VOV4.K’ho- Mho ngai 14/7, càr Dak Nông geh tai cau kòp dơ̆ 4 bơtờp mờ virus Sars CoV-2. Cau kòp do là cau ùr  N.T.L, deh nam 1972, là cau F1 bơh cau kòp sồ 28474 dê, gam geh ai ơm yah ngài tàm hìu sơnơm tàm anih ai ơm yah ngài tơrgùm bal bơh Hìu sơnơm kơnhoàl Krông Nô bơh ngai 11/7.  

Tiah wàng se kơryan kòp tiah geh cau kòp Covid-19 tàm Dak Nông

Tơnơ̆ tŭ geh cau kòp pa tơn, gah lơh sơnơm bal mờ ală mpồl lơh broă geh gơnnoar neh ai ơm yah ngài mờ jun cau kòp do mờ rơndeh sơnơm bơh tiah ai ơm yah ngài bơh Hìu sơnơm kơnhoàl Krông Nô tus ơm tàm tiah ai ơm yah ngài sơm kòp Covid-19 càr Dak Nông dê, mơkung tus ƀồm sơnơm lơh kloh khuẩn, lơh kloh khuẩn jơh ală tiah geh gơrềng tus mờ cau kòp do dê lài hơ̆. Ală mpồl lơh broă geh gơnoar neh mhar ngan kờp sền, jòi gĭt tiah lòt rê ală cau geh gơrềng mờ bơh sơnrờp sền gĭt geh 3 nă cau ơm rềp, tàm hơ̆ geh: bơklau ơm bal tàm cơldŭ ai ơm yah ngài, Kuang bàng đo was să jan mờ Kuang bàng ai mẫu xét nghiệm. Tŭ do, Gah lơh sơnơm kung gam pơn jat tai lùp sền tai ală cau geh gơrềng tàm tŭ ai ơm yah ngài.

Cau mblàng K’Hạnh