VOV4.K’ho- Tus drim ngai 08/7, càr Lâm Đồng pà git, geh tai 3 nă cau pa bơtờp kòp, tơnguh khà cau bơtờp kòp bơh càr dê tus 9 nă. Bơdìh mờ 6 nă cau bơtờp kòp Covid-19 geh git gŏ lài hơ̆ tàm kơnhoàl Dà Teh, mpồl cau pa bơtờp do geh 3 nă cau ơm kis mờ lơh broă tàm kơnhoàl Đơn Dương, geh đal git bơtờp virus Sars CoV-2 tŭ bal mờ gơp lòt tus Hìu sơnơm dờng Lâm Đồng xét nghiệm.

                                                              Hìu sơnơm dờng càr Lâm Đồng

Mùl màl, tàm drim ngai 7/7, jơh bal 3 nă cau do đì rơndeh oto is lòt bơh kơnhoàl Đơn Dương tus Hìu sơnơm dờng Lâm Đồng (tàm ƀòn dờng Dà Làc) nàng xét nghiệm mhar kòp Covid-19 mờ ai cồng nha bơtờp kòp. Tơnơ̆ hơ̆, anih tờm gròi sền kòp tê jê să càr Lâm Đồng ai mẫu xét nghiệm mờ kỹ thuật RT-PCR mờ kung ai cồng nha bơtờp virus Sars CoV-2 tàm mang ngai 07/7.

Tơnơ̆ tŭ git gŏ ală cau do bơtờp kòp Covid-19, tàm mang ngai 07/7 tơn, Sở Y tế càr Lâm Đồng neh geh jơnau yal jal mhar jòi cau geh gơ rềng, mờ kung lam lơh broă jòi cau ơm rềp. Tus drim ngai 08/7, mpồl lơh broă geh gơnoar neh jòi cau ơm rềp, tam cah 85 nă cau F1 mờ 265 nă cau F2.

Cau mblàng K’Duẩn