gùt lơgar, làng bol kis tàm càr Dak Lak kung gam lơh ngan tă priă, dong kờl kes priă blơi sơnơm vaccine mờ ală broă sơndră mờ kòp gơtờp. Uă mpồl lơh broă, mpồl lơh sa kă bro mờ làng bol, bŭ lah gam gơtìp mờ ală kal ke tàm broă lơh sa, kă bro mờ rài kis, mơya kung gam rơcang tus bal pơgồp bal bơta pràn bal mờ phan bơta tài mpồl bơtiàn.

Sơnam neh dờng mờ ờ wă bè broă ngui điện thoại ngăc ngar, ồng Y Tuaih Niê, kòn cau Rơđê, kis tàm sơnah ƀòn Ea Tam, ƀòn dờng Buôn Ma Thuột, càr Dak Lak neh sồr kòn ùr bơto nàng tă dùl khà priă dong kờl tàm kes priă blơi sơnơm vaccine sơndră mờ kòp Covid-19.

 Uă mpồl lơh broă bal mờ cau dùl nă să is neh tă priă dong kờl tàm kes priă blơi sơnơm vaccine bal mờ phan sơndră mờ kòp gơtờp

Ồng Y Tuaih yal, sền jơnau yal tàm sră ƀăo, ồng neh gŏ bơta ngòt rơngơ̆t bơh kòp gơtờp bal mờ broă kal ke bơh ală y bác sĩ lơh broă tàm tiah sơnrờp tam dră mờ kòp gơtờp. Ồng kung kờñ pơgồp bơnah dềt nàng bal mờ gùt lơgar tam dră mờ kòp Covid-19: “Tăc pơgồp bal tàm kes priă blơi sơnơm vaccine sơndră mờ kòp Covid-19 den añ pơn jờng ngan mờ kờñ bal. Tài tàm hơ̆ kung kuơ màng là kờñ sền gàr bơta pràn kơl dang să jan mờ sơndră mờ kòp Covid-19”.

Ờ mìng nhắn tin dong kờl bơh tàm điện thoại, ồng Phan Quang Vũ, Phó kuang atbồ công ty cổ phần hìu măi pờ tơlĭk ồs đèng Buôn Đôn pà gĭt, dờp bal jơnau hòi jà bơh Ủy ban Mặt trận dà lơgar Việt Nam càr Dak Lak, công ty neh lam sồr jơh ală kuang bàng, cau lơh broă tă geh 50 tơlăk đong nàng dong kờl tàm broă sơndră mờ kòp gơtờp. “Dờp bal jơnau hòi jà bơh gùt lơgar tus bal, tă pơgồp bal bơta pràn sơndră mờ kòp Covid-19 den công ty kung neh lam sồr tơl nă kuang bàng, cau lơh broă tă 1 ngai priă nhai, mờ is công ty geh tă bơh kes priă broă lơh geh kuơ mờ priă is bơh công ty dê. Kuang bàng, cau lơh broă kờñ bal ngan mờ broă tă priă do, geh uă cau neh tă is tai bơdìh mờ kơrnoăt geh ai bơh công ty dê. Kung kơ̆p kờñ kòp gơtờp mhar jơh, tơl nă cau pal gĭt jơnau bal nàng gờñ klàs mờ kòp gơtờp do”.

Ờ mìng tă priă pơgồp bal tàm broă blơi sơnơm vaccine, uă mpồl lơh broă gam tă tàm kes priă sơndră mờ kòp tàm càr

Gam jăt ồng Vũ Đình Tân, Kuang atbồ công ty Cổ phần ồs đèng càl Trung Nam Dak Lak yal, ờ mìng tă pơgồp tàm kes priă blơi sơnơm vaccine, mpồl kuang bàng đơng lam Tập đoàn neh đơng lam ală mpồl lơh broă bal dong kờl broă sơndră mờ kòp tàm ală tiah gam lơh jăt rơndăp broă lơh. Mìng is tàm càr Dak Lak, Tập đoàn neh tă 1 tơmàn đong nàng dong kờl priă blơi sơnơm vaccine mờ phan sơndră mờ kòp gơtờp. “Gơwèt mờ Chính phủ den pa do tập đoàn Trung Nam kung neh dong kờl ai Chính phủ 1 tơlăk dolar bè broă blơi sơnơm vaccine sơndră mờ kòp Covid-19. Gam gơwèt mờ càr den tŭ do Tập đoàn kung geh đơng lam ai ală công ty tàm mpồl bal là kung pal geh kơnòl, bơdìh mờ broă dong kờl sơnơm vaccine den công ty geh pơn jăt tai dong kờl”.

Jăt ồng Lê Xuân Sương, Phó Chủ tịch Thường Trực Ủy ban mặt trận dà lơgar Việt Nam càr Dak Lak yal, mìng tơnơ̆ mờ 1 poh pơyoa jơnau hòi jà lam sồr dơ̆ sơndră mờ kòp Covid-19, tập đoàn neh dờp geh rơlao 5 tơmàn 100 tơlăk đong bơh ală mpồl lơh broă, cau dùl nă să bal mờ mpồl lơh sa kă bro tă pơgồp, dong kờl. Bơh tàm khà priă tă pơgồp do, càr geh rơndăp broă tam pà blơi sơnơm vaccne, phan lơh broă dong kờl tiah sơnrờp tam dră mờ kòp gơtờp. “Tŭ lam sồr ală dơ̆ đơs bal geh broă tus bal gal ngan. Mơya tàm bơta kòp gơtờp, broă kă bro kal ke ngan, mơya mờ nùs nhơm tài mpồl bơtiàn, ală mpồl lơh sa kă bro, ngân hàng, ală cau geh nùs nhơm niam bal mờ ală hìu kă bro tă priă kung bè phan bơna. Bơdìh hơ̆ tai, ală làng bol, uă cau geh rài kis rơƀah ngan, mơya kung gam tă priă bơh tàm hìu nhă sơl nàng pơyoa tus tàm tiah gơtìp kòp in, geh tŭ ờ geh priă den pơyoa ală phan”.

Tàm dơ̆ gơtờp kòp do, càr Dak Lak geh dờp 4 nă cau gơtìp mờ kòp Covid-19. Bŭ lah gam pal gơtìp mờ ală kal ke tài gơrềng bơh kòp gơtờp, mơya làng bol, mpồl bơtiàn bal mờ mpồl lơh sa kă bro tàm càr Dak Lak do gam dùl nùs pơgồp bal nàng gờñ kơrian mờ kòp gơtờp.

Cau cih H Xíu-Cau mblàng Ndong Brawl