Broa\ lơh bơh mpồl Nguyện Tâm 48 lơh broa\ dong kờl is tài mpồl bơtìan tàm bòn drà Dak Mil, kơnhoàl Dak Mil, càr Dak Nông tàm tơngai do neh pơ gồp bơnah ngan ngồn tam pà mờ ala\ cau geh rài kis kal ke, dong làng bol brồ guh tàm rài kis.

            Mpồl Nguyện Tâm 48, geh anih lơh broa\ tàm bòn drà Dak Mil, kơnhoàl Dak Mil, càr Dak Nông mut lơh broa\ bơh nam 2013, geh 22 na\ cau la ơruh pơnu, kong nhơn, cau lơh broa\ sa pria\ nhai dà lơgar, cau pơgru, kơnòm bơsram geh bơta kờ` bal, jơh nùs, kờ` ta\ pơ gồp dùl bơna dà kơlhề, tam pà kơnòl bơh cau kơnòm sa\ kờ` bơt bơtàu dùl mpồl bơtìan niam bơne\ rlau.

            Kờ` geh pria\ lơh broa\\, ala\ cau tàm mpồl neh roh dà kơlhề bal, tu\ tơngai  mut lơh ala\ broa\ bè:khòm tơr gùm khàl  cau sang, đùh, tus lam sồr ala\ cau geh nùs nhơm dong kờl is, geh ta\ pria\, sra\ mai\, ào mpha neh klar…Ala\ broa\ lơh ta\ pơ gồp ào, mpha klar, sra\ mai\ klar, sra\ yal yau rùp geh mut lơh sùm tàm  gùt nam. Mìng is broa\ lơh lòt khòm khàl, đùh cau sang den pah nhai den lơh 2 dơ\, mpồl sùm bơyai lơh lòt tus ala\ tiah bòn ơm kis làng bol nàng  lòt khòm tơr gùm.

            Bơh ala\ khà pria\ bơh mpồl jòi geh, ua\ broa\ lơh nùs nhơm dong kờl is geh neh bơyai lơh tàm ala\ bòn, bòn làng bol kòn cau tàm càr Dak Nông. Bè di tu\ 1/6 pa do, mpồl neh bơyai lơh nhơl chờ ala\ oh in tàm Anih tờm dong kờl kơnòm dềt kơnhoàl Dak Mil.

            Tềng do, mpồl neh  sia\t so\, lơh kloh sa\ ja`,  bơyai lơh bơta nhơl, pà 17 pò phan ai tus ala\ oh in. Lài hơ\,  mpồl kung neh geh bơyai lơh dơ\ nhơl nho\ chờ hờp, pà phan, pà sra\ mai\, ào mpha klar ai kơnòm dềt kòn cau tàm ntum Dak N’drung, kơnhoàl Dak Song mờ jàu phà phan, bơyai lơh tus gal lơh nhơl chờ kơnòm dềt kòn cau in tàm bòn Jun Juh, ntum Đức Minh, kơnhoàl Dak Mil.

            Tu\ do, mpồl tam mut lơh broa\ lơh ta\ trơ gùm sra\ mai\, sra\ cih, ào mpha, sra\ yal yal rùp nàng rcang tus broa\ lơh “Lòt bal mờ kơnòm dềt rbah geh tus lòt bơsram”.

            Bơyô Phan Xuân Vinh dùl na\ cau tàm mpồl tam pà: “A` go\ ala\ broa\ lơh bơh mpồl geh kuơ ngan ngồn mờ rài kis, pơ gồp bal tam pà mờ rài kis kal ke, dong khi brồ guh tàm rài kis. Tus bal mờ mpồl la broa\ lơh geh lơh bal niam ngan, dong a` geh sền kuơ tai rài kis mờ ai go\ kơnòl bơh dùl na\ cau neh dờng bal mờ mpồl bơtìan dong kờl cau kal ke. Broa\ lơh lơh broa\ dong kờl is gam geh ai tai a` in ua\ bơta chài tàm rài kis”.

            Jat lo\ Huỳnh Thị Tuyết Thu at bồ mpồl, den ala\ broa\ lơh bơh mpồl sùm geh wèt tus bơta tam pà mờ lam sồr kơnòm dềt ờ bơtuah tàm rài kis bơh ala\ broa\ lơh, phan pà ngan ngồn, geh kuơ. Bơh ala\ broa\ lơh do, geh gơ rề ala\ cau geh nùs nhơm niam, tam pà bal mờ phan bơna mờ nùs nhơm mờ cau kal ke.

            Jat bi Trần Thái Lập kuang at bồ mpồl ơruh pơnu kơnhoàl Dak Mil den broa\ lơh bơh mpồl Nguyện Tâm 48 la geh kuơ ngan ngồn mờ bơta geh bơh bòn lơgar, di pal mờ broa\ lơh bơtàu tơngguh bal bơh cau kơnòm sa\. Tơngai lài, mpồl tam klac mpồl ơruh pơnu kơnhoàl kung sùm lam sồr, geh pơlam mpồl tàm broa\ mut lơh ala\ broa\ lơh tài mpồl bơtìan kung bè lơh ala\ sra\ nggal nàng geh ơm tàm mpồl. Broa\ lơh bơh mpồl ai go\ geh bơnga\, kơnòl, nùs nhơm lam lài bơh cau kơnòm sa\ Dak Mil tus mờ rài kis mpồl bơtìan, tam pà mờ ala\ bơta kal ke, kơnòm dềt kòn cau.

                                                                                    Cau mblàng K’ Brọp