VOV4.K’ho- Ngai 05/4, Sở Y tế Lâm Đồng đơng lam Tiah tờm sền gròi kòp tê jê să càr, hìu sơnơm ală kơnhoàl, ƀòn dờng mờ ală anih kham sơm kòp tàm gùt càr sơlơ rơcang sơndră kòp jơng tê bơr. Jat Tiah tờm sền gròi kòp tê jê să càr Lâm Đồng yal, bơh bồ nam 2021 tus tŭ do, gùt càr geh khà cau gơbàn kòp jơng tê bơr là 149 nă, gơguh 109 nă pơndrờm bal dùl tŭ bal mờ nam lài.

Lơh jat jơnau đơng lam bơh Cục atbồ kham, sơm kòp, Bộ Y tế bè broă sơlơ tơnguh broă sơm kòp jơng tê bơr nàng di tŭ sền gròi kòp do, ờ lời kòp bơtờp uă tàm mpồl bơtiàn, Sở Y tế càr sồr Tiah tờm sền gròi kòp tê jê să càr bơt bơtàu broă rơndap lơh rơcang sơndră kòp jơng tê  bơr tàm càr mờ jal mhar lam lơh jat broă rơndap lơh ai tơlik.

Cau mblàng K’ Duẩn