VOV4.K’ho - Di ngai gùt làng bol ai mhàm dong kờl is ngai 07 nhai 4, mờ tơngu me “Ai ntờc mhàm pơrhê, jào rài kis in bơta kis”, Mpồl đơng lam lam sồr ai mhàm dong kờl is càr Kon Tum bơyai lơh pơrjum dờp bal mờ broă tus bal bơh gĭt nđờ rơhiang nă cau ai mhàm dong kờl is.

Dờp mhàm bơh cau ai mhàm dong kờl is

Nam 2020 tơl nhai Hội Chữ thập đỏ càr pơgồp bal mờ ală mpồl lơh broă bơyai lơh bơh 3 tus 5 dơ̆ ai mhàm dong kờl is mờ dờp geh rơlao 5 rơbô 300 kơl dung mhàm sơrlèt mờ rơndăp broă geh ai. Tŭ do gùt càr geh rơlao 9 rơbô nă cau dan ai mhàm dong kờl is, geh sùm 7 Mpồl ai mhàm dong kờl is mờ anih prăp gàr mhàm ris mờ rơlao 480 nă cau tus bal, tŭ lơi kung rơcang ai mhàm dong klàs cau tàm ală bơta jal mhar.

Tơnơ̆ mờ tŭ pơrjum dờp bal ngai gùt làng bol ai mhàm dong kờl is ngai 7 nhai 4, hìu sơnơm càr Kon Tum bơyai lơh dờp tơn rơlao 200 kơl dung mhàm bơh cau ai mhàm dong kờl is dê.

Cau mblàng Ndong Brawl