VOV4.K’ho - Mho mờ mang òr (16/07), càr Gia Lai neh gŏ tai geh 1 nă cau gơtờp mờ virus Sars CoV-2. Dờp jơnau yal geh cau xét nghiệm gŏ mờ kòp tàm hìu sơnơm Đaị học Y dược Hoàng Anh Gia Lai là làng bol sơnđan măt N.T.T.N, deh nam 1978, kis tàm mpồl ƀòn 8, thị trấn Phú Túc, kơnhoàl Krông Pa, càr Gia Lai.

Anih tờm gròi sền kòp tê jê să càr Gia Lai neh ai kuang bàng tus lùp sền nàng gĭt bè bơta kòp mờ bơyai lơh ai mẫu xét nghiệm. Tus 4 jơ mho dùl ngai bal, cồng nha xét nghiệm geh gŏ mờ virus Sars CoV-2. Cau kòp do neh geh tam cah is, sơm kòp tàm tiah sơm kòp cau gơtìp kòp Covid-19 tàm hìu sơnơm càr Gia Lai.

Tơnơ̆ mờ tŭ geh dờp jơnau yal geh gŏ mờ kòp bơh làng bol N.T.T.N dê, Mpồl đơng lam rơcang sơndră mờ kòp Covid-19 càr Gia Lai neh mhar bơyai lơh jòi ală cau neh tìp rềp mờ cau gơtìp kòp; lơh jăt ală broă rơcang sơndră mờ kòp Covid-19 di jăt mờ kơrnoăt geh ai.

Cau mblàng Ndong Brawl