VOV4.K’ho- Broă tơnguh bơtàu cau tus bal blơi bảo hiểm mpồl bơtiàn is tàm kơnhoàl Lăk, càr Dak Lak neh geh ală broă lơh gơguh jăk niam. Uă làng bol neh tam gơl jơnau gĭt wă mờ sơn đờm tus bal jòi nàng gĭt, tus bal blơi sră bảo hiểm mpồl bơtiàn lơh is.

Mò Đào Thị Vượng, 66 sơnam kis tàm mpồl ƀòn 1, thị trấn Liên Sơn, kơnhoàl Lăk, càr Dak Lak neh geh tŭ là cau pơgru, nam 2010 mò jơh sơnam bơto mơya ờ hềt tơl nàng dờp broă dong kờl cau neh jơh sơnam lơh broă tài gam ờ tơl tơngai lơh broă. Geh kuang bàng bảo hiểm mpồl bơtiàn bơto pơlam, mò pơn jăt tai blơi bảo hiểm mpồl bơtiàn is nàng tơl nam geh dờp priă nhai cau neh jơh sơnam lơh broă mờ mò neh ring bal blơi tai.

 Lŏ Lương Thị Tường Thi geh kuang bàng Bảo hiểm mpồl kơnhoàl Lăk bơto pơlam blơi bảo hiểm mpồl bơtiàn is

Tơnơ̆ mờ 5 nam blơi bảo hiểm is, bơh nam 2016 tus tŭ do, pah nhai mò neh geh dờp priă nhai cau jơh sơnam lơh broă là khà priă tòm geh ngui tŭ sơnam neh kra mò dê. Mờ tŭ dờp priă dong kờl neh jơh sơnam lơh broă, mò gam geh ai sră bảo hiểm y tế mờ khà priă tơm tus 95% khà priă di lah kham sơm kòp. Mò Vượng yal: “Bơh tŭ geh dờp broă dong kờl do, rài kis geh ring niam, ờ pal ngòt tŭ sơnam neh kra, ờ pal gơrềng mờ kòn sao, tŭ gơtìp kòp tê jê să den neh geh sră bảo hiểm y tế. Dà lơgar sền gròi ai ală cau dờng sơnam den gŏ broă dong kờl bè hơ̆ là niam ngan”.

Lŏ Lương Thị Tường Thi, 34 sơnam, kis tàm xã Dak Liêng pà gĭt: Lài do, lŏ lơh broă tàm dùl công ty cau dùl nă să lơh is mờ geh blơi sră bảo hiểm mpồl bơtiàn jăt broă lơh pal blơi den tàng kơlôi là mìng geh cau lơh broă tàm ală anih lơh broă, mpồl lơh sa kă bro hơ̆ sồng geh blơi sră bảo hiểm mpồl bơtiàn nàng geh priă nhai tŭ neh jơh sơnam lơh broă. Tus tŭ ơm ờ lơh broă tai, geh kuang bàng bảo hiểm mpồl bơtiàn tàm do bơto pơlam, den tàng lŏ neh tă is priă blơi bảo hiểm mpồl bơtiàn.

Jăt lŏ Thi yal, broă tă 1 khà priă nàng blơi bảo hiểm mpồl bơtiàn is tŭ do, geh dong kờl sơnam neh kra bơh lŏ dê iang nùs rơlao tài kung geh dùl khà priă nhai ndrờm sùm. “Gŏ ală mlŏ, ală wa lòt dờp priă nhai cau neh jơh sơnam lơh broă añ kung kờñ sơl, di lah he neh kra ờ tơl pràn kơl dang să jan tai, ờ gơrềng mờ oh kòn uă ir, mơya añ kung geh khà priă nhai sơl. Ala mờ broă pal ngui sa den he geh lời priă tŭ neh kra”.

Ồng Vũ Văn Hải, kuang atbồ Bảo hiểm mpồl bơtiàn kơnhoàl Lăk pà gĭt, bơh bồ nam tus tŭ do, kơnhoàl geh 25 nă cau blơi bảo hiểm mpồl bơtiàn is, tơnguh khà cau blơi bảo hiểm mpồl bơtiàn is tàm kơnhoàl do tus 530 nă. Khà do gam ờ uă ngan di lah pơn drờm mờ khà geh ai.

Jăt ồng Hải kơlôi, kờñ lơh jăt broă tơnguh bơtàu gơwèt mờ cau blơi bảo hiểm mpồl bơtiàn is, tàm tơngai tus, Bảo hiểm mpồl bơtiàn pơn jăt tai chồl pràn tus tàm ală xã, thị trấn geh khà cau tus bal blơi ờ uă; pơgồp bal nền nòn mờ ală gah, mpồl lơh broă chính trị, mpồl bơtiàn tàm ală xã pờ tai uă dơ̆ pơrjum, broă lơh tàm ƀòn lơgar... “Bol añ geh chồl pràn broă yal tơngĭt tus mờ làng bol mờ uă broă lơh, lài ngan là bơh ală anih yal tơngĭt, dơ̆ bàr là bol añ geh cri bơyai tơn mờ làng bol. Bol añ kung gam geh rơndăp broă kờp wơl jơh mpồl làng bol tàm kơnhoàl nàng tus bal blơi bảo hiểm mpồl bơtiàn is, den bol añ geh cri bơyai mờ uă broă lơh, gơtùi là bol añ lơh broă yal tơngĭt tàm ală anih bè drà ha là Ủy ban Nhân dân ală xã”.

Ală broă lơh ngan tơnguh bơtàu bảo hiểm mpồl bơtiàn is tàm kơnhoàl Lăk geh tơnguh uă cồng nha, pơgồp bal tàm broă wèt tus khà jŏ jòng là jơh ală làng bol ndrờm geh priă nhai tŭ neh jơh sơnam lơh broă mờ geh sền gàr bơta pràn kơl dang să jan tŭ neh kra.

Cih Nam Trang- Cau mblàng Ndong Brawl