VOV4.K’ho- Drim ngai 31/2, jơnau yal bơh Hìu sơnơm dờng càr Kon Tum pà git, cau kòp dờng sơnam ngan rlau jơh tàm mpồl cau kòp geh 4 nă cau pin gơtìp khih tàm kơnhoàl Kon Plông neh chơt. Cau kòp chơt să là mò Y Xuân, 65 sơnam, ơm tàm ƀòn Kon Du, xã Măng Cành, kơnhoàl Kon Plông. Tàm tơngai mut tàm hìu sơnơm, mò Y Xuân gơtìp gơmù huyết áp, ờ niam plai nùs, ờ sô tă nhơm, geh tềl tơnggŏ gơtìp sồt mồr pal sền gròi khih. 4 ngai tơnơ̆ cau kòp gơtìp bơtờp khuẩn bơh gùng lơh lề phan sa, geh tềl tơnggŏ ờ pràn ală bơta tàm ndul. Cau kòp neh tam gơl huyết tương 3 dơ̆.

Tŭ do 3 nă cau kòp gam wơl tàm mpồl cau kòp gam pơn jat tai geh sơm tàm Khoa Hồi sức tích cực mờ sơndră khih. Ală cau kòp kung gam pal tă nhơm mờ măi mơya pràn kơldang să jan neh geh tềl tơnggŏ tam gơl niam, ală khà kơ̆ kơljap rlau pơn drờm mờ tŭ mut tàm hìu sơnơm. Bơta kal ke tŭ do tàm broă sơm ală cau kòp in là ờ geh sơnơm sơm, ờ hềt geh cồng nha xét nghiệm, khih neh ơm tàm mhàm, digơlan pal sơm jŏ jòng.

Cau mblàng K’Duẩn