VOV4.K’ho - Mho mờ mang òr (28/05), bơh broă xét nghiệm, anih tờm sền gròi kòp tê jê să càr Gia Lai gŏ 1 nă cau gơtờp mờ virus Sars CoV-2 gơtờp bơh Hà Nội. Mùl màl, cau sơnđan L.H.L deh nam 1977, kis tàm thị trấn Kông Chro, kơnhoàl Kông Chro, càr Gia Lai.

Cau do neh geh tŭ là F1 bơh cau kòp Covid-19 sồ 5410. Bơh broă jòi, anih tờm sền gròi kòp tê jê să càr Gia Lai neh ai 18 nă cau là F1 mờ 95 nă cau F2 bơh cau kòp do. Tŭ do, ală cau do neh geh tam cah is di mờ kơrnoăt geh ai; mờ ală anih geh bơta kòp gơrềng bal tus mờ cau kòp do neh geh til mpồng, lir jơnau yal lài mờ geh ƀồm sơnơm lơh kloh vi khuẩn di jăt mờ kơrnoăt geh ai.

Mpồl đơng lam sơndră mờ kòp Covid-19 càr Gia Lai sồr ală gah lơh broă, ală tiah tơnguh uă jơnau yal lài gơwèt mờ broă sơndră mờ kòp gơtờp; pơn jăt tai lơh jăt nền nòn broă sền gròi, sền wơl ală cau lòt rê bơh ală tiah di gơlan gơtìp kòp, ală cau jăk chài, cau lơgar bơdìh gam lơh broă tàm càr, geh gùng dà broă xét nghiệm sền gròi di pal nàng sơndră mờ kòp gơtờp.

Cau mblàng Ndong Brawl