VOV4.K’ho- Sở Y tế càr Dăk Nông pà gĭt, 13 nă cau (F1) tàm càr Dăk Nông lòt bal rơndeh par QH1403 mờ cau kòp Covid-19 dơ̆ 3 bơh càr Dăk Lăk dê, bơh ƀlàng rơndeh par dunia Nội Bài rê tàm ƀlàng rơndeh par Buôn Ma Thuột, neh geh anih lơh broă geh gơnoar jun lòt ơm yah ngài kham kòp tơrgùm bal mờ xét nghiệm ai cồng nha ờ bơtờp dơ̆ 1 mờ virus Sars CoV-2. Tàm hơ̆, geh 1 nă cau F1 lài hơ̆ neh lòt tus ƀòn dờng Hồ Chí Minh kung neh geh anih lơh sơnơm ƀòn dờng do ai ơm yah ngài mờ jăt sền.

Tŭ dờp geh jơnau yal bè cau kòp Covid-19 dơ̆ 3 bơh càr Dăk Lăk dê là ồng V.Đ.D lòt rơndeh par bơh ƀlàng rơndeh par dunia Nội Bài rê tus ƀlàng rơndeh par Buôn Ma Thuột, ală anih lơh broă geh gơnoar tàm Dăk Nông neh sơrbac mhar jòi ală cau lòt bal rơndeh par măt 14 nă cau mờ mhar jun jơh ală cau F1 do lòt ơm yah ngài kham kòp tơrgùm bal. Tŭ do, mpồl lơh broă geh gơnoar càr Dăk Nông gam pơn jăt tai lòt jòi, mờ cih măt ală cau F2, F3 nàng lơh jăt jơnau sồr ơm yah ngài kham kòp tơl 21 ngai jăt jơnau sồr.

Cau mblàng Lơ Mu K’Yến