VOV4.K’ho - Neh mờr 2 nam do, tŭ kòp Covid-19 gơtờp kung là tŭ ală cau ling sền gàr tiah nhàr dà lơgar, kuang bàng lơh sơnơm bal mờ ală mpồl lơh broă geh gơnoar tàm càr Dak Lak neh sền brê, tiah nhàr dà lơgar là hìu. Mìng mờ ală bă sàl geh lơh ing, bơnhă ồs geh lơh nàng trŭ ală dơ̆ sào sa mhar, ală cau ling neh sơrlèt mờ ală kal ke, tơlòng, kơrian broă mŭt ờ di mờ adăt boh lam, sền gròi kòp gơtờp, gơs “tiah kơrian kơ̆” tàm tiah sơnrờp tam dră mờ kòp gơtờp, cèng wơl geh bơta lơngăp lơngai ai làng bol in.

Càr Dak Lak geh rơlao 70 kơi sồ gùng nhàr dà lơgar rềp mờ lơgar Campuchia. Bơh tŭ kòp Covid-19 gơtìp, Cau ling sền gàr tiah nhàr dà lơgar càr neh lơh 7 pôs ling sền gròi mờ gĭt nđờ 10 mpồl lòt sền gròi gan tàm brê bơnơm nàng sền gròi nền nòn broă làng bol bàr lơgar tiă gan tàm ală gơl gùng ù, gùng pờ is, di tŭ gŏ cau tiă gan gùng nhàr dà lơgar ờ di mờ adăt boh lam nàng tam cah is, ai phan xét nghiệm rơcang sơndră mờ kòp gơtờp. Kờñ sền gàr ngai kung bè mang, ală cau ling pal bơyai tơnguh broă lơh sa, tam biăp, ròng iar nàng di pal mờ broă kờñ geh phan sa tơn tàm tiah do dê. Bŭ lah broă lơh mờ rài kis ing tàm bơta trồ tiah gơtìp kal ke, mơya ală kuang bàng, cau ling sền gàr bal mờ ală mpồl lơh broă geh gơnoar kung gam lơh ngan sơrlèt mờ kal ke, lơh ngan lơh gơs kơnòl geh jào, cèng geh bơta lơngăp lơngai làng bol in.

Thượng tá Nguyễn Minh Tuyên, Phó kuang đơng lam, Kuang atbồ mpồl đơng lam broă rơcang sơndră mờ kòp Covid-19 mpồl ling sền gàr tiah nhàr dà lơgar càr Dak Lak pà gĭt: “Kal ke ngan bol añ dê là tŭ trồ tiah tàm kàl prang, kal ke ngan, tam gơl trồ tiah lơh nhơm trồ tiah tàm tiah nhàr dà lơgar duh ngan, ờ tơl dà ngui sa, ală kòp gơtờp, sơmăc geh uă ngan. Mơya bol añ lơh ngan nàng tơmù bơta kal ke do. Geh broă sền gròi bơh ală mpồl lơh broă, ală cau geh nùs nhơm niam, bol añ neh geh tơl ală bơta kờñ nàng ală cau ling iang nùs lơh broă, ơm lơh broă mờ lơh jăt ală kơnòl geh jào”.

Bơh tŭ kòp Covid-19 gơtìp, kung bè broă lơh sơnơm tàm gùt lơgar, ală y, bác sĩ càr Dak Lak ờ gam geh ngai ơm rơlô chờ tai. Tàm hìu sơnơm sơm kòp jòr bơsiă gơlĭk mhàm mờ kòp klờm soh càr Dak Lak, do là tiah gam sơm kòp ai cau gơtìp kòp Covid-19 in, tŭ dờp geh ală cau sơnrờp ngan, ală y, bác sỹ kung gơtìp ờ sŭk ngan sơl, ngòt tài bơh lài tus tŭ do ờ hềt geh cau gơtìp mờ kòp gơtờp lơi geh bơta gơtờp pràn, mhar mờ ngòt rơngơ̆t ngan bè kòp Covid-19. Mơya, cau lơi kung geh cèng tàm să kơnòl dờng màng, tơl nă kuang bàng lơh sơnơm là dùl nă cau ling khin cha jăk chài, lơh ngan tam dră mờ bơta ngòt rơngơ̆t nàng sơm kòp ai cau kòp in.

Bác sĩ Nông Thị Điểm, Kuang atbồ khoa nội 3, hìu sơnơm kòp jòr bơsiă gơlĭk mhàm mờ kòp klờm soh càr Dak Lak, do là cau tus bal tơn mờ broă sơm kòp ală cau gơtìp mờ kòp Covid-19 yal: “Añ gĭt kòp Covid-19 ngòt rơngơ̆t ngan, lơh aniai tus mờ màng kis să tờm mờ cau kòp uă ngan, mơya să tờm là dùl nă bás sĩ, là mpồl lam lài sơnrờp ngan sơm kòp, añ kung tus mờ lời ing ală broă lơh nàng dờp sơm kòp cau kòp in niam ngan, sền gàr bơta pràn kơl dang să jan cau kòp gam sơm kòp tàm do in. Di lah tus do geh tai ală cau gơtìp kòp Covid-19, añ kung gam tus bal nàng sơm kòp cau kòp in sơl”.

Là dùl tàm ală cau gơtìp kòp Covid-19 sơnrờp ngan càr Dak Lak dê, tàm tơngai sơm kòp, geh ală y, bác sĩ sền gàr, bơta kah ngan tàm bồ tơngoh cau kòp sồ 601 dê ờ mìng là bơta virus lơh chơ̆t kòn bơnus geh măt sơnđan là Sars CoV-2 mờ gam là broă jơh nùs tàm broă lơh bơh ală y, bác sĩ, sùm bal mờ cau kòp, pơnjồh pơn điang nàng cau kòp sơrlèt mờ bơta ngòt rơngơ̆t bal mờ bơta kòp tê jê să. Cau kòp sồ 601 yal: “Tŭ gĭt să tờm gơtìp kòp añ ờ gĭt lơh bè lơi mờ ngòt rơngơ̆t ngan tài ờ gĭt ală cau geh sền añ bè lơi, ală cau di gơlan tam cah is mờ añ lah ờ, oh kòn, hìu nhă, jơi nòi, oh mi pal gơtìp mờ ală jơnau bơh mpồl bơtiàn đơs bè lơi. Mơya bơtoah ngan là kơnờm mờ broă pơnjồh pơn điang bơh ală y, bác sĩ bal mờ cau tàm hìu nhă neh dong kờl añ pràn kơl dang nùs nhơm. Ưn ngài ală y, bác sĩ tàm do uă ngan neh jơh sơbì uă bơta ngan nàng sơm kòp ai ală cau kòp bè añ dê".

Bơh ală ngai sơnrờp tŭ kòp Covid-19 gơtờp, ală kuang bàng lơh sơnơm rơcang sơndră mờ kòp càr Dak Lak neh geh ală mang ờ lơhă bĭc. Tŭ geh jơnau yal bè geh cau pin gơtìp kòp Covid-19 ha là geh cau rê bơh tiah gơtìp kòp, bŭ lah trồ mang ha là trồ ngai, ală kuang bàng lơh sơnơm rơcang sơndră mờ kòp neh bơyai lơh lùp sền mơ, jòi mơ, tam cah is, ai phan xét nghiệm, ngai lơi kung “lòt tơl gùng, teh tơl hìu, jòi tơl cau”. Mờ ală cau geh bơta bơh kòp, broă lòt rê lài do, tìp mờ uă cau, ală kuang bàng lơh sơnơm sơlơ kal ke rơlao. Ală ngai sơnrờp tam dră mờ kòp gơtờp, phan sền gàr să jan tŭ lơh broă gam ờ tơl, tàm tŭ pal tìp mờ bơta virus ngòt rơngơ̆t, ală y, bác sĩ bŭ lah ngòt, mơya sùm lam sồr bal lơh ngan mờ pal lơh nền nòn ngan.

Bác sĩ Lê Phúc, Phó kuang atbồ anih tờm sền gròi kòp tê jê să càr Dak Lak đơs: “Kuang bàng, viên chức bơh anih tờm sền gròi kòp tê jê să neh jơh nùs lơh ngan tơl ală sră nggal, ală tơngu me đơng lam bơh Mpồl đơng lam ală cấp mờ tàm tơngai do anih tờm do neh lơh niam broă sơndră mờ kòp Covid-19 đơs is mờ ờ uă kòp gơtờp ndai tàm càr đơs bal. Bol añ sùm rơcang lài tàm broă sơndră mờ kòp. Tàm tơngai tŭ do, broă sơndră mờ kòp Covid-19 là broă pal geh lơh mhar, den tàng broă lơh jăt broă lơh do tàm broă sơndră mờ kòp Covid-19 đơs is mờ kòp gơtờp đơs bal pal geh lơh ndrờm bal, mhar nàng gŏ, jòi, bơsong di tŭ ală cau gơtìp. Geh bè hơ̆, hơ̆ sồng kơrian geh broă gơtờp bơh kòp tàm mpồl bơtiàn".

Kơnờm mờ broă phi să bơh mpồl y, bác sĩ, ală kuang bàng lơh sơnơm rơcang sơndră mờ kòp, ală kuang bàng, cau ling lơh broă tàm tiah nhàr dà lơgar, do là tiah lam lài sơndră mờ kòp gơtờp càr Dak Lak dê, tus tŭ do gơtùi đơs là làng bol neh geh sền gàr niam ờ do ờ dă, kòp Covid-19 sùm tàm bơta geh sền gròi. Dơ̆ tam dră mờ kòp Covid-19 gam pal gơtìp mờ uă kal ke mờ bơta tơlòng gam tềng đăp. Kòp gơtờp tàm dunia gam ờ gĭt lài, mơya he pin là mờ broă đơng lam pràn kơl dang bơh Đảng, Dà lơgar, broă tus bal bơh jơh gùt mpồl lơh broă chính trị, nùs nhơm, kơnòl uă mờ làng bol bơh ală mpồl lơh broă geh gơnoar, broă dùl nùs bal, lơh jăt nền nòn bơh gùt mpồl bơtiàn, lơgar Việt Nam geh jai pha mờ broă tam dră mờ kòp gơtờp.

Cau mblàng Ndong Brawl