VOV4.K’ho- Ngai 16/7, UBND càr Lâm Đồng geh sră nggal jal mhar bè broă pơn jat tai lơh jat mhar, lơh kràñ ală broă lơh rcang sơndră kòp bơtờp tàm ù tiah càr dê. Sền gŏ 4 nă cau bơtờp kòp pơn jat sùm là ală cau măy rơndeh, cau drơng broă tàm rơndeh lòt gơl gùng ƀòn dờng Hồ Chí Minh mờ Lâm Đồng mờ sơlơ̆u wơl, UBND càr Lâm Đồng sồr Sở Giao thông Vận tải đơng lam, kong kơnòl pơgồp bal mờ UBND ală kơnhoàl, ƀòn dờng tàm càr geh gùng dà broă lơh ngan ngồn nàng tơnguh broă lơh atbồ cau măy rơndeh, cau drơng broă tàm rơndeh pơndiang phan bơna gùng jòng sùm lik mut tàm càr.

Mpồl lơh broă geh gơnoar càr Lâm Đồng lơh ngan gròi sền tiah lòt rê ală cau măy rơndeh mờ cau drơng broă tàm rơndeh tàm ù tiah càr dê

Bal mờ hơ̆, UBND càr sồr Sở Giao thông Vận tải yal ală anih lơh sa kă bro pơndiang phan bơna lơh jat broă xét nghiệm Sars CoV-2 ai cau măy rơndeh, cau drơng broă tàm rơndeh in 3 ngai dùl dơ̆. Dilah ală cau măy rơndeh, cau drơng broă tàm rơndeh ờ geh sră xét nghiệm Sars CoV-2 ờ bơtờp kòp geh ờ ai lòt gan anih gròi sền rcang sơndră kòp Covid-19 kờp bơh 0 jiơ mang ngai 18/7. UBND càr Lâm Đồng kung sồr Sở Giao thông Vận tải càr mhar tơrgùm, cih mat ală cau măy rơndeh, cau drơng broă tàm rơndeh pơn diang phan bơna tàm ù tiah càr dê nàng lơh broă rơndap lơh sơr băc mhar cĭt sơnơm vaccine ai ală cau do in.

Cau mblàng K’Hạnh