VOV4.K’ho- Kờñ pơgồp bơnah rơcang sơndră kòp Covid-19 mờ tơnguh jơnau git wă rơcang sơndră kòp bơh làng bol dê, ngai 12/5, Kuang àng sơnah ƀòn Khánh Xuân, ƀòn dờng Buôn Ma Thuột, càr Dak Lak bơyai lơh pà 10 rbô nơm chèu sơnơm glòm muh mat, 250 khàr dà lơh kloh khuẩn mờ git nđờ rhiang khàr dà hùc ai làng bol in.

Bal mờ pà chèu glòm muh mat, dà lơh kloh khuẩn mờ dà hùc ơn tàm khàr, mpồl kuang àng gam pơlam làng bol pơn chèu glòm muh mat dipal, pơlam làng bol sùm ràu tê mờ sơ ƀong, dà lơh kloh khuẩn; mblàng yal làng bol pal sền gròi bè broă gơlik geh bơh kòp bơtờp dê tàm ală anih yal tơnggit bơh ală anih yal tơnggit ngan ngồn; lơh jat tơl làm jơnau sồr 5K bơh Bộ Y tế dê. Tàm càr Dak Lak, tŭ do neh geh 2 nă cau bơtờp kòp Covid-19, ndrờm tàm ƀòn dờng Buôn Ma Thuột lơm. Broă lơh rơcang sơndră kòp neh mờ gam geh ală kấp, ală gah broă lơh tàm càr lam lơh jơh nùs mờ kràñ cê ngan.

Cau mblàng K’Duẩn