VOV4.K’ho - Khà kờp bơh Anih tòm sền gròi kòp tê jê să càr Dak Lak pà gŏ, bơh bồ nam tus tŭ do, gùt càr neh dờp geh 341 nă cau gơtìp mờ kòp jơng tê bơr, gơguh mờr 3,5 dơ̆ pơn drờm mờ tŭ do nam 2020, tàm hơ̆ geh dùl nă cau neh gơtìp chơ̆t.

Khà cau gơtìp kòp geh rah rài tàm 15 kơnhoàl, thị xã, ƀòn dờng mờ gơguh mhar tàm ală poh pa do mờ pah poh geh dờp mờr 40 nă cau kòp pa. Anih tòm sền gròi kòp tê jê să càr pà gĭt, kờñ rơcang sơndră mờ kòp jơng tê bơr, làng bol pal lơh jăt: rào tê sùm uă dơ̆ tàm ngai mờ sơƀong tềng dà mbòr, tàm hơ̆ uă ngan là tŭ trŭ phan sa, lài mờ tŭ ai kòn dềt sa, lài mờ tŭ kơnđu kòn dềt, tơnơ̆ mờ tŭ neh rê jă brê ha là bơsoh phan kòn dềt in.

Mờ lơh jăt niam broă kloh niam tàm broă sào sa, sùm jùt kloh ală phan, phan tìp pah ngai bè phan nhơl, phan bơsram, tê at mpồng, tê at ntùng, rồm hìu, măt kơ ƀàng, jơgĕ mờ dà lơh kloh vi khuẩn.

Cau mblàng Ndong Brawl