VOV4.K’ho - Tơnguh bơta niam phan bơna, wèt tus drà kă bro hờ lơgar ndai là gùng dà broă lơh pal geh tàm tơngai tơnơ\ do. Den tàng, tu\ do, uă cau lơh broă sa tàm Dak Lak gam hời rơ hời ngui ală broă lơh tam mờ sơngka sền gàr phan tam cèng bơta kơ\ kơljap, ngui gơguh jak kỹ thuật tàm broă lơh tam sầu riêng nàng kờ` tơnguh bơta niam phan lơh gơs, tơnguh cồng nha lơh sa, bal mờ hơ\ là gàr niam bơta bơtàu tơnguh kơ\ kơljap bơh tờm sầu riêng tàm càr Dak Lak dê.

Ồng Phan Đăng Tiềm ơm tàm xã Tân Lập, kơnhòal Krông Buk, càr Dak Lak geh 200 tờm sầu riêng, nggùl tàm khà do neh gơtùi tơnhàu. Kờp bal pah nam, lơh gơlik mờr 30 tấn. Dilah bè khà priă tac bè ală nam lài, tàm khà bơh 80 tus 90 rbô tàm 1 ki\ den hìu bơnhă ồng dê geh priă cồng mờr 1 tơmàn 500 tơlak priă, mơya nam do, khà priă tac sầu riêng ờ kơljap, lơyah rlau mờ nam lài bơh 20 tus 30 rbô tàm 1 ki\ den tàng priă lơh geh ồng dê kung gơmù uă ngan.

Jơnau lơh khà priă tac sầu riêng nam do gơmù lơyah, jat ồng Tiềm đơs, là tài bơh lài tus tu\ do, sầu riêng Dak Lak uă ngan là tac tàm drà kă bro lơgar Lo jat gùng ờ lòt gan mpồng nhàr dà lơgar. Mơya nam do, lơgar Lo til mpồng ală gơl gùng ờ lòt gan mpồng nhàr dà lơgar do, lơh gơbàn tam gơl tàm drà kă bro tac phan. Kàl sầu riêng do, cau kă bro rơwah blơi sầu riêng bal mờ ală jơnau sồr kal ke rlau: “Anih tac phan lơh gơs nam 2019, 2020 do kal ke ngan bè khà priă tac gơmù lơyah, cau kă bro sồr plai sầu riêng pal niam mờ bơkah, geh bơta niam uă”.

Jat ồng Nguyễn Văn Chiến, Kuang atbồ Hợp tác xã kă bro broă drơng ala Tân Lập Đông, kơnhòal Krông Buk đơs, bulah mờ khà priă tac bè nam do, mơya cau tam sầu riêng kung gam geh cồng sơl, bulah bè jo\ jòng, bơta ờ kơ\ kơljap tàm broă jòi drà kă bro tac phan lơh gơs gam gơ gơs là bơta ờ suk bơh cau lơh broă sa dê. Lơgar Lo kung gam là drà kă bro geh khà blơi uă, dilah tac jat sră pơrgon den sầu riêng pal tơl khà VietGAP, GlobalGAP. Mơkung pal geh top mã nàng jòi git anih lơh gơlik. Den tàng, nàng lơh jat jơnau kờ` bơh drà kă bro dê, wèt tus bơta bơtàu tơnguh kơ\ kơljap, bơh kàl lài, hợp tác xã ồng dê neh hòi jà cau tàm hợp tác xã tus bal tam sầu riêng jat tơl khà VietGAP: “Lài do, uă ngan là he tam bơrlu\ nàng tơnguh priă lơh geh, cồng nha lơh geh tàm dùl bă ù, ai tu\ do den nàng kờ` lơh jat jơnau kờ` bơh drà kă bro dê den bol a` lơh jat tơl khà VietGAP nàng lơh gơlik phan bơna ờ do ờ dă nàng tac hờ lơgar ndai mờ ală siêu thị tàm lơgar”.

Ồng Nguyễn Văn Chương, Phó Chủ tịch Mpồl chi sa plai càr Dak Lak pà git, broă drà kă bro lơgar Lo til mpồng blơi sầu riêng bơh ală gơl gùng ờ lòt gan mpồng nhàr dà lơgar neh geh đơs lài, tus kàl tơnhàu phan nam 2019, lơgar Lo neh til mpồng bơh broă blơi phan mờ gùng lòt ờ gan mpồng nhàr dà lơgar, lơh gơbàn kal ke tus mờ làng bol mờ mpồl lơh sa kă bro tàm broă tac sầu riêng. Den tàng, tềng đap mat gah lơh sa suơn sre Dak Lak pal sơlơ tơnguh rlau tai ală broă lơh drà, pơrjum yal tơnggit bè sầu riêng Dak Lak dê nàng chồl pràn khà blơi bơh drà kă bro tàm lơgar dê, tơmù bơta kơn jơ\ tàm broă tac phan bơna hờ lơgar ndai. Bal mờ hơ\, gah lơh sa suơn sre pal mblàng yal, hòi jà làng bol mờ mpồl lơh sa kă bro tam sầu riêng lơh jat bơta chài geh pơlam, lơh jat ală tơl khà dunia bè kloh niam ờ do ờ dă phan sa mờ jòi git anih lơh gơlik phan bơna. Nàng kờ` rơcang lài ală bơta pal geh kuơmàng ai broă tac hờ lơgar ndai jat broă lơh ki\ sră pơrgon tac sầu riêng hờ drà kă bro lơgar ndai: “Bulah nđờ bơta chi sa plai neh geh làng bol tam bơh jo\ kung neh geh ală mờng chài sơl. Mơya nàng cèng bơta ringbal, lơh gơlik dùl khà phan bơh suơn sre dờng ringbal bè rùp rài, bơta niam, bơta dờng, bơta dềt den ờ hềt gơtùi, den tàng broă tus bal ală mpồl, git ală gơguh jak khoa học kỹ thuật nàng bơt bơtàu geh ròt broă lơh bal kung bè tiah lơh gơlik phan bơh suơn sre tơr gùm bal nàng dong broă cribơyai mờ ală mpồl lơh broă bal lơgar ndai in geh [ươn rlau mờ lơh gơlik cồng nha lơh sa uă rlau”.

Tơnguh bơta niam phan bơna, wèt tus drà kă bro tac phan hờ lơgar ndai là gùng dà broă lơh mùl geh tàm tơngai tơ nơ\ do. Den tàng, broă cau lơh broă sa tàm Dak Lak gam hời rơ hời ngui ală broă lơh tam mờ sơngka sền gàr cèng bơta kơ\ kơljap, ngui gơguh jak khoa học kỹ thuật tàm broă tam sầu riêng geh dong tơnguh bơta niam phan lơh gơs, tơnguh cồng nha lơh sa bal mờ hơ\ hơ\ là gàr niam bơta bơtàu tơnguh kơ\ kơljap mờ tờm sầu riêng dê tàm càr.

Cau mblàng K’Duẩn