VOV4.K’ho- Jăt jơnau yal pa ngan, geh uă cau sền gròi hơ̆ là 144 nă cau kis tàm tiah gơtìp kơrian tềng gùng dềt 189/1 Mai Hắc Đế, sơnah ƀòn Tân Thành, ƀòn dờng Buôn Ma Thuột, càr Dak Lak ndrờm geh cồng nha xét nghiệm ờ gŏ mờ virus Sars CoV-2. M ơya, bañ sền ờ sơ̆p, broă rơcang sơndră mờ kòp Covid-19 gam pơn jăt tai geh gơnoar atbồ bal mờ ală gah lơh broă geh gơnoar tàm càr Dak Lak lơh jăt nền nòn.

Tơnơ̆ mờ tŭ gŏ cau sơnrờp ngan geh gŏ mờ Sars CoV-2, gah lơh sơnơm càr Dak Lak neh geh jơnau yal pơyoa tus mờ ală mpồl lơh broă gơrềng bal nàng hòi jà ờ geh bơyai lơh ai mpồl lòt bơsram, lòt nhơl sền, nhơl chờ nàng gàr tơl khà cau lơh broă sơndră mờ kòp Covid-19.

Jăt mờ hơ̆, hòi jà ală anih lơh broă, mpồl lơh broă gơrềng bal ơm ing ờ ai công chức, viên chức mờ cau lơh broă (mìng geh broă ni sơna ngan, kuơ màng); ờ bơyai lơh ai mpồl lòt bơsram, lòt nhơl sền, nhơl chờ (tàm lơgar mờ lơgar bơdìh) tàm tơngai yal lài bơta kòp Covid-19 di gơlan gơtờp; geh sùm khà cau lơh broă tơl nàng ai broă sơndră mờ kòp gơtờp in, broă kham sơm kòp tàm ală hìu sơnơm, di tŭ di pal mờ broă sền gàr, drơng gàr mờ tơnguh uă bơta pràn làng bol tàm càr.

Mờ tơnguh broă sền gròi, lơh niam wơl broă lơh jăt ală kơrnoăt bè broă sơndră mờ kòp gơtờp tàm anih lơh broă, mpồl lơh broă; kuang atbồ ală anih lơh broă, mpồl lơh broă dờp kơnòl tềng đăp mờ kuang atbồ Sở Y tế gơwèt mờ ală công chức, viên chức, cau lơh broă ờ lơh di mờ ală kơrnoăt bè broă sơndră mờ kòp Covid-19; jào Thanh tra Sở Y tế đơng lam, pơgồp bal mờ mpồl lơh broă, gah lơh broă gơrềng bal lơh jăt broă sền gròi broă lơh jăt ală tơngu me jơnau đơng lam bè broă sơndră mờ kòp Covid-19 tàm ală anih lơh broă, mpồl lơh broă gơwèt broă atbồ; lơh glài nền nòn ală mpồl lơh broă, cau dùl nă să is tìs mờ broă sơndră mờ kòp gơtờp.

Sở Y tế kung sồr ală mpồl lơh broă pơn jăt tai lơh jăt nền nòn ală broă sơndră mờ kòp Covid-19 di jăt mờ jơnau đơng lam bơh ală cấp geh gơnoar, lam sồr bơh UBND càr tàm Công văn sồ 3743, ngai 04/05/2021 bơh UBND càr mờ ală jơnau đơng lam bơh Sở Y tế bè broă sơndră mờ kòp Covid-19. Ai bơh gơnoar, kơnòl mờ khà cau lơh broă tàm anih lơh broă, mpồl lơh broă lơh jăt broă pơgồp bal mờ mpồl lơh broă, ală tiah tàm càr bơ̆t bơtàu gùng dà broă lơh, rơndăp broă lơh, lơh jăt ală tơngu me gàr niam broă lơh sơnơm tàm tơngai bơyai lơh tĕ khà kuang bàng Quốc hội khoă 15 mờ kuang bàng HĐND ală cấp tàm càr tơngai bơh nam 2021 tus 2026.

Gơwèt mờ ală hìu kham, sơm kòp, Sở Y tế sồr lơh jăt broă ai cau lơh broă di pal mờ bơta geh cau kòp dê, tam pà nền nòn cau lơh broă, tam pà mpồl lơh broă tàm pơdar bal; bơ̆t bơtàu broă lơh rơcang lài di jăt mờ ală bơta bơh kòp Covid-19, tàm hơ̆ geh rơndăp broă lơh mùl màl bè broă tam pà cau lơh broă, ală mpồl lơh broă tàm pơdar bal lơh broă, tam gơl hìu sơnơm, dờp cau kòp, phan sa, sền gròi broă gơtờp vi khuẩn, anih gơtờp tàm hìu kham sơm kòp tŭ geh bơta kòp gơtờp gơbàn tàm hìu kham sơm kòp.

Tềng đăp mờ bơta kal ke bơh kòp Covid-19, gơnoar atbồ kơnhoàl Cư̆ Mgar, càr Dak Lak gam tơnguh broă lơh jăt nền nòn ală broă sơndră mờ kòp gơtờp. Tŭ tŭ tàm kơnhoàl do geh 1 nă cau geh pin gơtìp kòp, geh bơta kòp rê bơh ƀòn dờng Đà Nẵng, bŭ lah xét nghiệm dơ̆ 1 ờ gŏ mờ kòp, mơya broă di gơlan gơtờp gam uă, Mpồl đơng lam sơndră mờ kòp Covid-19 kơnhoàl Cư̆ Mgar neh lơh jăt broă sơndră mờ kòp gơguh uă rơlao mờ khà bè ờs. Mờ sền wơl broă lơh jăt ală broă sơndră mờ kòp tàm kơnhoàl, tàm hơ̆ uă ngan là ală tiah sùm geh broă tơrgùm gal cau.

Tàm drà tòm thị trấn Quảng Phú-do là tiah kă bro tờm kờnhoal Cư̆ Mgar dê, Mpồl atbồ drà neh ai cau sùm bơto pơlam, lam sồr cau tăc phan pal pơn chèo tàm broă tăc phan, boh bơr mờ cau tus sền, blơi phan tàm drà; lam sồr làng bol lơh jăt broă kă bro mhar ală phan geh kuơ, bañ tơrgùm gal cau boh bơr bè lài do... ală broă lơh do geh làng bol, cau kă bro kờñ bal. ală tiah kă bro ală bơta phan ờ geh kuơ tàm kơnhoàl tŭ do kung gam geh sền gròi nền nòn broă sơndră mờ kòp gơtờp... Jơh 40 hìu đơs karaoke, bi-da ndrờm neh til mpồng, ơm ing ờ lơh broă.

Tềng đăp mờ bơta kal ke bơh kòp gơtờp, UBND càr Dak Lak neh tơlĭk jơnau sồr bè broă lơh jăt ală broă sơndră mờ kòp gơtờp tŭ tàm càr neh dờp geh cau gơtìp mờ kòp Covid-19. Jăt mờ hơ̆, càr Dak Lak đơng lam Chủ tịch UBND cấp kơnhoàl, xã rơcang pơgồp bal mờ ală mpồl lơh broă gơrềng bal đơng lam ngui ală broă tơmù nàng sơndră mờ kòp tàm càr bơh 12 jơ mang ngai 10 nhai 05 nam 2021 tus tàm tŭ geh jơnau yal pa.

Cau mblàng Ndong Brawl