VOV4.K’ho- Drim ngai 11/7, càr Dăk Nông gŏ cau bơtờp kòp Covid-19 dơ̆ 2, là làng bol rê bơh ƀòn dờng Hồ Chí Minh. Cau kòp sồ 28474 là bi T.T.M.H, 22 sơnam, ơm kis sùm tàm xã Dăk Sôr, kơnhoàl Krông Nô, càr Dăk Nông, là cau lơh broă tàm Công ty drơng broă nhơl chờ tàm ƀòn dờng Hồ Chí Minh.

Tơnơ̆ tŭ geh cồng nha xét nghiệm tơn, cau kòp do neh geh jun lòt ai ơm yah ngài mờ sơm kòp tàm tiah ơm yah ngài sơm kòp Covid-19 bơh kơnhoàl Krông Nô dê. Tŭ do, cau kòp do geh ală bơta tơngŏ glar să, swing măt, ờ bơsiă, ờ duh să. Bơh sơnrờp, neh gŏ geh 12 nă cau tam tìp rềp F1; 4 nă cau F2; tŭ do kung gam pơn jăt tai rề ơnàng lùp jòi ală cau geh gơrềng. Tŭ do, gah lơh sơnơm càr Dăk Nông neh tus ƀồm sơnơm lơh kloh khuẩn tàm ală tiah cau kòp neh tus, wàng se kơryan hìu sồ 75, thôn Quảng Đà, xã Dăk Sôr, kơnhoàl Krông Nô, càr Dăk Nông gơrềng tus mờ cau kòp do.

Cau mblàng Lơ Mu K’Yến