VOV4.K’ho- Drim ngai 11/7, càr Lâm Đồng sền gŏ tai dùl nă cau kòp Covid-19, tơnguh khà cau kòp tàm Lâm Đồng geh gŏ tus tŭ do là 11 nă. Cau bơtờp kòp Covid-19 pa là cau kòp sổ 28479, ùr Kuang bàng Ngân hàng Agribank lơh broă tàm kơnhoàl Đơn Dương. Geh gơrềng tus cau bơtờp kòp Covid-19 do, càr Lâm Đồng neh jòi gĭt tiah lòt rê mờ gĭt geh rlau 90 nă cau F1 mờ 700 nă cau F2.

Kơnhoàl Đơn Dương lơh jat broă ai ơm yah ngài mpồl bơtiàn tàm thôn Tân Lập, xã Lạc Lâm mờ jơh gùt thị trấn Thạnh Mỹ

Anih gròi sền kòp tê jê să càr Lâm Đồng gam pơn jat tai pơgồp bal mờ ală kơnhoàl Đơn Dương, Đức Trọng mờ ƀòn dờng Dà Làc nàng pơn jat tai jòi gĭt tiah lòt rê, cang tiah kơryan kòp, gròi sền tiah lòt rê. Lài hơ̆, nàng gàr niam broă lơh rcang sơndră kòp, ờ lời kòp bơtờp uă, càr Lâm Đồng neh lơh nền lơh jat broă lơh ai ơm yah ngài mpồl bơtiàn tàm ù tiah kơnhoàl Đơn Dương jat Chỉ thị sồ 16 bơh Thủ tướng Chính phủ dê. Kơnhoàl neh lơh jat broă ai ơm yah ngài mpồl bơtiàn là thôn Tân Lập, xã Lạc Lâm mờ jơh gùt thị trấn Thạnh Mỹ bơh kơnhoàl Đơn Dương dê, mờ tơngai lơh jat ết ngan rlau jơh là 14 ngai, kờp bơh 0 jiơ mang ngai 11/7 tus di tŭ geh jơnau yal pa.

Cau mblàng K’Hạnh