VOV4.K’ho- Mho ngai 4/7, Sở Y tế càr Lâm Đồng dê pà gĭt, cau pin bơtờp kòp Covid-19 là cau măy rơndeh pơndiang phan lòt jăt gơl gùng Dà Làc- ƀòn dờng Hồ Chí Minh neh ờ bơtờp dơ̆ dùl mờ virus Sars CoV-2. Cau măy rơndeh tơnơ̆ tŭ pơndiang phan bơh ƀòn dờng Hồ Chí Minh lòt tus Dà Làc, tus Cơldŭ kham kòp Đa khoa gơwèt Anih tờm gròi sền kòp tê jê să càr Lâm Đồng dê nàng xét nghiệm mhar sac rwah virus Sars CoV-2 den geh cồng nha bơtờp.

Tơnơ̆ hơ̆ tơn, Anih tờm gròi sền kòp tê jê să càr Lâm Đồng neh tus ai mẫu xét nghiệm Realtime- PCR den gơ ai cồng nha ờ bơtờp dơ̆ dùl mờ virus Sars CoV-2. Bè hơ̆, kờp tus klo ngai 4/7, Lâm Đồng geh jơh ală là 5 nă cau bơtờp kòp Covid-19, ờ geh cau bơtờp kòp pa. Tŭ do, jơh gùt càr gam ai ơm yah ngài 4 rbô 311 nă cau, tàm hơ̆ geh 12 nă cau ơm yah ngài tàm hìu sơnơm, 287 nă cau ơm yah ngài tơrgùm bal mờ rlau 4 rbô nă cau ơm yah ngài tàm hìu.

Cau mblàng Lơ Mu K’Yến