VOV4.K’ho- Lơgar Việt Nam gam lơh jăt broă cĭt sơnơm vaccine rơcang sơndră mờ kòp Covid-19 tàm ờ uă càr, ƀòn dờng gơtìp kòp mờ di gơlan gơtìp kòp uă. Tàm tơngai tus, sơnơm vaccine geh tam pà ai jơh ală càr, ƀòn dờng tàm gùt lơgar in.

Kờñ gĭt wă tai bè sơnơm vaccine sơndră mờ kòp Covid-19, geh cồng nha tàm broă ngui, khà niam ờ do ờ dă kung bè ală jơnau pal kah tŭ cĭt, cau ai tơngĭt jơnau đơs do neh geh dơ̆ lùp bác sĩ Trịnh Quang Trí, Kuang atbồ anih tờm sền gròi kòp tê jê să càr Dak Lak.

-Ơ bác sĩ, dan bác sĩ pà gĭt jơnau yal mùl màl bè bơta sơnơm vaccine sơndră mờ kòp Covid-19 gam geh ai ngui tàm lơgar Việt Nam tŭ do?

Bác sĩ Trịnh Quang Trí: Tŭ do, broă kờ` bè sơnơm vaccine kòp Covid-19 uă ngan, mơya khà geh ai ờ hềt tơl, den tàng mìng geh ai cĭt tàm ờ uă cau di gơlan gơtìp uă. Sơnơm vaccine sơndră mờ kòp Covid-19 gam geh ngui tŭ do là bơh gah lơh sơnơm AstraZenaca lơgar Anh lơh gơs, geh ngui ai jơh ală cau geh bơh 18 tus 65 sơnam in, ờ gơtìp ală kòp mhar jroă bè duh să, ală kòp bè plai nùs, gùng mhàm...

-Ală bơta sơndră wơl lơi mờng gơtìp tơnơ̆ mờ tŭ cĭt mờ pal kah ală bơta lơi tŭ cĭt sơnơm vaccine kòp Covid-19, ơ bác sĩ?

Bác sĩ Trịnh Quang Trí: Kung ndrờm bè ală bơta sơnơm vaccine ndai sơl, sơnơm vaccine sơndră mờ kòp Covid-19 tŭ geh cĭt tàm să di gơlan gơtìp ală bơta sơndră wơl bè: as, jê tềng cĭt, jê bồ, duh să di mơ, glar, ờ niam tơrdih phan sa... bè broă sơndră wơl uă ngan tŭ do den kung ờ hềt geh jơnau yal mùl màl bè ală cau gơtìp bè bè bơta do. Mơya, tàm dunia neh ngui rơlao 500 tơlăk ding sơnơm vaccine sơndră mờ kòp Covid-19 bơh ală gah lơh sơnơm krơi is, mơya gơtùi đơs ală bơta sơnơm vaccine do niam ờ do ờ dă.

Pal kah tŭ cĭt sơnơm sơndră mờ kòp Covid-19 là pal ngài bơh ală ding cĭt ală sơnơm ndai ờ uă ngan là 2 poh. Sơnơm vaccine geh cĭt tềng đo tê, tơl dơ̆ cĭt là 0,5ml mờ cĭt 2 ding, tơl ding ngài 12 poh. Cĭt tơl 2 ding den cồng nha sền gàr tơnơ̆ mờ tŭ cĭt geh bơh 70 tus 80%. Is mờ broă cĭt sơnơm sơndră mờ kòp bơh ală bơta sơnơm vaccine ndai, cĭt sơnơm vaccine kòp Covid-19 mìng geh ngui tàm ală hìu sơnơm, tơl dơ̆ cĭt uă ngan là 50 nă cau.

Lài mờ tŭ cĭt, cau geh cĭt geh kuang bàng lơh sơnơm bơto pơlam, kham rơwah, geh jơnau ring bal hơ̆ sồng cĭt. Tơnơ̆ mờ tŭ cĭt geh sền gròi tơn tàm hìu sơnơm 30 phút mờ tơnơ̆ mờ hơ̆ geh sền gròi tàm hìu bơh 1 ngai mang tus 2 ngai mang. Ală hìu sơnơm geh sùm sồ điện thoại nàng geh dờp jơnau yal bơh làng bol bè broă sơndră wơl tơnơ̆ mờ tŭ cĭt sơnơm vaccine kòp Covid-19.

-Rơndăp broă cĭt sơnơm vaccine sơndră mờ kòp Covid-19 tàm càr Dak Lak bè lơi ơ bác sĩ? Mờ he gơtìp ală bơta kal ke lơi tàm broă cĭt lah ờ?

Bác sĩ Trịnh Quang Trí: Kờp dŭ tàm nhai 4 do geh cĭt sơnơm vaccine tàm càr Dak Lak. Tŭ geh sơnơm vaccine geh ai cĭt ală mpồl cau di jăt mờ Nghị quyết sồ 21 bơh Chính phủ dê, hơ̆ là cau lơh broă tàm ală hìu sơnơm, kuang bàng lơh sơnơm lơh broă sơndră mờ kòp gơtờp, mpồl jòi, lùp sền bơta kòp tê jê să geh ai lài mpồl sồ 1. Tơnơ̆ mờ hơ̆ là kuang àng, ling klàng; cau pơgru, ală cau geh broă lơh mờng tìp mờ gal cau... Tŭ geh tơl sơnơm vaccine geh cĭt tơl jăt ală mpồl cau di jăt broă geh ai lài.

Kal ke gơtìp tàm broă cĭt sơnơm vaccine sơndră mờ kòp Covid-19 hơ̆ là phan mrềt nàng prăp gàr sơnơm vaccine. Uă sơnơm vaccine pal prăp gàr tàm bơta mrềt âm uă ngan, tàm tŭ hơ̆ phan mrềt tŭ do tam ngui tàm khà 28 độ C.

Anih tờm sền gròi kòp tê jê să càr neh lơh rơndăp broă mờ rơcang tơl phan mrềt nàng ai broă cĭt sơnơm vaccine kòp Covid-19 in.

-Ơi, dan ưn ngài bác sĩ uă ngan!

Jơnau Bơto pơlam lơh jăt jơnau sồr 5K bơh Bộ Y tế dê

Chèu glòm muh măt: Pơn chèu biài glòm muh măt sùm tàm tiah mpồl bơtiàn, tiah tơrgùm gal cau; pơn chèu sơnơm tàm ală hìu sơnơm, tiah ơm yah ngài.

Ràu goh khuẩn: Ràu tê sùm mờ sơƀong halà dà ràu goh khuẩn tê. Jùt sàng goh ală anih, phan ngui sùm ơm rềp (tê kwan mpồng, điện thoại, măy tính bảng, măt kƀàng, cơghế...). Gàr kloh niam, jùt ràu mờ lời hìu đam rơđiah ha pah geh càl hi mrềt niam.

Ơm yah ngài: Gàr bơta ơm yah ngài tŭ tìp mờ tơm bơh bơr mờ cau ndai.

Bañ tơrgùm gal cau.

Yal mờ cau lơh sơnơm in: lơh jăt jơnau sồr cih yal mờ cau lơh sơnơm in tàm App NCOVI;  crăp tơmŭt Bluezone tàm anih https://www.bluezone.gov.vn nàng geh yal jơnau pơhìn bơtờp kòp Covid-19.

Tŭ geh tềl tơngŏ duh să, bơsiă, kal ke tă nhơm pal hòi tĕ điện thoại jăt sồ điện thoại is bơh Bộ Y tế dê là 19009095 halà sồ điện thoại is bơh gah lơh sơnơm tiah he dê nàng geh bơto pơlam, dong kờl, pơlam lòt kham kòp nàng gàr niam ờdo ờdă.

Cau mblàng Ndong Brawl mờ Lơ Mu K'Yến