VOV4.K’ho- Sở Văn hóa, Thể thao mờ Du lịc càr Dăk Lăk bơyai lơh ràng tơlik jơnau yal mờ sền sơ wì đơs pơnđik lơh lèu Bơta kơp kờñ Dăm Săn- jơnau đơs pơnđik lơh lèu geh lơh jat jơnau yal yau Dăm Săn bơh kòn cau Rơđê dê, mờ bơta kơp kờñ lơh gơlik dùl jơnau đơs pơnđik lơh lèu dờng tàm rài đơs crih Việt Nam dê.

Cau bơceh jơnau đơs crih Nguyễn Cường yal bè broă bơceh mờ lơh gơs jơnau đơs pơnđik lơh lèu

Đơs pơnđik lơh lèu Bơta kơp kờñ Dăm Săn là rơndap broă geh càr Dăk Lăk ring bal bơh jơnau sồr bơh Kông ti TNHH Sông Thương Garden dê, jàu ai Sở Văn hóa, Thể thao mờ Du lịc đơng lam, cau bơceh jơnau đơs crih Nguyễn Cường lơh cau cih mờ pơlam lơh, mpồl đơs crih tamya kòn cau càr Dăk Lăk lam lơh. Mò H Yim Kđoh, Phó Củ tịc Ủy ƀan Ñân dân càr Dăk Lăk pà git, rơndap broă jơnau đơs pơnđik lơh lèu Bơta kơp kờñ Dăm Săn geh càr ring bal kờñ lơh gơs dùl jơnau đơs pơnđik lơh lèu dờng tàm rài đơs crih Việt Nam. Lơh wơl, prap gàr mờ ràng tơlik kah yau niam chài kòn cau Rơđê dê bơh ală gùng đơs pơnđik, jơnau tamya geh ngui tàm jơnau đơs pơnđik lơh lèu do; lơh wơl anih ràng tơlik đơs crih krơi is ngan geh nggùl ù tiah ngan ngồn mờ kơp kờñ lơh gơlik dùl phan bơna niam chài nhơl chờ krơi is Dăk Lăk dê, geh lơh sùm jat tơngai pơrgon.

Cau mblàng K’Duẩn