VOV4.K’ho- Ngai 25/5, Sở Y tế càr Lâm Đồng pà gĭt, neh geh 241 nă cau gơrềng tus cau kòp sồ 3141 ai cồng nha xét nghiệm ờ bơtờp dơ̆ 3 mờ kòp Covid-19. Tàm khà do, geh 121 nă cau geh lik rê bơh tiah ơm yah ngài tơrgùm bal nàng rê hờ hìu tơnơ̆ hơ̆ pơn jăt tai ơm yah ngài tai 7 ngai jăt jơnau sồr. Tŭ do, Lâm Đồng kung gam lơh jăt broă ai ơm yah ngài 355 nă cau, tàm hơ̆ geh 152 nă cau gơrềng tus cau kòp sồ 3141, gam wơl là ală cau lòt bơh tiah geh kòp tus Lâm Đồng.

Mpồl lơh broă geh gơnoar gam lơh sră nggal ai ală cau neh lơh jăt jơh tơngai sồr ơm yah ngài in nàng geh rê wơl hờ hìu

Tàm khà do, geh 21 nă cau ơm yah ngài tàm hìu sơnơm, 259 nă cau ơm yah ngài tơrgùm bal mờ 75 nă cau ơm yah ngài tàm hìu. Jăt Sở Y tế càr Lâm Đồng yal, bulah Lâm Đồng ờ gŏ cau lơi bơtờp mờ kòp Covid-19, mơya tềng đăp bơta gơbàn kal ke bơh kòp dê, ală broă lơh rơcăng sơndră kòp kung gam geh ală anih lơh broă geh gơnoar bơh càr Lâm Đồng dê jơh nùs lam lơh. Tàm hơ̆, càr neh rơcăng uă gùng dà broă lơh nàng rơcăng lài sơndră wơl dilah geh kòp gơbàn.

Cau mblàng Lơ Mu K’Yến