VOV4.K’ho- Jơnau yal tơngĭt drim ngai do 24/5 bơh Bộ Y tế dê pà gĭt geh gĭt tai 58 nă cau bơtờp kòp Covid-19, tàm hơ̆ geh 2 nă cau mut tàm lơgar neh ai ơm yah ngài tơn; 56 nă cau gam wơl geh gŏ tàm lơgar tàm 6 càr, ƀòn dờng mìng is càr Bắc giang neh geh 33 nă. 2 nă cau geh ai ơm yah ngài tơn tơnơ̆ tŭ mut tàm lơgar tàm Hà Nội ndrờm là cau quốc tịch lơgar Ấn Độ, tàm hơ̆ geh dùl nă cau ùr 35 sơnam mờ dùl nă kòn ùr  dềt 3 sơnam.

Tàm khà 56 nă cau bơtờp kòp tàm lơgar, càr Bắc Giang geh 33 nă, 8 nă tàm Hà Nội, 7 nă tàm Bắc Ninh, 5 nă tàm Lạng Sơn, 2  nă tàm Điện Biên mờ 1 nă tàm Hải Dương. Kờp tus 6 jiơ drim ngai do 24/5, Việt Nam kờp jơh geh 3 rơbô 790 nă cau bơtờp kòp tàm lơgar mờ 1 rơbô 485 nă cau mut tàm lơgar.  Geh 6 càr neh jơh 14 ngai ờ geh cau bơtờp kòp pa, hơ̆ là: Yên Bái, Quảng Ngãi, Đồng Nai, Nghệ An, Quảng Ninh, Quảng Nam. Tus tŭ do, lơgar he neh geh 42 nă cau chơ̆t tài bơh kòp Covid-19, 2 rơbô 721 nă cau geh sơm bời kòp.

Cau mblàng K’Hạnh