VOV4.K’ho - Kờp bơh 6 jơ drim tus 12 jơ ngai òr (24/05), lơgar Việt Nam geh 33 nă cau gơtìp kòp Covid-19 pa, tàm hơ̆ geh 28 nă cau tàm càr Bắc Giang, 4 nă cau tàm càr Hải Dương mờ 1 nă cau tàm ƀòn dờng Đà Nẵng.

28 nă cau geh gŏ tàm tiah kơrian, geh gơrềng tus mờ tiah kòp tàm tiah lơh sa mờ măi mŏk Quang Châu, Vân Trung, Đình Trám. Kờp tus 12 jơ ngai òr (24/05), lơgar Việt Nam kờp jơh geh 3 rơbô 823 nă cau geh dờp gơtìp kòp tàm lơgar mờ 1 rơbô 485 nă cau gơtìp tŭ mŭt bơh lơgar bơdìh. Jăt jơnau yal bơh Mpồl sơm kòp mờ mpồl sền nàng gĭt cau gơtìp kòp Covid-19 jroă, kờp tus drim ngai òr (24/05), lơgar Việt Nam gam sơm kòp ai 2 rơbô 258 nă cau kòp Covid-19, tàm hơ̆ geh rơlao 50% khà cau gơtìp kòp ờ geh tơngŏ mờ kòp.

Thứ trưởng Bộ Y tế ồng Nguyễn Trường Sơn đơs, bơta cau gơtìp kòp Covid-19 tàm dơ̆ do is mờ tàm ƀòn dờng Đà Nẵng. Tàm ƀòn dờng Đà Nẵng, geh uă cau kòp tàm tơngai jroă bơh gơtìp ờ pràn leh bơh lài ha là gơtìp kòp bơh lài neh jŏ. Mơya, tàm dơ̆ kòp do, jơi kòp geh bơh lơgar Ấn Độ, bơdìh mờ broă gơtờp mhar, geh ờ uă cau kòp gam kơnòm să, ờ tơngŏ mờ bơta kòp lài mơya gơtìp jroă, geh dong kờl tă nhơm mờ oxy, tă nhơm mờ măi.

Cau mblàng Ndong Brawl